୨ ହଜାର ଟଙ୍କାରେ ବିକ୍ରି ହେଉଛି ୭୫୦ ଟଙ୍କାର କଡକନାଥ କୁକୁଡା । ଜାଣନ୍ତୁ କାହିଁକି ଏଭଳି ଭାବେ କଡକନାଥ କୁକୁଡାର ହେଲା ମୂଲ୍ୟବୃଦ୍ଧି
କନକ ବ୍ୟୁରୋ : ବିଧାନସଭା ନିର୍ବାଚନକୁ ନେଇ ମଧ୍ୟପ୍ରଦେଶର ରାଜନୈତିକ ମାହୋଲ ସରଗରମ ରହିଛି । ନିର୍ବାଚନ ପ୍ରଚାର ଯେଭଳି ଭାବେ ଅଗାକୁ ବଢୁଛି, ସେହି ତୁଳନାରେ ମଧ୍ୟପ୍ରଦେଶ ଝାବୁଆର କଡକନାଥ କୁକୁଡାର ଦାମ ବୃଦ୍ଧି ପାଇବାରେ ଲାଗିଛି । ଝାବୁଆର ବିଶ୍ୱପ୍ରସିଦ୍ଧ କଡକନାଥ କୁକୁଡା ସାଧାରଣ ଦିନରେ ୭୫୦ ଟଙ୍କାରେ ବିକ୍ରି ହେଉଥିଲା । ଏବେ ସେହି କୁକୁଡାର ଦାମ ୧୫ ଶହରୁ ୨ ହଜାର ଟଙ୍କା ମଧ୍ୟରେ ବିକ୍ରି ହେଉଛି । ଏହି କାରଣରୁ ଏବେ କଡକନାଥ କୁକୁଡା ଚାଷ କରୁଥିବା ଚାଷୀ ଓ ଏହାକୁ ରୋଷେଇ କରି ହୋଟେଲରେ ବିକ୍ରି କରୁଥିବା ବ୍ୟବସାୟୀ ଉଭୟ ଲାଭବାନ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ହେଲେ ହଠାତ୍ କଡକନାଥ କୁକୁଡାର ଦାମ କାହିଁକି ବଢିଗଲା ବୋଲି ପ୍ରଶ୍ନର ଉତ୍ତର ଦେଇ ଜଣେ କଡକନାଥ କୁକୁଡା ବିକ୍ରେତା କହିଛନ୍ତି କି, ଏବେ ମଧ୍ୟପ୍ରଦେଶରେ ବିଧାନସଭା ନିର୍ବାଚନ ହେବାକୁ ଯାଉଛି ଓ ରାଜ୍ୟରେ ଶୀତ ଲହର ଚାଲିଛି । ନିର୍ବାଚନ ଥିବାରୁ ରାଜ୍ୟକୁ ବହୁପରିମାଣର ବାହାର ନେତା ଓ କର୍ମୀ ନିର୍ବାଚନ ପ୍ରଚାରରେ ଆସୁଛନ୍ତି । ସେମାନେ ମଧ୍ୟପ୍ରଦେଶର ପ୍ରସିଦ୍ଧ କଡକନାଥ କୁକୁଡା ଖାଇବାକୁ ପସନ୍ଦ କରୁଛନ୍ତି । ଫଳରେ ଆବଶ୍ୟକତା ବୃଦ୍ଧି ପାଉଛି ଓ ଏହି କାରଣରୁ କଡକନାଥ କୁକୁଡାଙ୍କ ମୂଲ୍ୟ ମଧ୍ୟ ବୃଦ୍ଧି ପାଇବାରେ ଲାଗିଛି ।
ଝାବୁଆ କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ଡାକ୍ତର ଚନ୍ଦନ ରାୟ କହିଛନ୍ତି କି କଡକନାଥ କୁକୁଡା ମାଂସରେ ସର୍ବାଧିକ ପରିମାଣର ଆଇରନ ଓ ମେଲୋନିନ୍ ରହିଥାଏ । ଏହାକୁ ଖାଇଲେ ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇଥାଏ ।