ପାକିସ୍ତାନରେ କେବେ ହେବ ସାଧାରଣ ନିର୍ବାଚନ । କୋର୍ଟଙ୍କୁ ସୂଚନା ଦେଲେ ନିର୍ବାଚନ କମିଶନ
କନକ ବ୍ୟୁରୋ : କେବେ ହେବ ପାକିସ୍ତାନରେ ସାଧାରଣ ନିର୍ବାଚନ । ଏହାକୁ ନେଇ ଅନେକ ଦିନରୁ କଳ୍ପନା ଜଳ୍ପନା ଲାଗି ରହିଥିଲା । ପାକିସ୍ତାନ ନିର୍ବାଚନ କମିଶନ ଗୁରୁବାର ଦିନ ଦେଶର ସୁପ୍ରିମକୋର୍ଟରେ କହିଛନ୍ତି କି ୨୦୨୪ ଫେବୃଆରୀ ୧୧ ତାରିଖରେ ପାକିସ୍ତାନରେ ସାଧାରଣ ନିର୍ବାଚନ ଅନୁଷ୍ଠିତ ହେବ । ପାକିସ୍ତାନର ଆଇନ ମୁତାବକ ନ୍ୟାସନାଲ ଆସେମ୍ବଲି ଓ କ୍ଷେତ୍ରୀୟ ବିଧାନସଭା ଭାଙ୍ଗିବାର ୯୦ ଦିନ ମଧ୍ୟରେ ନିର୍ବାଚନ ହେବା କଥା ।
Kanak News is now on WhatsApp
Join and get latest news updates delivered to you via WhatsApp
ଜାନୁଆରୀ ୨୯ ତାରିଖ ସୁଦ୍ଧା ନିର୍ବାଚନ ମଣ୍ଡଳୀ ନିର୍ଦ୍ଧାରଣ ପ୍ରକ୍ରିୟା ଶେଷ ହେବ ବୋଲି ନିର୍ବାଚନ କମିଶନଙ୍କ ଓକିଲ ସାଜିଲ ସ୍ୱାତୀ କୋର୍ଟଙ୍କୁ ଜଣାଇଛନ୍ତି । ସୁପ୍ରିମକୋର୍ଟର ବାର୍ ଆସୋସିଏସନ, ପାକିସ୍ତାନ ତେହେରିକ-ଏ-ଇନସାଫ, ମୁନୀର ଅହମ୍ମଦ ଏବଂ ଇବାଦ୍-ୟୁର-ରେହମାନଙ୍କ ସମେତ ବିିଭିନ୍ନ ପକ୍ଷଙ୍କ ଆବେଦନର ଶୁଣାଣି ବେଳେ ସୁପ୍ରିମକୋର୍ଟ ଏହି ଖୁଲାସା କରିଛନ୍ତି ।
ଆବେଦନ ଉପରେ ୯୦ ଦିନ ମଧ୍ୟରେ ନିର୍ବାଚନ ସମୟସୀମା ସଂପର୍କରେ ମତାମତ ଦେବାକୁ କୋର୍ଟ ଉଭୟ ଇସିପି ଓ କେନ୍ଦ୍ର ସରକାରଙ୍କୁ ନୋଟିସ ଜାରି କରିଥିଲେ । ପାକିସ୍ତାନର ମୁଖ୍ୟ ବିଚାରପତି କାଜି ଫୈଜ ଇସା କହିଛନ୍ତି କି, ସମସ୍ତେ ନିର୍ବାଚନ ଚାହୁଁଛନ୍ତି । ଶୁଣାଣି ସମୟରେ ପିଟିଆଇର ଓକିଲ ଅଲ୍ଲୀ ଜାଫର ଯୁକ୍ତି ବାଢିଥିଲେ ଯେ ୯୦ ଦିନ ମଧ୍ୟରେ ନିର୍ବାଚନ ହେବା ଉଚିତ୍ । ତେବେ ଏହି ଅନୁରୋଧ ପ୍ରଭାବହୀନ ହୋଇଛି ବୋଲି ସିଜେପି ଇସା କହିଛନ୍ତି । ନିର୍ବାଚନରେ ବିଳମ୍ବ ମୌଳିକ ଅଧିକାରର ଉଲଙ୍ଘନ ବୋଲି ଜାଫର ଯୁକ୍ତି ବାଢିଥିଲେ ।
ପିଟିଆଇ ଦ୍ୱାରା ନିର୍ବାଚିତ ପାକିସ୍ତାନର ରାଷ୍ଟ୍ରପତି ପ୍ରଥମେ ନଭେମ୍ବର ୬ ତାରିଖ ସୁଦ୍ଧା ନିର୍ବାଚନ କରାଇବାକୁ ପ୍ରସ୍ତାବ ଦେଇଥିଲେ । କିନ୍ତୁ ଆଇନ ଓ ନ୍ୟାୟ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ନିର୍ବାଚନ ତାରିଖ ଘୋଷଣା କରିବାର ଅଧିକାର ରାଷ୍ଟ୍ରପତିଙ୍କ ପାଖରେ ନୁହେଁ ବରଂ ନିର୍ବାଚନ କମିଶନଙ୍କ ପାଖରେ ରହିଛି ।