ମଧ୍ୟାହ୍ନ ଭୋଜନ ଚାଉଳରେ ପୋକ ସାଲୁବାଲୁ ,ନବରଙ୍ଗପୁର ନନ୍ଦାହାଣ୍ଡିରେ ପିଲାଙ୍କୁ ଖାଇବାକୁ ଦିଆଯାଉଛି ପୋକରା ଚାଉଳ ।
କନକବ୍ୟୁରୋ:ଦେଖନ୍ତୁ ଏହି ଚାଉଳକୁ । ପୋକ ସାଲୁବାଲୁ । ଅଧାରୁ ଅଧିକ ଚାଉଳରେ ପୋକ ହୋଇ, ତାର ରଂଗ ବଦଳିଯାଇଛି । କିନ୍ତୁ ବିଡମ୍ବନାର ବିଷୟ ହେଉଛି ଏହି ଚାଉଳକୁ ରୋଷେଇ କରି ମଧ୍ୟାହ୍ନ ଭୋଜନରେ ଛାତ୍ରଛାତ୍ରୀଙ୍କୁ ଖାଇବାକୁ ଦିଆଯାଉଛି । ଏଭଳି ଦୃଶ୍ୟ ଦେଖିବାକୁ ମିଳିଛି, ନବରଂଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଦଳେଇଗୁଡା ପ୍ରାଥମିକ ବିଦ୍ୟାଳୟରେ । ପିଲାଙ୍କୁ ଏଭଳି ଚାଉଳ ଦିଆଯିବାକୁ ନେଇ ଅସନ୍ତୋଷ ପ୍ରକାଶ କରିବା ସହ ପ୍ରଶ୍ନ ଉଠାଇଛି ପରିଚାଳନା କମିଟି ।
Kanak News is now on WhatsApp
Join and get latest news updates delivered to you via WhatsApp
ତେବେ ଏଥିପାଇଁ ଚାଉଳ ଯୋଗାଉଥିବା ସଂସ୍ଥାକୁ ଦୋଷ ଦେଇଛନ୍ତି ରୋଷେଇ ଦାୟିତ୍ୱ ନେଇଥିବା ସ୍ୱୟଂ ସହାୟିକା ଗୋଷ୍ଠୀର ସଦସ୍ୟ । ଚାଉଳ ବସ୍ତା ଉପରେ ନଜର ପକାନ୍ତୁ । ବସ୍ତାରେ ୨୦୨୨-୨୩ ଲେଖାଯାଇଛି । ତେବେ ପ୍ରଶ୍ନ ଉଠୁଛି, ୨୦୨୨-୨୩ରେ ପ୍ୟାକିଂ ହୋଇଥିବା ଚାଉଳକୁ ୨୦୨୪ରେ କେମିତି ଯୋଗାଣ କରାଯାଉଛି ।
କୌଣସି ପଶୁ ଖାଇବାକୁ ଯୋଗ୍ୟ ନଥିବା ଚାଉଳକୁ ବିଦ୍ୟାଳୟର ଛାତ୍ରଛାତ୍ରୀଙ୍କ ପାଇଁ କେମିତି ଦିଆଗଲା । ତେବେ ଅଭିଯୋଗ ପାଇ ଜିଲ୍ଲା ଶିକ୍ଷାଧିକାରୀଙ୍କ ନିର୍ଦ୍ଦେଶକ୍ରମେ ନନ୍ଦାହାଣ୍ଡି ଅତିରିକ୍ତ ବ୍ଲକ ଶିକ୍ଷାଧିକାରୀ ପହଁଚି ତଦନ୍ତ କରିଛନ୍ତି । ଏବଂ ଚାଉଳରେ ପୋକ ଥିବା କଥାକୁ ସ୍ୱୀକାର କରିଛନ୍ତି । ନବରଂଗପୁର ଖୋଦ ଗଣଶିକ୍ଷାବିଭାଗ ମନ୍ତ୍ରୀଙ୍କ ଜିଲ୍ଲା ହୋଇଥିବାରୁ, ସେ ନିଜେ ଏହାର ତଦନ୍ତ କରି, ଚାଉଳ ଯୋଗାଇଥିବା ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି ହେଉଛି ।