ବାଲେଶ୍ୱରରେ ଖୁବଶୀଘ୍ର ପ୍ରତିଷ୍ଠା ହୋଇପାରେ ଟଙ୍କା ଛପା କାଗଜ କାରଖାନା । ମୁଖ୍ୟମନ୍ତ୍ରୀଙ୍କୁ ଭେଟିଲେ ବ୍ୟାଙ୍କ୍ ନୋଟ୍ ପେପର ଇଣ୍ଡିଆର ଏମଡି ।
କନକ ବ୍ୟୁରୋ: ମୁଖ୍ୟମନ୍ତ୍ରୀଙ୍କୁ ଭେଟିଲେ ବ୍ୟାଙ୍କ୍ ନୋଟ୍ ପେପର୍ ଇଣ୍ଡିଆ ପ୍ରାଇଭେଟ୍ ଲିମିଟେଡର ପରିଚାଳନା ନିର୍ଦ୍ଦେଶକ । ବୁଧବାର ନବୀନ ନିବାସରେ ମୁଖ୍ୟମନ୍ତ୍ରୀ ତାଙ୍କୁ ଭେଟିବା ସହିତ ବାଲେଶ୍ୱରରେ ହେବାକୁ ଥିବା ଟଙ୍କା ଛପା କାରଖାନା ବିଷୟରେ ଆଲୋଚନା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ଭାରତୀୟ ରିଜର୍ଭ ବ୍ୟାଙ୍କ ସହିତ ମିଶି ଏହି କମ୍ପାନୀ ବାଲେଶ୍ୱରରେ ଏକ ନୋଟ୍ ଛପା କାରଖାନା ପ୍ରସ୍ତୁତ କରିବାକୁ ଯାଉଛି । ଯେଉଁଥିରେ ପ୍ରାୟ ୨୫ ଶହ କୋଟି ଟଙ୍କା ନିବେଶ ହେବ । ତେଣୁ ମୁଖ୍ୟମନ୍ତ୍ରୀ ଆଜି ବ୍ୟାଙ୍କ୍ ନୋଟ୍ ପେପର ଇଣ୍ଡିଆ ପ୍ରାଇଭେଟ୍ ଲିମିଟେଡର ପରିଚାଳନା ନିର୍ଦ୍ଦେଶକଙ୍କୁ ଭେଟିବା ସହିତ ରାଜ୍ୟ ସରକାରଙ୍କ ତରଫରୁ ଏହି ପ୍ରୋଜେକ୍ଟ ପାଇଁ ସମସ୍ତ ପ୍ରକାର ସହଯୋଗ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ।
ସୂଚନାଯୋଗ୍ୟ ଯେ, ନୋଟ୍ ଛପାଇବା ପାଇଁ ଆବଶ୍ୟକ ହେଉଥିବା କାଗଜର କାରଖାନା ସ୍ଥାପନ ଉଦ୍ଦେଶ୍ୟରେ ଆରବିଆଇର ଏକ ପ୍ରତିନିଧି ଦଳ ଗତକାଲି ବାଲେଶ୍ୱର ଗସ୍ତରେ ଆସିଥିଲେ । ଏହି ପ୍ରତିନିଧି ଦଳ ମଙ୍ଗଳବାର ବାଲେଶ୍ୱର ଜିଲ୍ଲା ରେମୁଣା ବ୍ଲକର ଚଷାଖଣ୍ଡ ଓ ନରହରିପୁର ପଞ୍ଚାୟତ ଗସ୍ତ କରି ଇଡକୋ ଅଧୀନରେ ଥିବା ସରକାରୀ ଜାଗା ପରିଦର୍ଶନ କରିଥିଲେ । ଟଙ୍କା ଛପା କାରଖାନା ପାଇଁ ମୋଟ ୧୦୦ ଏକର ଜାଗାର ଆବଶ୍ୟକତା ଅଛି । ଯେଉଁଥିରୁ ୫୦ ଏକର ପ୍ଲାଣ୍ଟ ତିଆରି ହେବା ସହିତ ଅନ୍ୟ ୫୦ ଏକର ଜାଗାରେ କ୍ୱାଟର ଓ ଅଫିସିଆଲଙ୍କ ଗୃହ ନିର୍ମାଣ ହେବ ବୋଲି ସୂଚନା ରହିଛି ।