ଅପହୃତ କୋବ୍ରା କମାଣ୍ଡୋଙ୍କୁ ଛାଡିବା ପୂର୍ବରୁ କେମିତି ହୋଇଥିଲା ପ୍ରଜାକୋର୍ଟରେ ବିଚାର । ଶହଶହ ଲୋକଙ୍କ ଉପସ୍ଥିତିରେ ୪ ଘଂଟା ଧରି ମେଳି କରିଥିଲେ ମାଓବାଦୀ ।
ବିଚାର ପରେ ଯବାନ ରାକେଶ୍ୱର ସିଂ ମନହାସଙ୍କୁ ଛାଡିବାକୁ ହୋଇଥିଲା ନିଷ୍ପତ୍ତି
କନକ ବ୍ୟୁରୋ: ଗୁରୁବାର ଓଡିଶା ସୀମା ଛତିଶଗଡରେ ଯେଉଁ କଥା ସାମ୍ନାକୁ ଆସିଥିଲା । ତାହା ବଲିଉଡ ବା ହଲିଉଡ ସିନେମାର ଦୃଶ୍ୟ ଠାରୁ କମ ରୋଚକ ନଥିଲା । ଫିଲ୍ମର ଦୃଶ୍ୟ ଭଳି ସବୁକିଛି ଏଠାରେ ଘଟିଥିଲା । ଫିଲ୍ମ ପରଦା ବାହାରେ ଏଭଳି ଦୃଶ୍ୟକୁ ଦେଖିବା ସଭ୍ୟ ଗଣତନ୍ତ୍ର ପାଇଁ ଏକ ବଡ ବିଡମ୍ବନା ବୋଲି କୁହାଯାଇପାରେ ହେଲେ ତାହା ହିଁ ସତ ।
Kanak News is now on WhatsApp
Join and get latest news updates delivered to you via WhatsApp
ବସ୍ତର ରେଂଜର ଘଂଚ ଜଙ୍ଗଲରେ ଦିନ ପ୍ରାୟ ୧୨ଟା ବେଳେ ମାଓବାଦୀଙ୍କ ଡାକରା ପାଇ ଏକାଠି ହୋଇଥିଲେ ଶହ ଶହ ଗ୍ରାମବାସୀ । ଆଉ ଆରମ୍ଭ ହୋଇଥିଲା ପ୍ରଜାକୋର୍ଟ । ଏହି ପ୍ରଜାକୋର୍ଟରେ ସାମିଲ ହୋଇଥିଲେ ମଧ୍ୟସ୍ଥ ଭୂମିକା ତୁଲାଉଥିବା ପ୍ରଦ୍ମଶ୍ରୀ ଧର୍ମପାଲ ସଇନି ଓ ଗଣ୍ଡାବାନା ସମାଜର ଅଧ୍ୟକ୍ଷ ଏନ.ଏମ ବରେୟା ସମେତ ୪ଜଣ ଓ ଅନ୍ୟ ୭ଜଣ ସ୍ଥାନୀୟ ସାମ୍ବାଦିକ । କିଛି ସମୟ ପରେ ପ୍ରଜାକୋର୍ଟରେ ବନ୍ଦୀ ଅବସ୍ଥାରେ ରାକେଶ୍ୱରଙ୍କୁ ହାଜର କରିଥିଲେ ମାଓବାଦୀ । ତାପରେ ପ୍ରଜାକୋର୍ଟରେ ସାମିଲ ହୋଇଥିବା ଶହ ଶହ ଲୋକଙ୍କୁ ଭାଷଣ ଦେଇଥିଲେ ମାଓନେତା ।
ଏହି ସମୟରେ ମତ ରଖିଥିଲେ ସାମିଲ ହୋଇଥିବା କିଛି ସ୍ଥାନୀୟ ଲୋକେ । ଦୀର୍ଘ ୪ ଘଂଟା ଧରି ଜଙ୍ଗଲ ଭିତରେ ଚାଲିଥିଲା ଆଲୋଚନା । ଆଲୋଚନାବେଳେ ସ୍ଥାନୀୟ ଲୋକ ମାଓବାଦୀଙ୍କ କବଜାରେ ଥିବା ଯବାନଙ୍କୁ ନଛାଡିବା ପାଇଁ କହିଥିଲେ । କୁହାଯାଉଛି, ଜଙ୍ଗଲରେ ରହୁଥିବା ଆଦିବାସୀଙ୍କ ଉପରେ ପୋଲିସର ଜୁଲମ ଯୋଗୁଁ ଯବାନଙ୍କୁ ନଛାଡିବାକୁ ସ୍ଥାନୀୟ ଲୋକ ଦାବି କରିଥିଲେ ।
ଏହି ସମୟରେ ରାକେଶ୍ୱରଙ୍କ ମୁକ୍ତିପାଇଁ ତାଙ୍କ ପତ୍ନି ଓ କୁନି ଝିଅ କରିଥିବା କାକୁତି ମିନତିର ଏକ ଭିଡିଓ ମାଓବାଦୀଙ୍କୁ ଦେଖାଇଥିଲେ ମଧ୍ୟସ୍ଥିି । ଆଉ ରାକେଶ୍ୱରଙ୍କୁ ଛାଡି ଦେବା ପାଇଁ ମଧ୍ୟସ୍ଥିମାନେ ଅନୁରୋଧ କରିଥିଲେ । ମଧ୍ୟସ୍ଥିଙ୍କ ଅନୁରୋଧ, ରାକେଶଙ୍କ ପରିବାରର ବିନତିର ଭିଡିଓ ଦେଖିବା ପରେ ରାକେଶ୍ୱରଙ୍କୁ ନିସର୍ତ୍ତ ଭାବେ ଛାଡିବାକୁ ନିଷ୍ପତି ନେଇଥିଲେ ମାଓବାଦୀ । କିନ୍ତୁ କହିଥିଲେ, ଆମେ ଯେପରି ଢଙ୍ଗରେ ଯବାନ ରାକେଶ୍ୱର ସିଂହୁକୁ ଛାଡୁଛୁ ଯଦି ପୋଲିସ ହୋଇଥାନ୍ତା ତା ହେଲେ ଏହି କାମ କରିନଥାନ୍ତା । ବରଂ ଆମ ଲୋକଙ୍କୁ ଗୁଳି କରି ମାରିଥାନ୍ତା ।