କନକ ବ୍ୟୁରୋ : ଏ କେମିତିକା ମୃତ୍ୟୁ । ଦୁଃଖ କଣ ଏମିତି ଆସେ । ଏକାଥରେ ବାପା-ପୁଅଙ୍କ ଜୀବନ ନେଇଯାଏ । ମାଛ ମାରିବାକୁ ଯାଇଥିବା ବେଳେ ସ୍ୱାମୀ ଓ ଶ୍ୱଶୁରଙ୍କ ମୃତ୍ୟୁ ହୋଇଥିବା ବେଳେ ଘରକୁ ଆସିଛି ଶିଶୁକନ୍ୟା । ଏପଟେ ଝିଅ ଜନ୍ମ ସେପଟେ ବାପା ଓ ଜେଜେଙ୍କ ମୃତ୍ୟୁ । ଝିଅକୁ ଦେଖିବା ଆଗରୁ ବଜ୍ରାଘାତରେ ବାପାଙ୍କ ମୃତ୍ୟୁ ହୋଇଛି । ଖୋର୍ଦ୍ଧା ଜିଲ୍ଲା ବାଲୁଗାଁ ସନ୍ୟାସୀ ନଗରରେ ଏମିତି ଏକ ଦୁଃଖଦ ଘଟଣା ଘଟିଯାଇଛି । ନାତୁଣୀ କୁଆଁ କୁଆଁ କାନ୍ଦ ଶୁଣିବା ଆଗରୁ ପୁଅ ସହ ଗୋଟିଏ ଡଙ୍ଗାରେ ପ୍ରାଣ ହରାଇଛନ୍ତି ଜେଜେବାପା । ଚିଲିକାରେ ବଜ୍ରପାତ ହେବାରୁ ମାଛ ଧରିବା ବେଳେ ଡଙ୍ଗାରେ ବାଲୁଗାଁ ସନ୍ୟାସୀ ନଗରର ୬୦ ବର୍ଷିୟ ବିଧାନ ବିଶ୍ୱାସ ଓ ତାଙ୍କ ପୁଅ ୩୦ ବର୍ଷିୟ ଉତ୍ତମ ବିଶ୍ୱାସଙ୍କ ମୃତ୍ୟୁ ହୋଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସବୁଦିନ ଭଳି ରବିବାର ସନ୍ଧ୍ୟା ୫ଟାରେ ଚିଲିକାକୁ ମାଛ ମାରିବା ପାଇଁ ବାପ ପୁଅ ନିଜସ୍ୱ ଡ଼ଙ୍ଗାରେ ବାହାରି ଯାଇଥିଲେ । ସୋମବାର ସକାଳ ୯ଟା ଯାଏଁ ବିଧାନ ଓ ଉତମ ନଫେରିବାରୁ ପରିବାର ଲୋକ ଚିନ୍ତାରେ ପଡିଯାଇଥିଲେ । ସଂପର୍କୀୟମାନେ ଚିଲିକା ଜଳରାଶିରେ ଖୋଜାଖୋଜି କରିଥିଲେ । ଖୋଜୁ ଖୋଜୁ ଚିଲିକା କୂଳଠାରୁ ପ୍ରାୟ ୫ଶହ ମିଟର ଦୂରରେ ଡ଼ଙ୍ଗାଟି ଭାସୁଥିବା ଦେଖିବାକୁ ମିଳିଥିଲା । ସେହି ଡଙ୍ଗାରେ ବାପା ପୁଅଙ୍କ ମୃତଦେହ ପଡିଥିବା ଦେଖି ପରିବାର ଲୋକ ଭାଙ୍ଗି ପଡିଛନ୍ତି ।
ସବୁଠାରୁ ଦୁଃଖଦ ଘଟଣାଟି ହେଉଛି, ଗତକାଲି ରାତିରେ ଉତମଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସ୍ତ୍ରୀ ସାମଲି ବିଶ୍ୱାସ ଏକ ଶିଶୁକନ୍ୟାକୁ ଜନ୍ମ ଦେଇଛନ୍ତି । କୁନି ଝିଅଟି ବାପାଙ୍କ ମୁହଁ ଦେଖିବା ଆଗରୁ ବାପ ଛେଉଣ୍ଡ ହୋଇଯାଇଛି ।