‘ଦଳିତ ବୋଲି ଖାଦ୍ୟ ଫିଙ୍ଗିଦେଲେ, ମୁହଁକୁ ଛେପ ପକାଇଲେ ଗ୍ରାହକ’ । ଅଭିଯୋଗ କଲେ ଡେଲିଭରୀ ବୟ ।
କନକ ବ୍ୟୁରୋ: ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌରେ ଖାଦ୍ୟ ଡେଲିଭରୀକୁ ନେଇ ଆସିଛି ଏକ ସଙ୍ଗୀନ ଅଭିଯୋଗ । ଜୋମାଟୋ ଡେଲିଭରୀ ବୟ ଜଣକ ଦଳିତ ହୋଇଥିବାରୁ ଖାଦ୍ୟ ଫିଙ୍ଗିଦେବା ସହ ଗ୍ରାହକ ଅମାନୁଷିକ ଭାବେ ବ୍ୟବହାର କରି ତାଙ୍କୁ ମାଡ ମାରିଥିବା ଅଭିଯୋଗ ହୋଇଛି । ତେବେ ପୋଲିସ ଏ ବାବଦରେ ଏଯାଏଁ କାହାରି ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲେ ବି ମାମଲା ଦାଏର କରି ଯାଞ୍ଚ ଜାରି ରଖିଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଲକ୍ଷ୍ନୌ ଆସିୟାନା ଇଲାକାରେ ଜୋମାଟୋ ଡେଲିଭରୀ ବୟ ବିନୀତ ରାୱତ୍ ଏଠିକାର ଜଣେ ଗ୍ରାହକ ଅଜୟ ସିଂଙ୍କ ଉପରେ ଗୁରୁତର ଅଭିଯୋଗ ଆଣିଛନ୍ତି । ଆସିୟାନାରେ ରହୁଥିବା ଅଜୟ ସିଂ ଜୋମାଟୋରୁ ଖାଦ୍ୟ ଅର୍ଡର କରିଥିଲେ । ଶନିବାର ଡେଲିଭରୀ ବୟ ବିନୀତ ରାୱତ୍ ଖାଦ୍ୟ ନେଇ ପହଞ୍ଚିଥିଲେ । ଅଜୟ ସିଂ ଘରୁ ବାହାରିଥିଲେ ଏବଂ ଯେତେବେଳ ବୀନିତ ଦଳିତ ଯୁବକ ବୋଲି ଜାଣିବାକୁ ପାଇଥିଲେ ତାଙ୍କଠାରୁ ଖାଦ୍ୟ ଆଣି ଫୋପାଡି ଦେଇ୍ଥିଲେ । ଏବଂ ବିନୀତଙ୍କ ମୁହଁକୁ ପାନ ଛେପ ପକାଇଥିଲେ । ବିନୀତ ଅଭିଯୋଗ କରିବାକୁ ଅଜୟ ଓ ତାଙ୍କ ପରିବାର ଲୋକ ମିଶି ତାଙ୍କୁ ମାଡ ମାରିଥିବା ଅଭିଯୋଗ ହୋଇଛି ।
ଅନ୍ୟପଟେ ଏହି ଘଟଣାରେ ପାଲଟା ଅଭିଯୋଗ କରିଛନ୍ତି ଗ୍ରାହକ ଅଜୟ ସିଂ । ତାଙ୍କ କହିବା ମୁତାବକ, ଡେଲିଭରୀ ବୟ ପହଞ୍ଚିବା ବେଳକୁ ସେ ତାଙ୍କର ଜଣେ ବନ୍ଧୁଙ୍କୁ ଛାଡିବାକୁ ବାହାରିଥିଲେ । ଡେଲିଭରୀ ବୟ ତାଙ୍କୁ ହିଁ ତାଙ୍କ ଘର ଠିକଣା ପଚାରିଥିଲା । ପାଟିରେ ପାନ ଥିବାରୁ ଛେପ ପକାଇ କିଛି କହିବାକୁ ଗଲାବେଳକୁ ଛେପ ଛିଟକା ଡେଲିଭରୀ ବୟ ବିନୀତଙ୍କ ଉପରେ ପଡିଯାଇଥିଲା । ଏହାକୁ ନେଇ ସେ ଅଜୟଙ୍କୁ ଅସଭ୍ୟ ଗାଳିଗୁଲଜ କରିଥିଲେ । ଏହାକୁ ନେଇ ତାଙ୍କ ଘର ଲୋକ ବିନୀତଙ୍କ ଉପରକୁ ହାତ ଉଠାଇଥିଲେ ।
ପୋଲିସ କମିଶନର ଡିକେ ଠାକୁରଙ୍କ କହିବା ମୁତାବକ, ଝଗଡା ସମୟରେ ବିନୀତ ତୁରନ୍ତ ଟୋଲ ଫ୍ରି ନମ୍ବର ୧୧୨ କୁ ଡାଏଲ କରିଥିଲା । ଏହାର ଟିମ୍ ସେଠାରେ ପହଞ୍ଚି ଦୁଇ ଜଣଙ୍କୁ ଥାନାକୁ ଯିବାକୁ କହିଥିଲେ ବି ବିନୀତ କିନ୍ତୁ ଯାଇନଥିଲା । ପରେ ନିଜ ଓକିଲଙ୍କୁ ନେଇ ଗ୍ରାହକ ଅଜୟ ସିଂଙ୍କ ବିରୋଧରେ ଦଳିତ ମାମଲା ଦାଏର କରିଥିଲା । ଏହି ଘଟଣାରେ ଏବେ ପୋଲିସ ଯାଞ୍ଚ ଚଳାଇଛି ।