ଚର୍ଚ୍ଚାରେ‘ଗୁଗୁଲ୍ ଗୋଲ୍ଡେନ୍ ବାବା’ । ମୁହଁରେ ସୁନାର ମାସ୍କ, ପାଦରେ ପିନ୍ଧୁଛନ୍ତି ରୂପାର ଜୋତା
କନକ ବ୍ୟୁରୋ: ଆପଣ ସୁନାରେ ଛାଉଣୀ କିଛି ଲୋକଙ୍କୁ ପୂର୍ବରୁ ସୋସିଆଲ ମିଡିଆରେ ଦେଖିଥିବେ । ହେଲେ ଜଣେ ବାବା ବୋଲାଉଥିବା ବ୍ୟକ୍ତି ସୁନାରେ ଛାଉଣୀ ହେବା ଘଟଣା ଏବେ ସାରା ଦେଶରେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛି । ଏମିତି ଜଣେ ବାବା ହେଉଛନ୍ତି ୟୁପି କାନପୁରର ‘ ଗୁଗୁଲ୍ ଗୋଲ୍ଡେନ୍ ବାବା’ ।
ଭରା ଭରା ସୁନା ପିନ୍ଧୁଥିବା ମ୍ୟୁଜିକ୍ ଡାଇରେକ୍ଟର ବାପୀ ଲାହେରୀଙ୍କ ସୁନାଠାରୁ ବି ଅଧିକ ସୁନା ଏହି ବାବାଙ୍କ ପାଖରେ । ବାସ୍ତବରେ କାନପୁରର କାକାଦେବରେ ରହୁଥିବା ମନୋଜ ସେଙ୍ଗର ଗୁଗୁଲ ଗୋଲ୍ଡେନ ବାବା ନାମରେ ଜଣାଶୁଣା । ସୁନା ପ୍ରତି ତାଙ୍କର ଅହେତୁକ ଆସକ୍ତି ହେତୁ ସେ ସର୍ବଦା ଚର୍ଚ୍ଚାରେ ରୁହନ୍ତି । ମୁହଁରେ କରୋନାଠାରୁ ସୁରକ୍ଷା ପାଇଁ ପିନ୍ଧୁଛନ୍ତି ସୁନାର ମାସ୍କ, ଏହାର ଦାମ ୫ଲକ୍ଷରୁ ଅଧିକ । ଏହି ଥ୍ରୀ ଲେୟାର ମାସ୍କ ୩ ବର୍ଷ ପାଇଁ ସୁରକ୍ଷା ଦେବ ।
Kanak News is now on WhatsApp
Join and get latest news updates delivered to you via WhatsApp
ବେକରେ ଦଉଡି ଭଳି ଚେନ୍, ତା ସାଙ୍ଗକୁ ସୁନାର ମୋଟାମୋଟା ଡଉଁରିଆ, ହାତରେ ସୁନାର ବଳା ସାଙ୍ଗକୁ ସୁନାର ଗେଣ୍ଡାଳିଆ ମୁଦି । ଖାଲି ଏତିକି ନୁହେଁ ପାଦରେ ରୂପାର ଜୋତା, ଯାହାର ଓଜନ ୪.୫ କେଜି । ବାବା ହୋଇ ବି ସୁନା ଅଳଙ୍କାର ପ୍ରତି ଏତେ ଲୋଭ ଯୋଗୁଁ ସବୁବେଳେ ସମାଲୋଚନାର ଶିକାର ହୋଇ ଆସୁଛନ୍ତି ଗୁଗୁଲ ବାବା । ହେଲେ ଲୋକଙ୍କ ସମାଲୋଚନାକୁ ତାଙ୍କର ନିଘା ନାହିଁ ବରଂ ସେ କୁହନ୍ତି ଯେ, ପୂର୍ବରୁ କ୍ଷତ୍ରିୟମାନେ ସୁନା ପିନ୍ଧିଆସୁଛନ୍ତି। ସେ ମଧ୍ୟ ତାଙ୍କର ପୂର୍ବପୁରୁଷଙ୍କ ପରି ସୁନା ପିନ୍ଧୁଛି ।
ଗୁଗୁଲ୍ ଗୋଲ୍ଡେନ୍ ବାବା ସର୍ବଦା ପ୍ରାୟ ୪ କିଲୋଗ୍ରାମ ସୁନା ପିନ୍ଧନ୍ତି । ଏଥିରେ ୨୬୧ ଗ୍ରାମ ଶଙ୍ଖ, ୧୦୧ ଗ୍ରାମ ମାସ୍କ, ଶିବ କାଭାଚ, ଦୁର୍ଗା ମା’ଙ୍କ ଚିତ୍ର, ମାଛ ଇତ୍ୟାଦି ରହିଛି । ଏହା ବ୍ୟତୀତ ସେ ସବୁବେଳେ ସୁନାରେ ନିର୍ମିିତ ଲଡୁ ଗୋପାଳଙ୍କୁ ନିଜ ସହ ରଖିଥାନ୍ତି । ଯୁଆଡେ ଗଲେ ଠାକୁରଙ୍କ ଏହି ସବର୍ଣ୍ଣ ପ୍ରତୀମାକୁ ନିଜ ସହ ନେଇ ଯାନ୍ତି । ଏହା ପୂର୍ବରୁ ସେ ତାଙ୍କ ରିଭଲଭର ପାଇଁ ଏକ ସୁନା ଆବରଣ ମଧ୍ୟ କରିଥିଲେ ଯାହା ଆଲୋଚନାର ବିଷୟ ପାଲଟିଥିଲା ।
ସୁନା ପ୍ରତି ଗୁଗୁଲ୍ ଗୋଲ୍ଡେନ୍ ବାବାଙ୍କ ଆସକ୍ତି ତାଙ୍କ ପାଇଁ ଅନେକ ଥର ସମସ୍ୟା ସୃଷ୍ଟି କରିଛି । ତାଙ୍କୁ ଅନେକ ଥର ଆକ୍ରମଣ ଚେଷ୍ଟା କରାଯିବା ସହ ତାଙ୍କୁ ଅନେକ ଥର ଧମକ ଦିଆଯାଇଛି, ପୂର୍ବରୁ ସେ ପାଦରେ ବି ସୁନା ପିନ୍ଧୁଥିବାରୁ ଅନେକ ଥର ଦୁର୍ବୃତ୍ତଙ୍କ ଟାର୍ଗେଟରେ ମଧ୍ୟ ରହିଆସିଛନ୍ତି ବାବା ମନୋଜ ସେଙ୍ଗର । ତାଙ୍କୁ ଅପରାଧୀଙ୍କ ଠାରୁ ବିପଦ ଥିବାରୁ ସେ ଖୁବ୍ ଶିଘ୍ର ଏକ ସୁନାର କବଚ ତିଆରି କରି ପିନ୍ଧିବେ ବୋଲି କହିଛନ୍ତି ।
ଆମ ଦେଶରେ ଆହୁରି ଅନେକ ସୁନା ପ୍ରେମୀ ଅଛନ୍ତି, ଯେଉଁମାନେ ସର୍ବଦା ଅନେକ କିଲୋ ସୁନା ପିନ୍ଧି ଚର୍ଚ୍ଚାରେ ରହିଛନ୍ତି । ସେମାନଙ୍କ ମଧ୍ୟରୁ ମହାରାଷ୍ଟ୍ରର ସନ୍ନି ୱାଘଚୌର ଯିଏ ଜୋତାଠାରୁ ଆରମ୍ଭ କରି ମୋବାଇଲ୍ ଫୋନ୍ ସବୁଥିରେ ସୁନା ବ୍ୟବହାର କରନ୍ତି । ଆଉ ଜଣେ ହେଉଛନ୍ତି ଦତ୍ତା ପଗେଙ୍କ ଯିଏ ୩.୫ କିଲୋର ସୁନା ସାର୍ଟ ପିନ୍ଧନ୍ତି । ଗିନିଜବୁକରେ ତାଙ୍କର ସୁନା ସାର୍ଟ ମଧ୍ୟ ରେକର୍ଡ କରାଯାଇଛି ।