ବଲିଉଡ ସିନେମାକୁ ନେଇ ଦେଶରେ ବଢୁଛି ରାଜନୀତି, ଜାଣନ୍ତୁ ‘ଦ କେରଳ ଷ୍ଟୋରୀ’ ନେଇ କାହାର ରହିଛି କେଉଁ ମତ
କନକ ବ୍ୟୁରୋ : ସିନେମା, ଫିଲ୍ମ ବା ଚଳଚିତ୍ର ଏହା ସର୍ବଦା ଲୋକମାନଙ୍କର ମନୋରଞ୍ଜନ ପାଇଁ ନିର୍ମାଣ କରାଯାଇଥାଏ । ବିଶେଷ ଭାବେ ଭାରତୀୟ ସିନେମା ପାରିବାରିକ କାହାଣୀ କିମ୍ବା ପ୍ରେମ କାହାଣୀକୁ ନେଇ ନିର୍ମାଣ ହୋଇଥାଏ । ହେଲେ କିଛିବର୍ଷ ହେବ ଭାରତୀୟ ସିନେମାର ଏକ ନୂଆ ରୂପ ଦେଖିବାକୁ ମିଳିଛି । କିଛି ସିନେ ପ୍ରଯୋଜକ ଉର୍ଦ୍ଦେଶ୍ୟ ପ୍ରଣୋଦିତ ଭାବେ ସିନେମା ନିର୍ମାଣ କରୁଛନ୍ତି । ଏହାକୁ ସେମାନେ ବିବାଦୀୟ କରି ଏଥିରୁ ଲାଭ ଉଠାଇବାକୁ ଚେଷ୍ଟା କରୁଛନ୍ତି । ଏହି କ୍ରମରେ ସବୁଠାରୁ ବେଶି ଚର୍ଚ୍ଚାକୁ ଆସିଥିଲା ବିବେକ ଅଗ୍ନିହୋତ୍ରିଙ୍କ କାଶ୍ମୀର ଫାଇଲ । ଏହି ସିନେମା କାଶ୍ମୀର ପଣ୍ଡିତଙ୍କ କାହାଣୀକୁ ନେଇ ନିର୍ମାଣ କରାଯାଇଥିଲା ଏହି ସିନେମାକୁ ନେଇ ସାରା ଦେଶରେ ବିବାଦ ଦେଖିବାକୁ ମିଳିଥିଲା । ଶାସକ ବିଜେପି ଓ ଅନ୍ୟକିଛି ଗୋଷ୍ଠୀ ଏହି ସିନେମାକୁ ସମର୍ଥନ କରିଥିବା ବେଳେ କିଛି ଗୋଷ୍ଠୀ ଏହାକୁ ବିରୋଧ କରିଥିଲା । ଏହି ବିବାଦ ନିଆଁରୁ ଉଠିଥିବା ଧୂଆଁ ଏବେ ଲିଭି ନଥିବା ବେଳେ ପୁଣି ଏକ ସିନେମାକୁ ନେଇ ଆରମ୍ଭ ହୋଇଯାଇଛି ବୟାନବାଜୀ । ବିପୁଲ ଅମୃତଲାଲ ଶାହାଙ୍କ ଦ୍ୱାରା ନିର୍ମାଣ ହୋଇଥିବା ଦ କେରଳ ଷ୍ଟୋରୀକୁ ନେଇ ବିବାଦ ଘନେଇବାରେ ଲାଗିଛି । ତେବେ ଆଜିର ସ୍ୱତନ୍ତ୍ର ଉପସ୍ଥାପନାରେ ଆମେ ଦେଖିବାକୁ କେରଳ ଷ୍ଟୋରୀକୁ ନେଇ କ’ଣ ରହିଛି କାହାର ମତ —–
Kanak News is now on WhatsApp
Join and get latest news updates delivered to you via WhatsApp
ଦ କେରଳ ଷ୍ଟୋରୀ ସିନେମାଟି ବିଶେଷ ଭାବେ କେରଳରୁ ଯୁବତୀମାନଙ୍କୁ ରୋଜଗାରର ଲୋଭ ଦେଖାଇ କିଭଳି ଧର୍ମାନ୍ତିକରଣ କରାଯାଉଛି । ଏହାସହ ସେମାନଙ୍କୁ ବିଦେଶ ନେଇ କିଭଳି ଆତଙ୍କୀ ସଂଗଠନ ଆଇଏସଆଇଏସ ସଂଗଠନରେ ସାମିଲ କରାଯାଉଛି ତା ଉପରେ ଆଧାରିତ । ଏହି ସିନେମାକୁ ନେଇ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ ପ୍ରତିକ୍ରିୟା ରଖିଛନ୍ତି ।
ପିନାରଇ ବିଜୟନ ଅଭିଯୋଗ ପରେ ଏହା ଉପରେ ପ୍ରତିକ୍ରିୟା ରଖିଛନ୍ତି ଦ କେରଳ ଷ୍ଟୋରୀର ନିର୍ଦ୍ଦେଶକ ସୁଦିପ୍ତୋ ସେନ । ସୁଦିପ୍ତୋ ସେନ କହିଛନ୍ତି କି ଏହି ସିନେମାରେ ୩୨ ହଜାର କେରଳ ମହିଳା ନିଖୋଜ ହୋଇଥିବାର କଥା ସେ ସିନେମାରେ ଉପସ୍ଥାପନ କରିଛନ୍ତି । ହେଲେ ସେମାନେ ସମେସ୍ତ ଆତଙ୍କୀ ସଂଗଠନ ଆଇଏସଆଇଏସରେ ଯୋଗ ଦେଇଥିବା କଥା ସିନେମାରେ କୁହାଯାଇ ନାହିଁ ବୋଲି ସେ ସ୍ପଷ୍ଟ କରିଛନ୍ତି ।
ବିବାଦ ସିନେମାର ନିର୍ଦ୍ଦେଶକ ଓ ପ୍ରଯୋଜକଙ୍କ ମଧ୍ୟରେ ସୀମିତ ନରହି ଏବେ ରାଜନୀତି ଆଖଡାରେ ସାମିଲ ହୋଇଛି । ସିନେମାକୁ ନେଇ ପ୍ରତିକ୍ରିୟା ରଖିଛନ୍ତି କେରଳ ରାଜ୍ୟପାଳ ଆରିଫ୍ ଖାନ । ଆରିଫ୍ ଖାନ ସିନେମାର ସତ୍ୟସତ୍ୟ ନେଇ ତଦନ୍ତ ହେଉ ବୋଲି ଦାବି କରିଛନ୍ତି ।
ସିନେମାକୁ ନେଇ ବିବାଦ ଏବେ ରାଜ୍ୟ ରାଜ୍ୟ ମଧ୍ୟରେ ଆରମ୍ଭ ହୋଇଯାଇଛି । ପ୍ରଥମେ ଏହି ସିନେମା ଉପରେ ପ୍ରମୋଦ କର ମଧ୍ୟପ୍ରଦେଶ ସରକାର ଛାଡ କରିଥିବା ବେଳେ ଏହି ସିନେମା ଉପରେ ପ୍ରତିବନ୍ଧକ ଲଗାଇଛନ୍ତି ପଶ୍ଚିମବଙ୍ଗ ସରକାର । କେବଳ ସେତିକି ନୁହେଁ ଉତ୍ତର ପ୍ରଦେଶ ସରକାର ମଧ୍ୟ ପ୍ରମୋଦ କର ଛାଡ କରିଛନ୍ତି, ହେଲେ ତାମିଲନାଡୁ ମଲ୍ଟିପ୍ଲେକ୍ସ ଆସୋସିଏନ ତରଫରୁ ଏହି ସିନେମା ଉପରେ ପ୍ରତିବନ୍ଧକ ଲଗାଯାଇଛି । ତେବେ ଏହି ସିନେମାକୁ ନେଇ କେନ୍ଦ୍ର ମନ୍ତ୍ରୀ ମନୋଜ ତିୱାରୀ ମଧ୍ୟ ମତ ରଖିଛନ୍ତି ।
କେରଳ ଷ୍ଟୋରୀ ସିନେମାକୁ ନେଇ କେରଳ ହାଇକୋର୍ଟଙ୍କ ରାୟ ଆସିବା ପରେ ଚଳଚିତ୍ର ନିର୍ମାତା ସିନେମା ଆରମ୍ଭରୁ ଏହା ସତ୍ୟ କାହାଣୀ ଉପରେ ଆଧାରିତ ନୁହେଁ ବୋଲି ସ୍ପଷ୍ଟ ଉଲ୍ଲେଖ କରିଛନ୍ତି । ତେଣୁ ଚଳଚିତ୍ରକୁ ଚଳଚିତ୍ର ଭଳି ମନୋରଞ୍ଜନ ପାଇଁ ଦେଖାଯାଉ । ଚଳଚିତ୍ରକୁ ନେଇ ଭୋଟ ବ୍ୟାଙ୍କ ପ୍ରସ୍ତୁତ କରିବାରୁ ନିବୃତ୍ତ ରୁହନ୍ତୁ ନେତା ।