ଭାରତଠୁ ବ୍ୟାଟିଂ ଶିଖୁ ଅଷ୍ଟ୍ରେଲିଆ: ନିଜ ଟିମ ଉପରେ ବର୍ଷିଲେ ମାଇକେଲ କ୍ଲାର୍କ
କନକ ବ୍ୟୁରୋ: ଭାରତଠାରୁ ବାରମ୍ବାର ପରାଜୟ ପରେ ଅଷ୍ଟ୍ରେଲିଆ ବିଚଳିତ ହୋଇପଡିଛି । ପ୍ୟାଟ କୁମିନ୍ସଙ୍କ ନେତୃତ୍ୱଧିନ ଅଷ୍ଟ୍ରେଲିଆ ଟିମ ସ୍ୱପ୍ନରେ ବି କେବେ ଭାବି ନଥିବ ଯେ ଭାରତ ମାଟିରେ ଅଷ୍ଟ୍ରେଲିଆର ଏଭଳି ସ୍ଥିତି ହେବ । ୨-୦ରେ ସିରିଜରେ ପଛୁଆ ରହି ବର୍ଡର ଗାଭାସ୍କର ଟ୍ରଫି ଜିତିବାର ସୁଯୋଗ ହରାଇ ସାରିଛି କଙ୍ଗାରୁ ଦଳ । ଅଷ୍ଟ୍ରେଲିଆର ଅନେକ ଦକ୍ଷ ବ୍ୟାଟ୍ସମ୍ୟାନ ଭାରତ ମାଟିରେ ଫେଲ ମାରିଛନ୍ତି । ଫଳରେ ଏହାକୁ ସହଜରେ ହଜମ କରିପାରିନାହାନ୍ତି ଅଷ୍ଟ୍ରେଲିଆର ପୂର୍ବତନ କ୍ରିକେଟର ମାଇକେଲ କ୍ଲାର୍କ । ଆଉ ରାଗ ସୁଝାଇବାକୁ ଯାଇ ଅଷ୍ଟ୍ରେଲିଆ ଟିମ ଉପରେ ପ୍ରବଳ ବର୍ଷିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କ୍ଲାର୍କ ଅଷ୍ଟ୍ରେଲିଆ ଟିମକୁ ଟାର୍ଗେଟ କରି କହିଥିଲେ କି, ସ୍ପିନର ଅନୁକୂଳ ପରିସ୍ଥିତିରେ କେମିତି ବ୍ୟାଟିଂ କରାଯାଏ ତାହା ଭାରତଠୁ ଅଷ୍ଟ୍ରେଲିଆକୁ ଶିଖିବାର ଥିଲା । ଏମିତି ଲାଗୁଛି କି ଆମେ ଭାରତକୁ ବ୍ୟାଟିଂ କରୁଥିବାର ଦେଖୁନାହୁଁ । ମାନୁଛୁ କି ସେମାନେ ପରିସ୍ଥିତିକୁ ଭଲରେ ବୁଝୁଛନ୍ତି ବୋଲି ଭଲ ବ୍ୟାଟିଂ କରୁଛନ୍ତି, ହେଲେ ଆମେ କାହିଁକି କିଛି ଅଲଗା କରିବାର ଚେଷ୍ଟା କରିବା । ଯଦି ଆମେ ୨୦୦ ରନ କରିଦେଇଥାନ୍ତୁ ତେବେ ବିଜୟ ନିଶ୍ଚିତ ହୋଇଥାନ୍ତା । ୬୦ରେ ଆମର ଗୋଟିଏ ୱିକେଟ ଯାଇଥିଲା । ଆଉ ଶେଷ ୫୨ ରନରେ ଆମେ ୯ ୱିକେଟ ହରାଇଥିଲୁ । ଭାରତକୁ ୧୧୫ ରନର ଲକ୍ଷ୍ୟ ମିଳିଥିଲା । ଯାହାକୁ ଭାରତ ୪ ୱିକେଟ ହରାଇ ହାସଲ କରିଥିଲା ।
କ୍ଲାର୍କଙ୍କ କହିବାନୁସାରେ ଅଷ୍ଟ୍ରେଲିଆ ତାର ପ୍ରଥମ ଭୁଲ ଟେଷ୍ଟ ସିରିଜ ପୂର୍ବରୁ ଅଭ୍ୟାସ ମ୍ୟାଚ ନଖେଳି କରିଛି । କୁମିନ୍ସ ଏହାକୁ ଛାଡି ସିରିଜ ଆରମ୍ଭ ହେବା ପୂର୍ବରୁ ବାଙ୍ଗାଲୋରରେ ଛୋଟ ଅଭ୍ୟାସ ଶିବିରରେ ଭାରତୀୟ ପରିସ୍ଥିତି ଭଳି ପରିସ୍ଥିତି ତିଆରି କରି ଅଭ୍ୟାସ କରିବାକୁ ବାଛିଥିଲେ । ଏହା ସବୁଠାରୁ ବଡ ଭୁଲ । ଅତିକମରେ ଗୋଟିଏ ଅଭ୍ୟାସ ମ୍ୟାଚ ଖେଳିବାର ଥିଲା ।
ପ୍ରଥମ ଦୁଇ ଟେଷ୍ଟରେ ଅଷ୍ଟ୍ରେଲିଆ ବ୍ୟାଟ୍ସମ୍ୟାନ ସ୍ପିନ ବିରୋଧରେ ଦୁର୍ବଳ ସାବ୍ୟସ୍ତ ହୋଇଥିଲେ । ଅଷ୍ଟ୍ରେଲିଆ ବ୍ୟାଟ୍ସମ୍ୟାନମାନେ ସ୍ୱିପ ଖେଳି ଭାରତୀୟ ସ୍ପିନରଙ୍କୁ ସାମ୍ନା କରିବାକୁ ଚେଷ୍ଟ କରିଥିଲେ, ହେଲେ ଏଥିରେ ବିଫଳ ହୋଇଥିଲେ । କ୍ଲାର୍କଙ୍କ ମତରେ ପ୍ରଥମ ଟେଷ୍ଟରେ ଟ୍ରେବିସ ହେଡଙ୍କୁ ନଖେଳାଇ ଦଳ ବଡ ଭୁଲ କରିଥିଲା । ଆଉ ଦ୍ୱିତୀୟ ଟେଷ୍ଟରେ ଖେଳି ହେଡ୍ ଦଳ ପାଇଁ ସର୍ବାଧିକ ୪୬ ରନ କରିଥିଲେ ।
କ୍ଲାର୍କ ଆହୁରି କହିଥିଲେ କି ପ୍ରଥମ ଟେଷ୍ଟରେ ମୁଁ ବହୁତ ସ୍ୱିପ ସଟ୍ ଦେଖିଥିଲି । ଯେତେବେଳେ ତୁମେ ପାଳି ଆରମ୍ଭ କରୁଛି ସେତେବେଳେ ସ୍ୱିପ ସଟ ଖେଳିବା ସଠିକ ସମୟ ନୁହେଁ । ବଲ କମ ଉଠୁଥିବା ପିଚରେ ଅଷ୍ଟ୍ରେଲିଆର ଅଧା ଟିମ ସ୍ୱିପ ଆଉ ରିଭର୍ସ ସ୍ୱିପ ଖେଳି ଆଉଟ ହୋଇଛନ୍ତି । ଏହାସହ କ୍ଲାର୍କ ପ୍ୟାଟ କୁମିନ୍ସଙ୍କ ଫିଲ୍ଡିଂ ସଜେଇବା ଉପରେ ବି ପ୍ରଶ୍ନ କରିଛନ୍ତି । ସେ କହିଥିଲେ ମୁଁ ବିଶ୍ୱାସ କରିପାରୁନି ଆମ ରଣନୀତି ସହ କଣ ହେଉଥିଲା ।
ଅଷ୍ଟ୍ରେଲିଆ ବିପକ୍ଷରେ ଭାରତ ଖେଳୁଥିବା ୪ଟିକିଆ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଭାରତ ୨-୦ରେ ଆଗୁଆ ରହିଛି । ଅର୍ଥାତ ଭାରତକୁ ଏବେ ଜିତିବାକୁ ହେଲେ ଆଉ ଗୋଟିଏ ଟେଷ୍ଟ ମ୍ୟାଚ ଜିତିବାକୁ ହେବ । ଆଉ ଭାରତକୁ ଅଟକାଇବା ପାଇଁ ଅଷ୍ଟ୍ରେଲିଆ ଆଗାମୀ ୨ଟି ଟେଷ୍ଟରେ ବିଜୟୀ ହେବାକୁ ରଣନୀତି କରିବ । ତେବେ ତୃତୀୟ ଟେଷ୍ଟ ଉଭୟ ଦଳ ପାଇଁ ଗୁରୁତ୍ୱପୂର୍ଣ୍ଣ ରହିବ ।