ମା’ କାଳୀଙ୍କ ପୂଜାରେ କାହିଁକି ବ୍ୟବହାର ହୁଏ ଲେମ୍ବୁ ? ଲେମ୍ବୁର କ’ଣ ରହିଛି ମାହାତ୍ମ୍ୟ ?

କନକ ବ୍ୟୁରୋ : ଖଡ୍‌ଗ ଖର୍ପର ଧାରିଣୀ, ଦୁଷ୍ଟଙ୍କ ସଂହାରକାରିଣୀ ମା’ କାଳରାତ୍ରୀଙ୍କୁ ସନାତନ ଧର୍ମରେ ନକାରାତ୍ମକ ଶକ୍ତିର ନାଶ କରୁଥିବା ଦେବୀ ବୋଲି କୁହାଯାଏ । ମା’କାଳୀଙ୍କ ପୂଜାରେ ଲେମ୍ବୁର ବ୍ୟବହାର ହୋଇଥାଏ । ଲେମ୍ବୁକୁ ମଧ୍ୟ ନକାରାତ୍ମକ ଉର୍ଜ୍ଜାକୁ ନଷ୍ଟ କରୁଥିବାର ପ୍ରତୀକ ବୋଲି ମନେ କରାଯାଏ । ମାନ୍ୟତା ରହିଛି, ଲେମ୍ବୁକୁ ସେହି ଦୁଷ୍ଟ ପ୍ରକୃତିର ଅସୁରଙ୍କ ସହ ତୁଳନା କରାଯାଏ ଯାହାଙ୍କ ସଂହାର ମା’ କାଳରାତ୍ରୀ କରିଥିଲେ । ଯେତେବେଳେ ମା’ କାଳୀଙ୍କୁ ଲେମ୍ବୁର ମାଳା ଅର୍ପଣ କରାଯାଏ , ତାହା ଏକପ୍ରକାର ବଳି (ପ୍ରତିକାତ୍ମକ ବଳି) ବୋଲି ମନେ କରାଯାଏ । ଯାହାକୁ ମା’ ସ୍ବୀକାର କରନ୍ତି । ଯାହା ଏହି କଥାକୁ ସୂଚାଏ ଯେ ଭକ୍ତ ନିଜ ଶତ୍ରୁ ତଥା ଆଭ୍ୟନ୍ତରର ବିକାରକୁ ମାଆଙ୍କ ଆଗରେ ସମର୍ପି ନକାରାତ୍ମକ ଉର୍ଜାକୁ ନଷ୍ଟ କରି ଏହା ଉପରେ ବିଜୟ ପ୍ରାପ୍ତ କରେ । ଯେଉଁ ଭକ୍ତ କୌଣସି ବିବାଦ , ମକଦ୍ଦମା କିମ୍ବା ଗୁପ୍ତ ଶତ୍ରୁଙ୍କ ନକାରାତ୍ମକ ଦୃଷ୍ଟିରୁ ନିଜକୁ ମୁକ୍ତ କରିବାକୁ ଚାହୁଛନ୍ତି ସେମାନେ ମା’ କାଳରାତ୍ରୀଙ୍କୁ ଲେମ୍ବୁର ମାଳା ତଥା ଲେମ୍ବୁ ଅର୍ପଣ କରନ୍ତି । ମାନ୍ୟତା ରହିଛି ଏହାଦ୍ବାରା ଶତ୍ରୁଙ୍କ ନକାରାତ୍ମକ ଦୃଷ୍ଟିର ପ୍ରଭାବ ଉପରେ ପଡ଼େ ନାହିଁ ଏବଂ ମଣିଷର ଜୀବନ ଶାନ୍ତିମୟ ହୁଏ । ଲେମ୍ବୁର ମାଳା ପରିଧାନ କରି ମା’କାଳରାତ୍ରୀ ପ୍ରସନ୍ନ ହୁଅନ୍ତି ଏବଂ ନିଜ ଭକ୍ତର ରକ୍ଷା କରନ୍ତି । 

ଜ୍ୟୋତିଷଶାସ୍ତ୍ରରେ ଲେମ୍ବୁର ସମ୍ବନ୍ଧ ରାହୁ ଏବଂ କେତୁର ଛାୟା ଗ୍ରହକୁ ମଧ୍ୟ ମନେ କରାଯାଏ । ଲେମ୍ବୁର ତନ୍ତ୍ର ଉପାୟ ରାହୁ-କେତୁଙ୍କ ଅଶୁଭ ପ୍ରଭାବ ଏବଂ ନଜର ଦୋଷକୁ ଦୂର କରିବାରେ ମଧ୍ୟ ସହାୟକ ହୁଏ । ମା’ କାଳୀଙ୍କ ପୂଜାରେ ଲେମ୍ବୁର ବ୍ୟବହାର ନକାରାତ୍ମକ ଦୃଷ୍ଟି ଏବଂ ବ୍ଲାକ୍ ମ୍ୟାଜିକର ପ୍ରଭାବକୁ ନଷ୍ଟ କରିବା ପାଇଁ ବ୍ୟବହାର କରାଯାଏ । ଲେମ୍ବୁର ଖଟା ଏବଂ ଏହାର ଉତ୍କଟ ବାତ୍ସା ଶକ୍ତିଶାଳୀ ଉର୍ଜ୍ଜାକୁ ଇଙ୍ଗିତ କରେ । ଉଗ୍ର ଏବଂ ଶକ୍ତିଶାଳୀର ପ୍ରତୀକ ମା’ କାଳୀଙ୍କ ଉର୍ଜ୍ଜାକୁ ସହ୍ୟ କରିବାର ଶକ୍ତି ଲେମ୍ବୁରେ ରହିଛି । ତେଣୁ ଲେମ୍ବୁର ମାଳା ମା’ଙ୍କ ପାଖରେ ଅର୍ପଣ କରାଯାଏ । ପୌରାଣିକ ମାନ୍ୟତା ଅନୁସାରେ ଦେବୀ ଶାଙ୍କଭରି (ମା’ କାଳୀଙ୍କ ଅନ୍ୟ ଏକ ରୂପ) ଯେତେବେଳେ ନିମ୍ବାସୁର ନାମକ ରାକ୍ଷସର ବଧ କରିଥିଲେ ସେତେବେଳେ ସେ ଅତ୍ୟନ୍ତ ଉଗ୍ର ରୂପରେ ଥିଲେ । ଦେବତାଗଣ ମାତାଙ୍କୁ ଶାନ୍ତ କରିବା ପାଇଁ ଲେମ୍ବୁର ଘୋଳ ମିଶାଇ ମା’ଙ୍କୁ ପିଇବାକୁ ଦେଇଥିଲେ । ସେବେଠାରୁ ହିଁ ଦେବୀଙ୍କ ଉଗ୍ରରୂପକୁ ଶାନ୍ତ କରି ସନ୍ତୁଳନ ସ୍ଥାପନ କରିବା ପାଇଁ ଲେମ୍ବୁ ଅର୍ପଣ କରାଯାଏ ।

ଭକ୍ତମାନେ ବେଳେବେଳେ ଗୋଟିଏରୁ ଦୁଇଟି ଲେମ୍ବୁକୁ ମା’ଙ୍କ ଚରଣରେ ଅର୍ପିତ କରୁଥିବା ବେଳେ ଆଉ କିଛି ଭକ୍ତ ୧୦୮ ଟି ଲେମ୍ବୁର ମାଳାକୁ ମା’କାଳୀଙ୍କୁ ଅର୍ପଣ କରିଥା’ନ୍ତି । କିଛି ତନ୍ତ୍ରବିଧିରେ ଲେମ୍ବୁକୁ କାଟି ଏହାକୁ ଦୀପ ଭଳି ବ୍ୟବହାର କରାଯାଏ । ତେବେ ମା’ଙ୍କ ପୂଜାରେ ଲେମ୍ବୁର ବ୍ୟବହାର ବିଶେଷ ରୂପରେ ତାନ୍ତ୍ରିକ ପୂଜା ଏବଂ ମାନସିକ ପୂର୍ତ୍ତି ପାଇଁ କରାଯାଏ । ଘରେ ଏହାର ବ୍ୟବହାର ପୂର୍ବରୁ ଥରେ ପଣ୍ଡିତ , ପୂଜକଙ୍କ ସହ ପରାମର୍ଶ କରିବା ଆବଶ୍ୟକ । ତେବେ ମା’କାଳୀ କେବଳ ରାଗ, ହିଂସା , ଦ୍ବେଷ ,କପଟ ,ଈର୍ଷା , ନକାରାତ୍ମକ ପ୍ରବୃତ୍ତିକୁ ନାଶ କରିବା ପାଇଁ ଉଗ୍ର ରୂପ ଧାରଣ କରନ୍ତି । ସେ ପରା ମା’ ମମତାମୟୀ ନହେଲେ ସାରା ଦୁନିଆ ତାଙ୍କୁ କାହିଁକି ପୂଜନ୍ତା ? ମଣିଷ ଯେତେବେଳେ ମାନବିକତାକୁ ନଷ୍ଟ କରି ଈର୍ଷା,ଦ୍ବେଷକୁ ଆଲିଙ୍ଗନ କରେ ସେତେବେଳେ ଅହଙ୍କାର , ଗର୍ବକୁ ଖର୍ବ କରିବା ପାଇଁ ଉଗ୍ର ରୂପ ନିଅନ୍ତି ମା’ କାଳରାତ୍ରୀ ।