ବୟସର ସାୟାହ୍ନରେ ସାହାରା ପାଲଟିଛି ଚନ୍ଦ୍ରଗିରିର ବୃଦ୍ଧାଶ୍ରମ । ଏ ଅସହାୟତା ପାଇଁ ଦାୟୀ କିଏ?
କନକ ବ୍ୟୁରୋ: ନିସଙ୍ଗତା ସହ ସାଲିସ କରିବାର ଏ କେମିତି ଚେଷ୍ଟା । ନିଜ ଭିତରେ କାହାକୁ ଯେମିତି ଘୁମୁରି ଘୁମୁରି ଖୋଜୁଛି ଏ ମଣିଷ । ଏମାନେ ବି କାହାର ଜନ୍ମଦାତା । ହେଲେ ଆଜି ପୁରା ଅଲୋଡା ।
ଜନ୍ମଦାତା ଏଠି ନିଜେ ଅନାଥ ।
ଜୀବନ ଏଠି ଏକ ଅକୁହା ଯନ୍ତ୍ରଣା
ଯିଏ ଦିନେ ନିଜ ସନ୍ତାନର ଲୁହ ପୋଛିଥିଲା ସିଏ ଆଜି ଲୁଚି ଲୁଚି ଝରାଉଛି ଲୁହ । କେମିତି ଏ ଜୀବନ । ଯିଏ ଦିନେ କାହାକୁ ଜୀବନ ଦେଇଥିଲା ଆଜି ସିଏ ଅସହାୟ । ଦିନ ଥିଲା, ଅନ୍ତଚିରି ଜନ୍ମ ଦେଇଥିବା ସନ୍ତାନର କେତେ ଅଳି ଅର୍ଦ୍ଦଳି ସହିଥିଲା ଏ ମଣିଷ । ହେଲେ ଆଜି ବୟସର ସାୟାହ୍ନରେ ଜୀବନ ପାଲଟିଛି ଏକ ବିରାଟ ବୋଝ । ଦିନେ ପୁଅ ଝିଅଙ୍କୁ କାନ୍ଧରେ ବସାଇ ଆକାଶରେ ଜହ୍ନ , ତାରା ଦେଖାଉଥିବା ମଣିଷ ଆଜି ଅନ୍ଧକାର ରାତିରେ ଏକାକି ବସି ନିଜ ନିସଙ୍ଗତାକୁ ଆଡେଇଯିବାର ବାଟ ଖୋଜୁଛିି । ପଚାରୁଛି କୋଉଠି ରହିଗଲା ତା’ର ଭୁଲ ।
Kanak News is now on WhatsApp
Join and get latest news updates delivered to you via WhatsApp
ନିଜ ଭିତରେ ନିଜର ଭୁଲକୁ ଖୋଜି ଚାଲିଥିବା ଏହି ବୃଦ୍ଧ ବୃଦ୍ଧାଙ୍କୁ ଅପଣାଇ ନେଇଛି ଚନ୍ଦ୍ରଗିରିର ଏହି ବୃଦ୍ଧାଶ୍ରମ । ନିସଙ୍ଗ ଜୀବନରେ ଟିକେ ଖୁସି ଭରିଦେବାକୁ ଚେଷ୍ଟା କରୁଛି ଏହି ସଂସ୍ଥା । ଏମାନେ ହେଉଛନ୍ତି ଗଜପତି ଜିଲ୍ଲା ମୋହନା ବ୍ଳକ ଚନ୍ଦ୍ରଗିରିରେ ବସବାସ କରୁଥିବା ତିବତ୍ତୀୟ ସମ୍ପ୍ରଦାୟର । ବୟସ ହୋଇଯିବା ପରେ ପରିବାର ଉପରେ ଏମାନେ ବୋଝ ହୋଇ ବାସନ୍ଦ ହୋଇଯିବା ପରେ ଚନ୍ଦ୍ରଗିରିରେ ଥିବା ବୃଦ୍ଧାଶ୍ରମରେ ନେଇଛନ୍ତି ଆଶ୍ରୟ । ୧୯୭୪ ମସିହାରେ ତୀବତ୍ତୟ ଧର୍ମଗୁରୁ ଦଲାଇଲାମାଙ୍କ ଦ୍ୱାରା ପ୍ରତିଷ୍ଠା ହୋଇଥିଲା ଏହି ଆଶ୍ରମ । ଏଠାରେ ରହୁଛନ୍ତି ପାଖାପାଖି ୬୦ ବୃଦ୍ଧବୃଦ୍ଧା । ଘର ଲୋକଙ୍କ ଠାରୁ ତିରସ୍କୃୃତ ହେବା ପରେ ଏବେ ନିଜ ଭଳି ଆଉ କିଛି ବୟସ୍କଙ୍କ ସହ ନିଜ ଦୁଃଖ ବାଣ୍ଟି ବଞ୍ଚିଛନ୍ତି । ଟିକେ ହସିବାକୁ ଚେଷ୍ଟା କରୁଛନ୍ତି ।
ଏଠି ଏହି ଅସହାୟ ବୃଦ୍ଧବୃଦ୍ଧାଙ୍କ ପାଇଁ ସରକାରଙ୍କ ପକ୍ଷରୁ ଘରର ସବୁ ସୁବିଧା ରହିଛି । ଖାଇବା ପିଇବା ଠାରୁ ଆରମ୍ଭ କରି ଡାକ୍ତରୀ ଚିକିତ୍ସା ସବୁ ଏଠି ମିଳୁଛି । ହେଲେ ଏସବୁ ଭିତରେ ବି କେଉଁଠି କେଉଁଠି ଉଙ୍କି ମାରୁଛି ଅତୀତର ସେ ସବୁ ଅନୁଭୂତି । ମନେ ପଡିଯାଉଛି ଅନ୍ତଚିରି ଜନ୍ମ ଦେଇଥିବା ନିଜ ପିଲାମାନଙ୍କ କଥା ।
ଏ ଖାଲି ଏକ ଖବର ନୁହେଁ ବରଂ ସମାଜକୁ ଏକ ପ୍ରଶ୍ନ, ଯାହା ସମାଜର ପ୍ରତ୍ୟେକ ପୁଅଝିଅଙ୍କୁ ପଚାରୁଛି -କାହିଁକି ଏ ଅସହାୟତା? କ’ଣ ପାଇଁ ଏ ବୃଦ୍ଧାଶ୍ରମ? ଆଉ ଧିକ୍କାର କରୁଛି ସେ ସମସ୍ତ ସନ୍ତାନ ମାନଙ୍କୁ ଯେଉଁମାନେ ବାଧ୍ୟ କରିଛନ୍ତି ଏପରି ଏକ ବୃଦ୍ଧାଶ୍ରମ ଗଢିବାକୁ ।