ମୁଁ ନୁହେଁ ନକଲି ଶିକ୍ଷକ : ସାର୍ଟିଫିକେଟରେ ସାମନ୍ୟ ତ୍ରୁଟି ପାଇଁ ଏବେ ଚାକିରିର ଶେଷ କାଳରେ ହିନସ୍ତା ହେଉଛନ୍ତି ସ୍ୱର୍ଣ୍ଣଲତା ନାୟକ
କନକ ବ୍ୟୁରୋ : ସାର୍ଟିଫିକେଟରେ ବୟସ ତାରତମ୍ୟକୁ ନେଇ ଲୁହ ଝରାଉଛନ୍ତି ଜଣେ ଅସହାୟ ଶିକ୍ଷୟିତ୍ରୀ । ବାପା, ମା’, କିମ୍ବା ସେତେବେଳେର ଶିକ୍ଷକଙ୍କ ସାମାନ୍ୟ ଭୁଲ ଯୋଗୁଁ ଚାକିରିର ଶେଷ ସମୟରେ ଦରମା ବନ୍ଦ କରିଛନ୍ତି ବ୍ଲକ ଗୋଷ୍ଠୀ ଶିକ୍ଷା ଅଧିକାରୀ । ମିଛ ସାର୍ଟିଫିକେଟ୍ ଦେଇ ଚାକିରି କରିଥିବା ଅଭିଯୋଗରେ ତାଙ୍କର ୫ମାସ ହେବ ଦରମା ବନ୍ଦ କରିଦିଆଯାଇଛି । ଦରମା ପାଇଁ ଯାଇ ଗୁହାରି କଲେ ମଧ୍ୟ ତାଙ୍କ ଅଭିଯୋଗ କେହି ଶୁଣୁନଥିବା କହିଛନ୍ତି ଶିକ୍ଷୟିତ୍ରୀ । ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଶ୍ରଦ୍ଧାପୁର ଗାଁର ସ୍ୱର୍ଣ୍ଣଲତା ନାୟକ ।
Kanak News is now on WhatsApp
Join and get latest news updates delivered to you via WhatsApp
ସେ ୧୯୮୫ ମସିହାରେ ପୁରୁଷୋତମପୁର ଝଗଡେଶ୍ୱର ହାଇସ୍କୁଲରେ ନବମ ଶ୍ରେଣୀରେ ଆଡମିଶନ ହୋଇ ୧୯୮୮ରେ ଦଶମ ପାସ କରିଥିବା ସ୍କୁଲ ରେଜିଷ୍ଟରରେ ଉଲ୍ଲେଖ ରହିଛି । ସେହିପରି ତାଙ୍କ ଜନ୍ମ ତାରିଖ ହାଇସ୍କୁଲରେ ୧୯୭୧ ଥିବା ବେଳେ ପ୍ରାଥମିକ ସ୍କୁଲରେ ତାଙ୍କ ଜନ୍ମ ବର୍ଷ ୧୯୫୬ ବୋଲି ଉଲ୍ଲେଖ ରହିଛି । ସେ ସମୟରେ ଜନ୍ମ ତାରିଖ ଗୋଟିଏ ଥିବା ବେଳେ ହାଇସ୍କୁଲରେ ଆଉ ଗୋଟିଏ ଜନ୍ମ ତାରିଖ ରହିଛି । ଏହି ବୟସ ତାରତମ୍ୟକୁ ନେଇ ଜଣେ ବ୍ୟକ୍ତି ବିଇଓଙ୍କ ନିକଟରେ ଅଭିଯୋଗ କରିବାରୁ ୫ମାସ ହେବ ସ୍ୱର୍ଣ୍ଣଲତାଙ୍କ ଦରମା ବନ୍ଦ କରିଛନ୍ତି ବିଇଓ । ପ୍ରକୃତରେ ଏହା ପାଇଁ ଦାଇ କିଏ ଆଉ ଏହାର ପରିଣାମ ଭୋଗୁଛି କିଏ ତାକୁ ନେଇ ଅନେକ ପ୍ରଶ୍ନ ଉଠୁଛି ।
ତାଳପତ୍ର ପଞ୍ଜିକାରେ ସ୍ୱର୍ଣ୍ଣଲତାଙ୍କ ଜନ୍ମ ତାରିଖ ୧୯୭୧ ରହିଛି । ହେଲେ ୟୁପି, ମାଇନର ସ୍କୁଲରେ ଜନ୍ମ ତାରିଖ ଭୁଲ ରହିଛି । ଯାହାକୁ ନେଇ ଚାକିରିର ଶେଷ କାଳରେ ହଇରାଣ ହେଉଛନ୍ତି ଶିକ୍ଷୟିତ୍ରୀ ସ୍ୱର୍ଣ୍ଣଲତା । ନବମ ଶ୍ରେଣୀ ଟିସିରେ ମଧ୍ୟ ତାଙ୍କର ୧୯୭୧ ଜନ୍ମ ତାରିଖ ରହିଛି । ହେଲେ ବ୍ରଜ ମୋହନା ହାଇସ୍କୁଲରେ ପ୍ରଧାନ ଶିକ୍ଷକ କହିଛନ୍ତି ୧୯୮୫ ମସିହାରେ ସ୍ୱର୍ଣ୍ଣଲତାଙ୍କ ନାଁ ନାହିଁ । ବିଇଓ ଏଭଳି ଅଭିଯୋଗ ପାଇବା ପରେ ତାଙ୍କ କାଗଜପତ୍ର ସଂଗ୍ରହ କରି ଶିକ୍ଷୟିତ୍ରୀଙ୍କ ଦରମା ବନ୍ଦ କରିଦେଇଛନ୍ତି । ଏବେ କେଉଁ ଜାଗାରେ ତାଙ୍କ ଜନ୍ମ ବର୍ଷ ଭୁଲ ହୋଇଛି ତାହାକୁ ତଦନ୍ତ କରିବା ପାଇଁ ଅନୁରୋଧ କରିଛନ୍ତି ଶିକ୍ଷୟତ୍ରୀ ।