କନକ ବ୍ୟୁରୋ : ସିକ୍କିମ ସରକାର ମାତୃତ୍ୱ ଛୁଟିକୁ ନେଇ ବଡ ଘୋଷଣା କରିଛନ୍ତି । ଏବେ ରାଜ୍ୟରେ ମାତୃତ୍ୱ ଲାଭ କରିବାକୁ ଥିବା ମହିଳା ସରକାରୀ କର୍ମଚାରୀଙ୍କୁ ୧୨ ମାସ ପର୍ଯ୍ୟନ୍ତ ସରକାରୀ ଛୁଟି ମିଳିବ । ସିକ୍କିମ ମୁଖ୍ୟମନ୍ତ୍ରୀ ପ୍ରେମ୍ ସିଂ ତମାଙ୍ଗ ଏହି ଘୋଷଣା କରିଛନ୍ତି । ଏହାସହ ମାତୃତ୍ୱ ଲାଭ କରିବାକୁ ଯାଉଥିବା ମହିଳାଙ୍କ ସ୍ୱାମୀ ଯଦି ସରକାରୀ ଚାକିରି କରିଥାନ୍ତି ତେବେ ତାଙ୍କୁ ମଧ୍ୟ ଏହି ଅବଧି ମଧ୍ୟରେ ଗୋଟିଏ ମାସ ଛୁଟି ମିଳିବ । ମୁଖ୍ୟମନ୍ତ୍ରୀ କହିଛନ୍ତି କି ଖୁବଶୀଘ୍ର ଏହାକୁ ଆଇନରେ ପରିଣତ କରାଯିବ । ଯାହାଦ୍ୱାରା ରାଜ୍ୟରେ ହଜାର ହଜାର ମହିଳା ସରକାରୀ କର୍ମଚାରୀ ଉପକୃତ ହେବେ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସିକ୍କିମ ରାଜ୍ୟ ସିଭିଲ ଅଧିକାରୀ ସଂଘର ବାର୍ଷିକ ଉତ୍ସବକୁ ସମ୍ବୋଧିତ କରିବା ଅବସରରେ ସିକ୍କିମ ମୁଖ୍ୟମନ୍ତ୍ରୀ କହିଛନ୍ତି କି, ଏହା ଦ୍ୱାରା ସରକାରୀ କର୍ମଚାରୀ ନିଜ ପରିବାର ଓ ପିଲାଙ୍କର ଦେଖାରଖା କରିବାର ସୁଯୋଗ ପାଇବେ । ଏନେଇ ଖୁବଶୀଘ୍ର ବିଜ୍ଞପ୍ତି ଜାରି କରାଯିବ ।
ଏହି ଘୋଷଣା ବେଳେ ମୁଖ୍ୟମନ୍ତ୍ରୀ କହିଛନ୍ତି କି, ଅଧିକାରୀମାନେ ରାଜ୍ୟ ପ୍ରଶାସନର ମୁଖ୍ୟ ଅଙ୍ଗ । ଯେଉଁମାନେ ସିକ୍କିମର ଲୋକଙ୍କ ବିକାଶରେ ମୁଖ୍ୟ ଭୂମିକା ଗ୍ରହଣ କରିଥାନ୍ତି । ଏହି କ୍ରମରେ ନିଯୁକ୍ତ ହୋଇଥିବା ସମସ୍ତ ନୂଆ ଆଇଏଏସ ଓ ଏସସିଏସ ଅଧିକାରୀଙ୍କୁ ଧନ୍ୟବାଦ ଦେଇଥିଲେ । ଏହାସହ ସେମାନଙ୍କ ସଫଳ କ୍ୟାରିୟର ପାଇଁ ଶୁଭକାମନା ମଧ୍ୟ ଜଣାଇଥିଲେ ।
ମାତୃତ୍ୱଲାଭ ଅଧିନିୟମ ୧୯୬୧ କ୍ରମରେ ମହିଳା ସରକାରୀ କର୍ମଚାରୀଙ୍କୁ ୬ମାସ ବା ୨୬ ସପ୍ତାହ ଛୁଟି ମିଳିବାର ପ୍ରାବଧାନ ରହିଛି । ସିକ୍କିମରେ ହେଉଛି ଦେଶର ସବୁଠାରୁ କମ୍ ଜନସଂଖ୍ୟା ବିଶିଷ୍ଠ ରାଜ୍ୟ । ଏଠାରେ ମାତ୍ର ୬.୩୨ ଲକ୍ଷ ଲୋକ ବାସ କରନ୍ତି ।