ପାଣି ପିଇବାକୁ ଯାଇ ଲୋଟା ଭିତରେ ଫସିଗଲା ମାଙ୍କଡ ଛୁଆର ମୁହଁ । ଘଣ୍ଟା ଘଣ୍ଟା ଧରି ବୁଲିଲା ଅସହାୟ ମା’ । ଏପରି ଭାବରେ ବଞ୍ଚିଲା ଜୀବନ
କନକ ବ୍ୟୁରୋ: ମହାରାଷ୍ଟ୍ର ଚନ୍ଦ୍ରପୁରର ଏକ ହୃଦୟ ବିଦାରକ ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏବେ ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଜନବସତି ମଧ୍ୟକୁ ପଶିଆସୁଛନ୍ତି ଜଙ୍ଗଲି ଜନ୍ତୁ । ବିଶେଷ କରି ମାଙ୍କଡ ପହ୍ଲ ଲୋକ ଗହଳିକୁ ପଶିଆସୁଛନ୍ତି । ଏଭଳି ସ୍ଥଳେ ଚନ୍ଦ୍ରପୁରରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଶୋଷରେ ଛଟପଟ ହେଉଥିବା ଏକ ମାଙ୍କଡ ଛୁଆ ପାଣି ପିଇବାକୁ ଯାଇ ପାଣି ଥିବା ଏକ ଲୋଟାଭିତରେ ମୁହଁ ପୁରାଇଥିଲା । ହେଲେ ପାଣି ପିଉପିଉ ଏହା ଭିତରେ ତା’ର ମୁହଁ ଫସିଯାଇଥିଲା । ସତ ଚେଷ୍ଟା ସତ୍ତେ୍ୱ ଏଥିରୁ ମହଁ ବାହାରିନଥିଲା । ଏହାକୁ ମା’ ମାଙ୍କଡ ମଧ୍ୟ ବାହାର କରିବାକୁ ଚେଷ୍ଟା କରିଥିଲା । ହେଲେ କିଛି ଲାଭ ହୋଇନଥିଲା । ଏହାପରେ ତା’ ପାଖକୁ ଚାଲିଆସିଥିଲେ ପୁରା ମାଙ୍କଡ ପହ୍ଲ । ସମସ୍ତେ ମିଶି ପିଲା ମାଙ୍କଡ ମୁହଁରୁ ଲୋଟା କାଢିବାକୁ ଚେଷ୍ଟା କରିଥିଲେ । ଅସହାୟ ମା’ ମାଙ୍କଡ ନିଜ ଛୁଆକୁ ପେଟରେ ଜାକି ଘଣ୍ଟା ଘଣ୍ଟା ବୁଲିଥିଲା । ସତେ ଯେପରି ସମସ୍ତଙ୍କୁ ତା’ ପିଲାକୁ ବଞ୍ଚାଇବାକୁ ଗୁହାରୀ କରୁଥିଲା । ଏପରି ଦୃଶ୍ୟ ସମସ୍ତଙ୍କୁ ବିଚଳିତ କରିଥିଲା । ଲୋକେ ଫରେଷ୍ଟ ଡିପାର୍ଟମେଣ୍ଟକୁ ଫୋନ କରି ଜଣାଇବାରୁ ବନ ବିଭାଗର ପୁରା ଟିମ୍ ଆସି ପହଞ୍ଚିଥିଲା । ହେଲେ ମାଙ୍କଡ ଛୁଆକୁ ବଞ୍ଚାଇବା ଏତେ ସହଜ ନଥିଲା ।
ଅନେକ ସମୟଧରି ଲୋଟା ଭିତରେ ଅଣନିଃଶ୍ୱାସୀ ହୋଇ ଛଟପଟ ହେଉଥିଲା ଛୁଆ ମାଙ୍କଡ । ହେଲେ ପାଖରେ ଅନେକ ମାଙ୍କଡ ଜଗି ବସିଥିବାରୁ ତାକୁ ଉଦ୍ଧାର କରାଯାଇଥିଲା । ଏଥିପାଇଁ ବିଶେଷ ରଣନୀତି ଅପଣାଇଥିଲା ବନବିଭାଗ । ଲାଠି ଧରି ମାଙ୍କଡଙ୍କୁ ଘଉଡାଇବା ସହ ଏକ ପଞ୍ଜୁରୀ ବସାଯାଇଥିଲା ଯେଉଁଥିରେ ପର୍ଯ୍ୟାପ୍ତ ପରିମାଣର ଖାଦ୍ୟ ରଖାଯାଇଥିଲା । ଦୀର୍ଘ ଘଣ୍ଟାର ମସକତ୍ ପରେ ଛୁଆ ମାଙ୍କଡକୁ ଆୟତ୍ତ କରାଯାଇ କଟରରେ ଅତି ସତର୍କତାର ସହ ଲୋଟାକୁ କଟାଯାଇ ତାର ଜୀବନ ବଞ୍ଚାଇବାକୁ ସଫଳ ହୋଇଥିଲା ବନ ବିଭାଗ ।