ନାଥନ ଲାୟନଙ୍କ ସଂଘର୍ଷ: ଦିନେ ଗ୍ରାଉଣ୍ଡରେ କାଟୁଥିଲେ ଘାସ, ଆଜି ଅଷ୍ଟ୍ରେଲିଆର ସଫଳ ବୋଲର
କନକ ବ୍ୟୁରୋ: ନାଥନ ଲାୟନ । ଯିଏ ନିଜ ସ୍ପିନର ଯାଦରେ ଏବେ ସମସ୍ତଙ୍କୁ ଘାଇଲା କରିଛନ୍ତି । ଭାରତ ବିପକ୍ଷ ବର୍ଡର ଗାଭାସ୍କର ଟ୍ରଫିର ତୃତୀୟ ଟେଷ୍ଟରେ ୧୧ ୱିକେଟ ନେଇ ସମସ୍ତଙ୍କୁ ଚମକାଇ ଦେଇଛନ୍ତି ଏହି ଅଷ୍ଟ୍ରେଲିଆ ବୋଲର । ଆଉ ଏହା ସହ ସେ ଟେଷ୍ଟ କ୍ରିକେଟର ଅଷ୍ଟମ ସବୁଠାରୁ ସଫଳ ବୋଲର ହୋଇପାରିଛନ୍ତି । ତେବେ ଆପଣ ଜାଣିଛନ୍ତି କି ଏହି ସଫଳତା ପାଇବା ପଛରେ ନାଥନ କେତେ ସଂଘର୍ଷ କରିଛନ୍ତି । ତେବେ ଆସନ୍ତୁ ଜାଣିବା ନାଥନଙ୍କ ସଂଘର୍ଷରୁ ସଫଳତାର ଯାତ୍ରା…
Kanak News is now on WhatsApp
Join and get latest news updates delivered to you via WhatsApp
୨୩ ବର୍ଷ ବୟସରେ ନାଥନ ଲାୟନ ଅଷ୍ଟ୍ରେଲିଆ ପାଇଁ ଟେଷ୍ଟରେ ଡେବ୍ୟୁ କରିଥିଲେ । ୨୦୧୧ରେ ଅଷ୍ଟ୍ରେଲିଆର ଶ୍ରୀଲଙ୍କା ଗସ୍ତରେ ତାଙ୍କୁ ସାମିଲ କରାଯାଇଥିଲା, ଆଉ ପ୍ଲେଇଙ୍ଗ ୧୧ରେ ବି ସ୍ଥାନ ମିଳିଥିଲା । ସେବେଠାରୁ ଏବେ ଯାଏଁ ନାଥନ ଅଷ୍ଟ୍ରେଲିଆର ଜଣେ ନିୟମିତ ଖେଳାଳି ହୋଇ ରହିଛନ୍ତି । ହେଲେ ଟେଷ୍ଟ ଡେବ୍ୟୁ ପୂର୍ବରୁ ନାଥନ ଲାୟନ ଅଷ୍ଟ୍ରେଲିଆର ଏଡିଲେଡ କ୍ରିକେଟ ଗ୍ରାଉଣ୍ଡରେ ଘାସ କାଟବା କାମ କରୁଥିଲେ ।
ନାଥନ ଲାୟନ ଜୁନିୟର ଲେବଲରୁ କ୍ରିକେଟ ଖେଳି ଆସୁଛନ୍ତି । ତେଣୁ କ୍ରିକେଟ ଖେଳ ସହ ନିଜ ଖର୍ଚ୍ଚ ଉଠାଇବା ପାଇଁ ସେ ଘାସ କାଟିବା କାମ ବି କରୁଥିଲେ । ଏକ ସାକ୍ଷାତକାରରେ ସେ କହିଥିଲେ କି ସକାଳ ସାଢେ ୫ଟାରୁ ଉଠି ସେ ଗ୍ରାଉଣ୍ଡରେ ଘାସ କାଟିବା କାମ କରୁଥିଲେ । ଆଉ ଏଥାପାଇଁ ତାଙ୍କୁ କୌଣସି ଅସୁବିଧା ମଧ୍ୟ ହେଉନଥିଲା ।
ଜୁନିୟର ଲେବଲରେ ନାଥନ ଲାୟନ ଅନେକ ମ୍ୟାଚ ଖେଳିଥିଲେ । ହେଲେ ଆଗକୁ ବଢି ପାରୁନଥିଲେ । ଲମ୍ବା ସମୟ ପରେ ଅଷ୍ଟ୍ରେଲିଆର ଘରୋଇ ଟିମ ରେଡବୋକ୍ସ ପାଇଁ ଅଭ୍ୟାସ ମ୍ୟାଚରେ ବୋଲିଂ ପାଇଁ ଏକ ସ୍ପିନ ବୋଲରର ଆବଶ୍ୟକତା ରହିଥିଲା । ଆଉ ସେଥିପାଇଁ ରେଡବୋକ୍ସର କୋଚ ଡେରେନ ବେରୀ ନାଥନ ଲାୟନଙ୍କୁ ଚୟନ କରିଥିଲେ । ଆଉ ସେହି ଅଭ୍ୟାସ ମ୍ୟାଚରେ ନାଥନ ଲାୟନ ନିଜ ବୋଲିଂରେ ସମସ୍ତଙ୍କୁ ଏମିତି ପ୍ରଭାବିତ କରିଥିଲେ ଯେ ମାତ୍ର ୭ ମାସ ଭିତରେ ସେ ଇଣ୍ଟର ନ୍ୟାସନାଲ ଡେବ୍ୟୁ କରିଥିଲେ ।
ନାଥନ ଲାୟନ ଅଷ୍ଟ୍ରେଲିଆ ପାଇଁ ୧୧୮ ଟେଷ୍ଟ ମ୍ୟାଚ ଖେଳିସାରିଛନ୍ତି, ଯେଉଁଥିରେ ସେ ୪୭୯ ୱିକେଟ ହାସଲ କରିଛନ୍ତି । ସେ ଟେଷ୍ଟ କ୍ରିକେଟରେ ସବୁଠାରୁ ଅଧିକ ୱିକେଟ ନେଇଥିବା ଖେଳାଳିଙ୍କ ମଧ୍ୟରେ ଅଷ୍ଟମ ସ୍ଥାନରେ ରହିଛନ୍ତି । ସେହିପରି ଅଷ୍ଟ୍ରେଲିଆରେ ସେ ସେନ ୱର୍ଣ୍ଣ ଓ ଗ୍ଲେନ ମ୍ୟାକଗ୍ରାଥ ପରେ ତୃତୀୟ ସଫଳ ଟେଷ୍ଟ ବୋଲର ହେଉଛନ୍ତି ନାଥନ ଲାୟନ । କେବଳ ଘରୋଇ ମୈଦାନ ନୁହେଁ ଏସିଆ ମୈଦାନରେ ମଧ୍ୟ ନିଜ ଜଲୱା ଦେଖାଇଛନ୍ତି ନାଥନ ଲାୟନ ।
ଏସିଆରେ ସବୁଠାରୁ ଅଧିକ ଟେଷ୍ଟ ୱିକେଟ ନେଇଥିବା ଅତିଥି ବୋଲର ହେଉଛନ୍ତି ନାଥନ । ଭାରତ, ପାକିସ୍ତାନ, ବାଂଲାଦେଶ ଓ ଶ୍ରୀଲଙ୍କାରେ ଖେଳାଯାଇଥିବା ମ୍ୟାଚରେ ନାଥନ ନିଜ ଯାଦୁ ଦେଖାଇଛନ୍ତି । ସେ ଏସିଆରେ ୨୭ ଟେଷ୍ଟ ମ୍ୟାଚ ଖେଳି ୧୩୭ ୱିକେଟ ନେଇଛନ୍ତି । ଏହାସହ ସେ ସେନ ୱାର୍ଣ୍ଣଙ୍କ ୨୫ ଟେଷ୍ଟରେ ୧୨୭ ୱିକେଟର ରେକର୍ଡ ମଧ୍ୟ ଭାଙ୍ଗି ସାରିଛନ୍ତି ।