କନ୍ୟାଯାତ୍ରୀଙ୍କୁ ନେଇ ଫେରୁଥିବା ମିନିବସ୍ ସହ ମୁହାଁମୁହିଁ ଧକ୍କା ହେଲା ଓଏସଆରଟିସି ବସ୍ । ୧୨ ଜଣଙ୍କ ମୃତ୍ୟୁ, ୮ ଗୁରୁତର । ଅନୁକମ୍ପା ରାଶି ଘୋଷଣା କଲେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ
କନକ ବ୍ୟୁରୋ: ଗଞ୍ଜାମ ଦିଗପହଣ୍ଡିରେ ଦୁଇ ବସ ମଧ୍ୟରେ ମୁହାଁମୁହୁଁ ଧକ୍କାରେ ଯାଇଛି ୧୨ ଜଣଙ୍କ ଜୀବନ । ରାୟଗଡାରୁ ଭୁବନେଶ୍ୱର ଆସୁଥିବା ଓଏସଆରଟିସି ବସ ସହ କନ୍ୟାକୁ ଛାଡି ବ୍ରହ୍ମପୁରରୁ ଫେରୁଥିବା ମିନି ବସର ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ଘଟଣାସ୍ଥଳରେ ୭ ଜଣ ପ୍ରାଣ ହରାଇଥିଲେ । ଘଟଣାରେ ଶୋକ ପ୍ରକାଶ କରିବା ସହ ମୃତକଙ୍କ ପରିବାରକୁ ରାଜ୍ୟ ସରକାର ୩ ଲକ୍ଷ ଲେଖାଁଏ ଓ କେନ୍ଦ୍ର ସରକାର ୨ ଲକ୍ଷ ଲେଖାଁଏ ସହାୟତା ରାଶି ଦେବାକୁ ଘୋଷଣା କରିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ତେବେ ଯେଉଁଠି କିଛି ଘଣ୍ଟା ପୂର୍ବରୁ ବାହାଘର ହୋମଯଜ୍ଞ ହେଉଥିଲା, ସେହି ଗାଁରେ ଜଳିଛି ୧୨ ଜଣଙ୍କ ଜୁଇ । ଝିଅର ବିବାହ ପାଇଁ ଉତ୍ସବମୁଖର ହୋଇଥିବା ପରିବାର ଉପରେ ଭାଙ୍ଗି ପଡ଼ିଛି ଦୁଃଖର ପାହାଡ଼ । କାହା ଆଖିରୁ ଲୁହ ଶୁଖୁନି । ଝିଅ ବାହାଘର ପାଇଁ ବନ୍ଧୁବାନ୍ଧବଙ୍କ ଗହଳିରେ ହସଖୁସିରେ ଘର ଫାଟି ପଡୁଥିଲା, ରାତି ପାହିଲା ବେଳକୁ କାନ୍ଦ ବୋବାଳିରେ ଫାଟି ପଡିଛି । କେବଳ ଏହି ଅଞ୍ଚଳକୁ ନୁହେଁ, ସାରା ରାଜ୍ୟକୁ ଚହଲାଇ ଦେଇଛି ଏହି ଛାତିଥରା ଦୁର୍ଘଟଣା ।
- ରବିବାର, ରାତି ପ୍ରାୟ ସାଢ଼େ ଗୋଟାଏ
- ସ୍ଥାନ: ସାନଖେମୁଣ୍ଡି କଲେଜ ଛକ
- ମିନି ବସକୁ ଧକ୍କା ଦେଲା ଓଏସଆରଟିସି ବସ୍
ଦିନ ବେଳା ଝିଅର ବିବାହ ପରେ ଗଞ୍ଜାମ ପାଟପୁର ଥାନା ଅନ୍ତର୍ଗତ ଖଣ୍ଡଦେଉଳି ଗାଁରୁ କନ୍ୟାଯାତ୍ରୀ ଯାଇଥିଲେ ବ୍ରହ୍ମପୁରର ବ୍ରହ୍ମାନଗର । କନ୍ୟାକୁ ଛାଡିବା ପରେ ଭୋଜି ଖାଇ ଏକ ମିନି ବସରେ ପ୍ରାୟ ୨୦ ଜଣ ଫେରୁଥିଲେ । ସେମାନେ କେବେ ବି ଭାବିନଥିଲେ, କାଳ ସେମାନଙ୍କୁ ଅପେକ୍ଷା କରିଛି । କ୍ଲାନ୍ତି ଯୋଗୁଁ ସମସ୍ତଙ୍କୁ ଛାଇ ଦିନ ଲାଗି ଆସିଥିଲା । ଘରେ ପହଞ୍ଚିବାକୁ ମାତ୍ର ୭ କିଲୋମିଟର ଥିଲା, ହେଲେ ହଠାତ୍ ସବୁକିଛି ଓଲଟପାଲଟ ହୋଇ ଯାଇଥିଲା । ରାତି ପ୍ରାୟ ସାଢେ ଗୋଟାଏ ବେଳେ ମଳାଭଞ୍ଜା ନିକଟରେ ମିନି ବସ୍ ପହଞ୍ଚିଥିଲା । ଆଉ ସେତିକି ବେଳେ ଅପରପାଶ୍ୱର୍ ଦ୍ରୁତ ଗତିରେ ଆସୁଥିବା ଓଏସଆରଟିସି ବସ୍ ମିନିବସକୁ ମୁହାଁମୁହିଁ ଧକ୍କା ଦେଇଥିଲା ।
ଭୟଙ୍କର ଶବ୍ଦରେ ଆଖପାଖ ଅଞ୍ଚଳ ଫାଟି ପଡ଼ିଥିଲା । ମିନିବସଟି ଭାଙ୍ଗି ଚୁରମାର ହୋଇ ଯାଇଥିଲା । ଦୁଃର୍ଘଟଣା ସ୍ଥଳରେ ଖଣ୍ଡ ବିଖଣ୍ଡିତ ମୃତଦେହ ଏଣେତେଣେ ପଡିଥିଲା । ରାତିର ଅନ୍ଧାର ଭିତରେ ଶୁଭୁଥିଲା ଆହତଙ୍କ କରୁଣ ଚିକ୍ରାର । ସ୍ଥାନୀୟ ଲୋକ, ପୋଲିସ ଓ ଦିଗପହଣ୍ଡି ଅଗ୍ନିଶମ ବିଭାଗର କର୍ମଚାରୀ ଦୁର୍ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଆହତ ଯାତ୍ରୀଙ୍କୁ ବ୍ରହ୍ମପୁର ବଡ଼ ମେଡିକାଲରେ ଭର୍ତି କରାଯାଇଥିଲା । କିଛି ଗୁରୁତରଙ୍କୁ ଏସସିବି ଓ ଏମସ ଅଣାଯାଇଥିଲା ।
ରବିବାର ଦିନ ଖଣ୍ଡଦେଉଳି ଗାଁର ସ୍ୱର୍ଗତଃ ଅଶୋକ ପ୍ରଧାନଙ୍କ ମଝିଆ ଝିଅ ସୋନାଲିଙ୍କ ବିବାହ ହୋଇଥିଲା । କିନ୍ତୁ କିଛି ଘଣ୍ଟା ପରେ ପରିବାର ଉପରେ ଛିଣ୍ଡି ପଡିଛି ଦୁଃଖର ପାହାଡ଼ । ଗୋଟିଏ ପରିବାର ଓ ନିକଟ ସଂପର୍କୀୟ ୧୨ଜଣଙ୍କ ଜୀବନ ଦୀପ ଲିଭିଯାଇଛି । ସୋନାଲିଙ୍କ ବଡ଼ ଭଉଣୀ, ଭିଣୋଇ, ପୁତୁରା, ସାନ ଉଭଣୀ ସମସ୍ତଙ୍କ ଜୀବନ ଯାଇଛି । ସୋମବାର ସକାଳେ ଯେତେବେଳେ ମୃତକଙ୍କ ଶବ ପହଞ୍ଚିଥିଲା, ସେତେବେଳେ ଗାଁର ଶୋକାକୂଳ ପରିବେଶକୁ ବର୍ଣ୍ଣନା କରିହେବ ନାହିଁ । ନେତାଙ୍କ ଠାରୁ ସାଧାରଣ ଲୋକଙ୍କ ଭିଡ଼ ଜମିଥିଲା । ଘଟଣାକୁ କେହି ବିଶ୍ୱାସ କରିପାରୁନଥିବା ବେଳେ ସମସ୍ତେ ଦୁଃଖରେ ଭାଙ୍ଗି ପଡିଛନ୍ତି । ବସ୍ ଦୁର୍ଘଟଣାର ସମସ୍ତ ମୃତକ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ, କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ ଓ ପୂର୍ବତନ ରାଜ୍ୟସଭା ସାଂସଦ ରେଣୁବାଳା ପ୍ରଧାନଙ୍କ ସଂପର୍କୀୟ ବୋଲି ଜଣାପଡିଛି ।
- ମିନିବସର ଫିଟନେସକୁ ନେଇ ଉଠିଲା ପ୍ରଶ୍ନ
- ଧରାପଡ଼ିଲେ ଓଏସଆରଟିସି ଡ୍ରାଇଭର
ଦୁର୍ଘଟଣାଗ୍ରସ୍ତ ମିନି ବସର ପରମିଟ ନଥିବା ପ୍ରାଥମିକ ତଦନ୍ତରୁ ଜଣାପଡିଛି । ୨୫ ବର୍ଷର ପୁରୁଣା ଗାଡି ହୋଇଥିବାରୁ ଧକ୍କା ପରେ ଆକ୍ସିଲ ଭାଙ୍ଗିଯାଇଥିଲା । ନଭେମ୍ବର ୨୦୨୩ ପର୍ଯ୍ୟନ୍ତ ରହିଛି ଗାଡିର ଫିଟନେସ୍ । ବସ ମାଲିକଙ୍କ ଖାମଖିଆଲ ନୀତି ଯୋଗୁ ନିରୀହଙ୍କ ଜୀବନ ଯାଇଛି ବୋଲି ଅଭିଯୋଗ ହୋଇଛି ।