ଫିଲ୍ମ ଷ୍ଟାଇଲରେ ହତ୍ୟା ପରେ ଆତ୍ମହତ୍ୟାର ରୂପ ଦେଇ ଖସିଯିବାକୁ ବସିଥିଲା ଜଲ୍ଲାଦ ବାପା । ଅନରକିଲିଂର ସତ ସାମ୍ନାକୁ ଆସିବା ପରେ କୋର୍ଟ ଚାଲାଣ କଲା ପୋଲିସ ।
କନକ ବ୍ୟୁରୋ: ଫିଲ୍ମ ଷ୍ଟାଇଲରେ ହତ୍ୟା । ହତ୍ୟା ପରେ ଆତ୍ମହତ୍ୟାର ରୂପ ଦେଇ ଖସିଯିବାକୁ ଉଦ୍ୟମ ବେଳେ ପୋଲିସ ହାତରେ ଧରାପଡ଼ିଛନ୍ତି ଅଭିଯୁକ୍ତ । ତେବେ ପୂରା ଘଟଣାଟି ଥିଲା କିଛି ଏମିତି… କଳାହାଣ୍ଡି ଧର୍ମଗଡ଼ ଥାନା ଅନ୍ତର୍ଗତ ବାଞ୍ଜିପଦର ଗାଁର ନାବାଳକ ସୁନୀଲ ପଟେଲ ଓ ନାବାଳିକା ଜେମାମଣି ପଟେଲଙ୍କ ମଧ୍ୟରେ ୨ ବର୍ଷ ହେଲା ପ୍ରେମ ସମ୍ପର୍କ ଥିଲା । ହେଲେ ଏ ସମ୍ପର୍କକୁ ସୁନୀଲଙ୍କ ପରିବାର ଲୋକ ସମର୍ଥନ କରୁଥିବା ବେଳେ ନାବାଳିକଙ୍କ ପରିବାର ଲୋକ ସମର୍ଥନ କରୁନଥିଲେ । ଗତ ୩୦ ତାରିଖରେ ଉଭୟ ଘର ଛାଡ଼ି ଚାଲିଯାଇଥିଲେ । ଗାଁରୁ ବାହାରି ଉଭୟ ଗୋତଗୁଡ଼ା ଗାଁରେ ଥିବା ଏକ ପରିତ୍ୟକ୍ତ ମିଲରେ ଲୁଚି ରହିଥିଲେ । ଏ ଖବର ନାବାଳିକାର ବାପା ଜାଣିବା ପରେ ତାଙ୍କ କାକା ଓ ଭିଣୋଇକୁ ସାଙ୍ଗ ନେଇ ପ୍ରେମୀ ଯୁଗଳ ରହୁଥିବା ସ୍ଥାନରେ ପହଞ୍ଚି ଉଭୟଙ୍କୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି । ହତ୍ୟା କରିବା ପରେ ସେଠାରେ ଏକ ଗଛରେ ଝୁଲନ୍ତା ଅବସ୍ଥାରେ ଦୁହିଁଙ୍କୁ ଟାଙ୍ଗିଦେଇ ଆତ୍ମହତ୍ୟାର ରୂପ ଦେଇଥିଲା ଜଲ୍ଲାଦ ବାପା ।
Kanak News is now on WhatsApp
Join and get latest news updates delivered to you via WhatsApp
ହେଲେ କଥା ଏତିକିରେ ସରିନଥିଲା ନାବାଳିକା ଝିଅ ନିଖୋଜ ଥିବା ନେଇ ଧର୍ମଗଡ଼ ଥାନାରେ ଲିଖିତ ଅଭିଯୋଗ କରିଥିଲା ବାପା । ଏପଟେ ମୃତଦେହରୁ ଦୁର୍ଗନ୍ଧ ବାହାରିବା ପରେ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ଗଳିତ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଥିଲା । ଅନ୍ୟପଟେ ନାବାଳକର ପରିବାର ଲୋକ ଏହା ଆତ୍ମହତ୍ୟା ନୁହେଁ ହତ୍ୟା ବୋଲି ନାବାଳିକାଙ୍କ ପରିବାର ଲୋକଙ୍କ ନାରେ ଅଭିଯୋଗ ଆଣିଥିଲେ । ତଦନ୍ତ ପରେ ସବୁ ସତ ସାମ୍ନାକୁ ଆସିଥିଲା ନାବାଳିକାର ବାପାକୁ ପ୍ରଥମେ ଗିରଫ କରିବା ସହ ତାଙ୍କ ଭିଣେଇ ଓ କକାଙ୍କ ଗିରଫ କରି ପୋଲିସ କୋର୍ଟ ଚାଲାଣ କରିଛି ।