ଯେବେ କୁମ୍ବଲେ କରିଥିଲେ କମାଲ: ଏକାକି ପାକିସ୍ତାନ ଟିମକୁ କରିଥିଲେ ଅଲଆଉଟ
କନକ ବ୍ୟୁରୋ: ସେ ଭାରତର କିମ୍ବଦନ୍ତୀ କ୍ରିକେଟର । ତାଙ୍କ ସ୍ପିନର ଯାଦୁଗରିରେ ଚକମା ଖାଆନ୍ତି ବିପକ୍ଷ ଦଳ । ଯେତେବେଳେ ତାଙ୍କ ହାତରେ ବଲ ଥାଏ, ସେତେବେଳେ ବ୍ୟାଟ୍ସମ୍ୟାନମାନେ ଭୟ କରନ୍ତି ତାଙ୍କୁ ସାମ୍ନା କରିବାକୁ । ସେ ହେଉଛନ୍ତି ଭାରତୀୟ ପୂର୍ବତନ କ୍ରିକେଟର ଅନିଲ କୁମ୍ବଲେ । ଦିନ ଥିଲା କୁମ୍ବଲେ ଏକାକି ଭାରତୀୟ ବୋଲିଂ ବିଭାଗକୁ ସମ୍ଭାଳିବାର ଦକ୍ଷତା ରଖୁଥିଲେ । ନିଜ ବୋଲିଂରେ ସେ ବଡ ବଡ ଟିମକୁ ଧରାଶାୟୀ କରିଦେଉଥିଲେ । ଆଜି ଆମେ ଏମିତି ଏକ ଟେଷ୍ଟ ମ୍ୟାଚ କଥା କହିବୁ ଯେଉଁଥିରେ କୁମ୍ବେଲ କମାଲ କରିଥିଲେ । ଏକାକି ପାକିସ୍ତାନ ଟିମକୁ ଅଲଆଉଟ କରି ଇତିହାସ ରଚିଥିଲେ ।
Kanak News is now on WhatsApp
Join and get latest news updates delivered to you via WhatsApp
କ୍ରିକେଟ ଇତିହାସରେ ଆପଣ ସଚିନଙ୍କ ୧୦୦ତମ ଅନ୍ତରାଷ୍ଟ୍ରିୟ ଶତକ ଦେଖିଥିବେ, ୮୦୦ତମ ୱିକେଟ ମଧ୍ୟ ଦେଖିଥିବେ, ହେଲେ ଆଜି ଆମେ ଆପଣଙ୍କୁ କହିବୁ ଅନିଲ କୁମ୍ବଲେଙ୍କ ସେହି ୧୦ ୱିକେଟ କଥା । ଯାହା ସେ ଗୋଟିଏ ଇଂନିସରେ ନେଇଥିଲେ । ପୂରା ପାକିସ୍ତାନ ଟିମକୁ ଏକାକି ସେ ପାଣି ପିଆଇ ଦେଇଥିଲେ ।
ସ୍ଥାନ ଥିଲା ଦିଲ୍ଲୀ, ଆଉ ଷ୍ଟାଡିୟମ ଥିଲା ସେତେବେଳର ଫିରୋଜ ଶାହା କୋଟଲା । ୧୯୯୯ ମସିହା ଫେବୃଆରୀ ୨ ତାରିଖ । ଭାରତ-ପାକିସ୍ତାନ ମଧ୍ୟରେ ଆରମ୍ଭ ହୋଇଥାଏ ଦ୍ୱିତୀୟ ଟେଷ୍ଟ ମ୍ୟାଚ । ୨ଟିକିଆ ଟଷ୍ଟେ ସିରିଜର ପ୍ରଥମ ଟେଷ୍ଟରେ ଭାରତ ହାରିସାରିଥାଏ, ଆଉ ଦ୍ୱିତୀୟ ମ୍ୟାଚରେ ବଦଲା ନେବାକୁ ଭାରତ ଏକଦମ ପ୍ରସ୍ତୁତ ହୋଇଥାଏ । ଯଦି ଭାରତ ଏହି ମ୍ୟାାଚରେ ହାରିଯାଇଥାନ୍ତା, ତେବେ ପାକିସ୍ତାନ ଏହି ସିରିଜ ଜିତିନେଇଥାନ୍ତା । ହେଲେ ଏମିତି ହେବାକୁ ଦେଇଥିଲେ କୁମ୍ବଲେ ।
ଏହି ଦ୍ୱିତୀୟ ଟେଷ୍ଟରେ ଟସ ଜିତି ପ୍ରଥମେ ଭାରତ ବ୍ୟାଟିଂ ନେଇଥିଲା । ପ୍ରଥମ ଇଂନିସରେ ଏତେ ଭଲ ପ୍ରଦର୍ଶନ କରିପାରିନଥିଲା ଦଳ । ସକଲିନ ମୁସ୍ତାକଙ୍କ ବୋଲିଂକୁ ସାମ୍ନା କରିପାରିନଥିଲେ ଭାରତୀୟ ବ୍ୟାଟ୍ସମ୍ୟାନ । ଭାରତ ପକ୍ଷରୁ ସାଦଗୋପନ ରମେଶ ୬୦ ଓ ଆଝାରୁଦ୍ଦିନ ୬୭ ରନ କରିଥିଲେ । ଫଳରେ ଦଳ ମାତ୍ର ୨୫୨ ରନ କରିବାରେ ସଫଳ ହୋଇଥିଲା ।
ପାକିସ୍ତାନ ମଧ୍ୟ ତାର ପ୍ରଥମ ଇଂନିସରେ ବିଫଳ ହୋଇଥିଲା । ଏହି ଇଂନିସରେ କୁମ୍ବଲେ ନିଜ ବୋଲିଂର ଝଲକ ଦେଖାଇଥିଲେ । ସେ ଏହି ଇଂନିସରେ ୪ ୱିକେଟ ନେଇଥିଲେ । ଏହାସହ ହରଭଜନ ସିଂ ୩, ଭେଙ୍କଟେଶ ପ୍ରସାଦ ୨ ଓ ଶ୍ରୀନାଥ ଗୋଟିଏ ୱିକେଟ ନେଇଥିଲେ । ଯାହା ଫଳରେ ପାକିସ୍ତାନ ମାତ୍ର ୧୭୨ ରନ କରି ଅଲଆଉଟ ହୋଇଯାଇଥିଲା । ଏହାପରେ ଭାରତ ତାର ଦ୍ୱିତୀୟ ଇଂନିସରେ ୩୩୯ ରନର ବଡ ସ୍କୋର କରିଥିଲା ।
ପାକିସ୍ତାନର ଦ୍ୱିତୀୟ ଇଂନିସ ଅର୍ଥାତ ଫେବୃଆରୀ ୭ ତାରଖ ବେଳକୁ ସାମ୍ନାରେ ଥାଏ ୪୨୦ ରନର ଟାର୍ଗେଟ । ଆରମ୍ଭରୁ ୧୦୧ ରନ ବିଶାଳ ପାର୍ଟନରସିପ କରି ଟିମ ଇଣ୍ଡିଆକୁ ଚମକାଇଦେଇଥିଲା ପାକିସ୍ତାନ । ହେଲେ ୨୪ ଓଭର ବେଳକୁ କୁମ୍ବଲେଙ୍କ ପ୍ରଥମ ଶିକାର ହୋଇଥିଲେ ସାହିଦି ଆଫ୍ରିଦି । ଏହାପରେ ପାକିସ୍ତାନ ଟିମର ଗୋଟିଏ ପରେ ଗୋଟିଏ ୱିକେଟ ନେଇ ଚାଲିଥିଲେ କୁମ୍ବଲେ । ପୂରା ପାକିସ୍ତାନ ଟିମକୁ ସେ ଏକାକି ଅଲଆଉଟ କରି ଏକ ନୂଆ ଇତିହାସ ନିଜ ନାଁରେ କରିଦେଇଥିଲେ ।