ପୁରୀ ସ୍ୱର୍ଗଦ୍ୱାରରୁ ହଟିଲା ବିଜୁ ସମାଧି ସ୍ମାରକ : ଆଧୁନିକୀକରଣ ପାଇଁ ଭାଙ୍ଗିଲା ପ୍ରଶାସନ, ପୂର୍ବରୁ ସମାଧି ଉଛେଦ ପାଇଁ ଘୋଷଣା କରିଥିଲେ ମୁଖ୍ୟମନ୍ତ୍ରୀ
କନକ ବ୍ୟୁରୋ : ସ୍ୱର୍ଗଦ୍ୱାରରୁ ହଟିଲା ବିଜୁ ସମାଧି । ଆଧୁନିକୀକରଣ ପାଇଁ ବିଜୁ ସମାଧିକୁ ହଟାଇ ଦେଇଛି ପ୍ରଶାସନ । ସ୍ୱର୍ଗଦ୍ୱାରର ଆଧୁନିକୀରଣ ପାଇଁ ବିଜୁ ସମାଧିକୁ ହଟାଇବାକୁ ପୂର୍ବରୁ ଘୋଷଣା କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିପାଇଁ ମୁଖ୍ୟମନ୍ତ୍ରୀ ୫ କୋଟି ଟଙ୍କାର ଅନୁଦାନ ଦେଇଛନ୍ତି । କିଛ ଦିନ ହେବ ସ୍ୱର୍ଗଦ୍ୱାର ଉଚ୍ଚେଦ ଆରମ୍ଭ ହେଉଥିବା ବେଳେ ଅପ୍ରୀତିକର ପରିସ୍ଥିତିକୁ ନଜର ରଖି ରାତି ଅଧିଆ ବିଜୁ ସମାଧିକୁ ହଟାଯାଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସ୍ୱର୍ଗଦ୍ୱାର ବିକାଶ ପାଇଁ ହୋଇଥିବା ସମୀକ୍ଷା ବୈଠକ ପରେ ବିଜୁ ସମାଧିକୁ ହଟାଇବାକୁ ନିଷ୍ପତି ନେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନବୀନ କହିଥିଲେ, ବିଜୁ ବାବୁ କୋଟି କୋଟି ଓଡ଼ିଆଙ୍କ ହୃଦୟରେ ଅଛନ୍ତି । ସ୍ୱର୍ଗଦ୍ୱାରରେ ବିଜୁବାବୁଙ୍କ ଉଦ୍ଦେଶ୍ୟରେ ଯାହା କିଛି ଥିଲା, ସେ ସବୁ ଏବେ ଓଡ଼ିଶାବାସୀଙ୍କ ସେବାରେ ଲାଗିବ ବୋଲି ନବୀନ କହିଥିଲେ ।
ସୂଚନାଯୋଗ୍ୟ ୧୯୯୭ ଏପ୍ରିଲ ୧୭ରେ ବିଜୁ ପଟ୍ଟନାୟକଙ୍କ ଦେହାନ୍ତ ପରେ ସ୍ୱର୍ଗଦ୍ୱାରରେ ତାଙ୍କର ଅନ୍ତିମ ସଂସ୍କାର କରାଯାଇଥିଲା । ଆଉ ପରବର୍ତ୍ତୀ ସମୟରେ ସ୍ୱର୍ଗଦ୍ୱାରର ପ୍ଲଟ ନମ୍ବର ୧୪୫୨ ଓ ୧୪୫୫ ମଧ୍ୟରେ ବିଜୁ ବାବୁଙ୍କର ସମାଧି କରାଯାଇଥିଲା । ତେବେ ପୁରୀ ସମେତ ସ୍ୱର୍ଗଦ୍ୱାରର ସୌନ୍ଦର୍ୟ୍ୟକରଣ ପାଇଁ ଯେତେବେଳେ ରାଜ୍ୟ ସରକାର ଅଣ୍ଟା ଭିଡିଥିଲେ ସେତେବେଳେ ବିଜୁଙ୍କ ସମାଧି ଉଚ୍ଛେଦ କରିବାକୁ ମଧ୍ୟ ଦାବି ଉଠିଥିଲା । ବିଭିନ୍ନ ସଙ୍ଗଠନ ଗୁଡିକ ପକ୍ଷରୁ ଏହି ଦାବି ଉଠିଥିବା ବେଳେ ଏହାକୁ କିଛି ସଙ୍ଗଠନ ବିରୋଧ ମଧ୍ୟ କରିଥିଲେ । ଆଉ ଏସବୁ ଭିତରେ ସ୍ୱର୍ଗଦ୍ୱାରରୁ ବିଜୁଙ୍କ ସମାଧି ହଟାଇବା ପାଇଁ ମୁଖ୍ୟମନ୍ତ୍ରୀ ନିଷ୍ପତ୍ତି ନେଇଥିଲେ । ଆଉ ଏବେ ହଟିସାରିଛି ବିଜୁ ସମାଧି ।