ଏମିତି ଭାଇ ଜଗତେ ନାହିଁ: ପରିଣତ ବୟସରେ ବି ଭଉଣୀର ସେବା କରୁଛି ଭାଇ
କନକ ବ୍ୟୁରୋ: ନିଜ ହାତରେ ଭଉଣୀକୁ ଖୁଆଇ ଦେଉଛନ୍ତି । ମୁଣ୍ଡରେ ତେଲ ଲଗେଇ ଦେଉଛନ୍ତି । ଆଉ ଭଲ ମନ୍ଦ ମଧ୍ୟ ବୁଝୁଛନ୍ତି । ଦୁହେଁ ପରିଣତ ବୟସରେ ଉପନୀତ । ତଥାପି ଭଉଣୀର ହାତ ଛାଡ଼ି ନାହାନ୍ତି ଭାଇ । ଏ ହେଉଛନ୍ତି ଗଜପତି ଜିଲ୍ଲା ରାଇଜୁକା ଗାଁର ବୃଦ୍ଧ ଭାଇ ଭଉଣୀ କାଶୀନାଥ ଓ ସୁଲକ୍ଷଣୀ । ବଡ଼ ଭଉଣୀର ବୟସ ୮୦ ଟପିଥିବା ବେଳେ ଭାଇର ବୟସ ୭୫ । ପ୍ରାୟ ୬୦ ବର୍ଷ ତଳେ ରୋଷେଇ କରିବା ସମୟରେ ସୁଲକ୍ଷଣୀଙ୍କ ମୁହଁ ପୋଡ଼ିଯାଇଥିଲା । ଆଉ ସେବଠାରୁ ଅକର୍ମଣ୍ୟ ହୋଇଯାଇଛନ୍ତି ସୁଲକ୍ଷଣୀ । ଆଖିକୁ ଦିଶୁନି କି କାନକୁ ମଧ୍ୟ ଶୁଭୁନି । ବାପା ମା’ ଆରପାରିକୁ ଚାଲିଯିବା ପରେ ଭାଇ ହିଁ ତାଙ୍କର ଏକମାତ୍ର ସାହାରା ପାଲଟିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଭାଇ କାଶୀନାଥଙ୍କ ପତ୍ନୀ ଆରପାରିକୁ ଚାଲିଯିବା ପରେ ପୁଅ ବୋହୁ ମଧ୍ୟ ସେମାନଙ୍କ ଦାୟିତ୍ୱ ନେଲେ ନାହିଁ । ଫଳରେ ନିଜ ଗାଁ ଛାଡ଼ି ରାଇଜୁକା ଗାଁରେ ୨୦ ବର୍ଷ ହେଲା ଭାଇ ଭଉଣୀ ଦୁହେଁ ରହୁଛନ୍ତି । ରାଇଜୁକା ଗାଁ ଲେକେ ଗାଁ ମୁଣ୍ଡରେ ଖଣ୍ଡେ ଯାଗା ଦେଇ ପ୍ରଥମେ ଏକ ଚାଳ ଛପର ଘର କରିଥିଲେ । ତିତିଲି ବାତ୍ୟାରେ ଘର ଭାଙ୍ଗିଯିବାରୁ ଗାଁ ଲୋକେ ମିଳିତ ଭାବେ ଏକ ଆଜବେଷ୍ଟସ୍ ଘର କରିଦେଇଛନ୍ତି । ସରକାରଙ୍କ ପକ୍ଷରୁ କେବଳ ବାର୍ଦ୍ଧକ୍ୟ ଭତା ମିଳୁଛି । ତେଣୁ ଦୁହିଁଙ୍କୁ ଆଉ କିଛି ସହାୟତା କରିବାକୁ ସେମାନେ ଦାବି କରିଛନ୍ତି । ଦୀର୍ଘ ୨୦ ବର୍ଷ ହେଲା ଦୁଃଖ କଷ୍ଟରେ ରହୁଛନ୍ତି ଏହି ବୃଦ୍ଧ ଭାଇ ଭଉଣୀ । ତେବେ ପରିଣତ ବୟସରେ ଭାଇ ଭଉଣୀଙ୍କର ଏଭଳି ଭଲ ପାଇବାକୁ ସ୍ଥାନୀୟ ଅଂଚଳରେ ସମସ୍ତେ ପ୍ରଶଂସା କରିଛନ୍ତି ।