ଭାରତ ଓ ତାଇୱାନକୁ ନେଇ ବିବାଦ : ଚୀନ ପ୍ରଧାନମନ୍ତ୍ରୀଙ୍କ ବଡ ବୟାନ; ଯୁଦ୍ଧ ପାଇଁ ପ୍ରସ୍ତୁତ ରହିବାକୁ ସେନାକୁ ଦେଲେ ନିର୍ଦ୍ଦେଶ
କନକ ବ୍ୟୁରୋ : ଭାରତ ସହ ସୀମା ବିବାଦ ଏବଂ ତାଇୱାନକୁ ନେଇ ଆମେରିକା ସହ ବିବାଦ ଭିତରେ ବଡ ବୟାନ ଦେଇଛନ୍ତି ଚୀନ ପ୍ରଧାନମନ୍ତ୍ରୀ ଲି କେକ୍ୱିଆଙ୍ଗ୍ । ଗୋଟିଏ ପଟେ ଭାରତ ଅନ୍ୟ ପଟେ ତାଇୱାନକୁ ନେଇ ପରିସ୍ଥିତି ଉତେଜନାପୂର୍ଣ୍ଣ ରହିଥିବା ବେଳେ ଯୁଦ୍ଧ ପାଇଁ ପ୍ରସ୍ତୁତ ରହିବାକୁ ସେନାକୁ ନିର୍ଦ୍ଦେଶ ଦେଇଛନ୍ତି ଚୀନ ପ୍ରଧାନମନ୍ତ୍ରୀ । ଚଳିତ ବର୍ଷ ଚୀନ ତାର ପ୍ରତିରକ୍ଷା ବଜେଟରେ ୭ ଦଶମିକ୍ ୨ ପ୍ରତିଶତ ବୃଦ୍ଧି କରିବ ବୋଲି ସଂସଦରେ ଉଦବୋଧନ ଦେଇ କହିଛନ୍ତି ଲି କେକ୍ୱିଆଙ୍ଗ୍ ।
Kanak News is now on WhatsApp
Join and get latest news updates delivered to you via WhatsApp
ଫଳରେ ଚୀନର ପ୍ରତିରକ୍ଷା ବଜେଟ୍ ୨୨୫ ବିଲିୟନ ଡଲାର ଅର୍ଥାତ୍ ୧୮ ଲକ୍ଷ ୩୮ ହଜାର ୪୭୭ କୋଟି ଛୁଇଁବ ବୋଲି କୁହାଯାଉଛି । ଏହାକୁ ମିଶାଇ ଲଗାତାର ୮ ବର୍ଷ ହେବ ଚୀନ ତାର ପ୍ରତିରକ୍ଷା ବଜେଟରେ ଲଗାତାର ଭାବେ ବୃଦ୍ଧି କରିଚାଲିଛି । ଯାହା ଭାରତ ସମେତ ପଡୋଶୀ ଦେଶ ପାଇଁ ଚିନ୍ତାର କାରଣ ପାଲଟିଛି । ଆମେରିକା ପରେ ବିଶ୍ୱରେ ଚୀନର ପ୍ରତିରକ୍ଷା ବଜେଟ୍ ଦ୍ୱିତୀୟ ସର୍ବଧିକ ଥିବା ବେଳେ ଏହି କ୍ଷେତ୍ରରେ ଭାରତ ତିନି ନମ୍ବରରେ ଅଛି ।
ତାଇୱାନଠୁ ଆରମ୍ଭ କରି ଦକ୍ଷିଣ ଚୀନ ମହାସାଗରରେ ଆମେରିକାର କାର୍ଯ୍ୟକଳାପକୁ ନେଇ ବେଜିଂ ଚିନ୍ତାରେ ଅଛି । ଏହାଛଡା ଚୀନର ଚେତାବନୀ ସତ୍ୱେ ଆମେରିକାର ତତକାଳୀନ ବାଚସ୍ପତି ନାନ୍ସି ପେଲୋସିଙ୍କ ତାଇୱାନ ଗସ୍ତ ଚୀନର ଚିନ୍ତା ଆହୁରୀ ବଢାଇଦେଇଛି । ଚୀନ ପ୍ରଧାନମନ୍ତ୍ରୀ ଲି କହିଛନ୍ତି, ୨୦୧୭ରେ ପିଏଲଏର ଶତବାର୍ଷିକ ପାଳନ ଉପରେ ଚୀନ ଅଧିକ ଗୁରୁତ୍ୱ ଦେଉଛି । ମିଲିଟାରୀ ଦକ୍ଷତା ବଢାଇବା ସହ ମିଲିଟାରୀ ଅପରେସନ ଉପରେ ଚୀନ ଗୁରୁତ୍ୱ ଦେଉଥିବା ସେ କହିଛନ୍ତି ।