କିଏ ସ୍ବାମୀଙ୍କୁ କାଟି ଡ୍ରମରେ ଭର୍ତ୍ତି କରୁଛନ୍ତି,କିଏ ବସ୍ତାରେ ଭର୍ତ୍ତି କରି ଜାଳି ଦେଉଛନ୍ତି : ପରକୀୟା ପ୍ରୀତି ପାଇଁ ପରମେଶ୍ବରଙ୍କ ପଡୁଛି ବଳି !

ପୁରାତନ କାଳରେ ଯେତେବେଳେ ବୁଢୀ ମା’ ନୂଆ କରି ବାହା ହେଉଥିବା ଝିଅଟିକୁ କହୁଥିଲେ,ମା’ରେ ତୋର ଆଜିଠୁ ନୂଆ ସଂସାର ଆରମ୍ଭ । ସ୍ବାମୀ ହିଁ ତୋର ପରମେଶ୍ବର,ଶାଶୁଘର ହିଁ ତୋର ସରଗପୁର .. ସେତେବେଳେ ଝିଅଟି କଇଁ କଇଁ କାନ୍ଦି ବୁଢୀ ମା’ର ସଂସ୍କାରକୁ ହିଁ ସର୍ବୋପରି ଭାବି ସୁଖରେ ବୈବାହିକ ଜୀବନରେ ପାଦ ଥାପୁଥିଲା । ସାବିତ୍ରୀ,କରୱାଚୌଥ୍ ଭଳି ବ୍ରତ ପାଳନ କରି ଗାଇ ଉଠୁଥିଲା, ତୁମେ ହିଁ ସ୍ବର୍ଗ ମୋର, ତୁମେ ଦେବତା ମୋର, ତୁମେ ହିଁ ଶଙ୍ଖା ତୁମେ ହିଁ ସିନ୍ଦୁର .. କିନ୍ତୁ ସମୟ ବଦଳିବା ସହ ସଂପର୍କର ପରିଭାଷା ମଧ୍ୟ ବଦଳୁଛି । ପରକୀୟା ପ୍ରୀତିର ଦୁର୍ଗନ୍ଧରେ ସୁଗନ୍ଧମୟ ଦାମ୍ପତ୍ୟ ଜୀବନ ହଳାହଳ ବିଷ ସଦୃଶ ହୋଇଉଠୁଛି । ପୂର୍ବରୁ ପୁରୁଷ ବାଟବଣା ହେଉଥିଲେ, ସ୍ତ୍ରୀ ଥାଉ ଥାଉ ଅନ୍ୟ ନାରୀଙ୍କ ଉପରେ ଆକର୍ଷିତ ହେଉଥିଲେ,ଏବେ ମଧ୍ୟ ହେଉଛନ୍ତି । କିନ୍ତୁ ବିଡ଼ମ୍ବନାର ବିଷୟ ହେଉଛି ବର୍ତ୍ତମାନ ଏହି ତାଲିକାରେ ନାରୀ ମଧ୍ୟ ସାମିଲ୍ ହେଲେଣି । ସରଳ ଭାଷାରେ କହିଲେ ,ଅଧୋପତନ ଦିଗରେ ଅର୍ଦ୍ଧାଙ୍ଗିନୀ । ଆମେ ଏଠାରେ କୌଣସି ସମାଜର ଚରିତ୍ର ସଂହାର କରୁନାହୁଁ କି ଏଠାରେ ପ୍ରମୁଖ ବିଷୟ ପୁରୁଷ କି ନାରୀ ନୁହେଁ । ଆମେ ସେ ସମାଜ ବିଷୟରେ ଆଲୋକପାତ କରୁଛୁ ଯାହା ଆମ ସଭ୍ୟତାର ଅଂଶବିଶେଷ ହିଁ ନୁହେଁ । ଯେଉଁ ସଂସ୍କୃତି ଆମକୁ ପ୍ରେମର ପରାକାଷ୍ଠା,ସଂପର୍କର ସୁନ୍ଦରତା ଏବଂ କରୁଣାର ଶିକ୍ଷା ଦେଇଛି ସେଇଠି ଆଜି ଡ୍ରମ୍, ଫ୍ରିଜ୍, କୁକର୍, ଜଙ୍ଗଲ ଭଳି ସ୍ଥାନରେ ଗୁମୁରି କାନ୍ଦୁଛି ନିଷ୍ପାପ ପ୍ରେମ ଆଉ ନିଜକୁ ନିଜେ ପଚାରୁଛି, ‘ମୋର ଭୁଲ୍ କ’ଣ ଥିଲା’ ? 

ପୂର୍ବରୁ ପରକୀୟା ପ୍ରୀତି ପାଇଁ ପିଶାଚ ପାଲଟି ଯାଇଥିବା ସ୍ବାମୀଙ୍କର ଅନେକ ଉଦାହରଣ ଆମେ ଆପଣଙ୍କୁ ଦେଇଛୁ । ବର୍ତ୍ତମାନ ପାଳି ସ୍ତ୍ରୀଙ୍କର । ନିକଟରେ ମିରଟରେ ମୁସ୍କାନ୍ ନାମକ ଜଣେ ମହିଳା ନିଜ ସ୍ବାମୀ ସୌରଭଙ୍କୁ ଅମାନୁଷିକ ଭାବେ ହତ୍ୟା କରିବା ଘଟଣା ସାରା ଦେଶରେ ଚହଳ ସୃଷ୍ଟି କରିଛି । କେମିତି ଜଣେ ନୌସେନା ଅଧିକାରୀ ସ୍ବାମୀଙ୍କୁ ପ୍ରେମିକ ସହ ମିଶି ୧୫ ଖଣ୍ଡ କଲା ପରେ ଡ୍ରମରେ ସିମେଣ୍ଟ ଦେଇ ପ୍ୟାକ୍ କରିଥିଲା ସ୍ତ୍ରୀ ମୁସ୍କାନ୍ ତାହାକୁ ନେଇ ଏବେ ଚାରିଆଡ଼େ ଚର୍ଚ୍ଚା । ହତ୍ୟାକାଣ୍ଡ ଏତେ ଜଘନ୍ୟ ଥିଲା ଯେ ଡାକ୍ତର ବି ଯେତେବେଳେ ମୃତଦେହର ଯାଞ୍ଚ୍ କରିବାକୁ ଆସିଲେ ସେତେବେଳେ ତାଙ୍କ ଲୋମ ଟାଙ୍କୁରୀ ଉଠିଥିଲା । ପ୍ରେମବିବାହ କରିଥିଲେ ମୁସ୍କାନ୍ ଏବଂ ସୌରଭ କିନ୍ତୁ ପରକୀୟା ପ୍ରୀତି ଆଗରେ ଫିକା ପଡ଼ିଗଲା ପ୍ରେମ । ସ୍ବାମୀ ଛାତି ଉପରେ ବସି ୩ ଥର ହୃଦୟରେ ଛୁରି ଭୁଷିଥିଲା ମୁସ୍କାନ୍ , ମୁଣ୍ଡ – ହାତ କାଟି ନିଜ ସହ ନେଇଥିଲା ପ୍ରେମିକ ଆଉ ସ୍ତ୍ରୀ ସ୍ବାମୀକୁ ୧୫ ଖଣ୍ଡ କରି ଡ୍ରମରେ ଭର୍ତ୍ତି କରିଥିଲା । ତା’ପରେ ହସଖୁସିରେ ଛୁଟି କଟାଇବା ପାଇଁ ଚାଲିଗଲେ ୨ ହତ୍ୟାକାରୀ । ହୋଲି ଖେଳିଲେ,ନାଚିଲେ,ଧୁମ୍ ବୁଲିଲେ କିନ୍ତୁ ଏପଟେ ହତ୍ୟାକାରୀ ମା’ର ପୋଲ୍ ଖୋଲିଦେଲା କୁନିଝିଅ ଆଉ କହିଥିଲା ‘ବାପା ଡ୍ରମରେ ଅଛନ୍ତି’ । ଲଜ୍ଜା,ଲୋମହର୍ଷଣର ଏ ଖବର ଯେ କେହିବି ଶୁଣିଲେ ଅବାକ୍ ହୋଇରହିଗଲେ । 

ଏହାର ଠିକ୍ ପରେ ପରେ ରାଜସ୍ଥାନ ଜୟପୁରରୁ ମଧ୍ୟ ସମାନ ଢଙ୍ଗରେ ଏକ ଖବର ସାମ୍ନାକୁ ଆସିଲା ଯେତେବେଳେ ପରିବା ବିକାଳୀ ଧନ୍ନାଲାଲ୍ ସେନୀଙ୍କ ମୃତଦେହ ଜଙ୍ଗଲରୁ ଠାବ ହେଲା । ଧନ୍ନାଲାଲଙ୍କ ପତ୍ନୀ ଗୋପାଲୀ ଦେବୀଙ୍କ ଦୀନଦୟାଲ୍ ନାମକ ବ୍ୟକ୍ତିଙ୍କ ସହ ପ୍ରେମସମ୍ବନ୍ଧ ଗଢିଉଠିଥିଲା । ବିବାହ ସତ୍ତ୍ବେ ୫ ବର୍ଷ ପରକୀୟା ପ୍ରୀତିରେ ଦୁହେଁ ଥିଲେ ଯାହାର ସନ୍ଦେହ ଧନ୍ନାଲାଲଙ୍କୁ ହୋଇଥିଲା । ସମୟକ୍ରମେ ଦୁହିଁଙ୍କୁ ଅପ୍ରୀତିକର ସ୍ଥିତିରେ ଧରିଥିଲେ ଧନ୍ନାଲାଲ୍ ଆଉ ତା’ପରେ ବାଟର କଣ୍ଟାକୁ ହଟାଇବାକୁ ଆରମ୍ଭ ହୋଇଥିଲା ଯୋଜନା । ପ୍ରଥମେ କଥା ହେବା ବାହାନାରେ ପରିତ୍ୟକ୍ତ ସ୍ଥାନକୁ ଡାକି ଲୁହାରଡରେ ଲହୁଲୁହାଣ କଲେ ଆଉ ତା’ପରେ ବସ୍ତାରେ ଧନ୍ନାଲାଲଙ୍କୁ ଭର୍ତ୍ତି କରି ବାଇକରେ ବସାଇ ଜଙ୍ଗଲରେ ନେଇ ଜାଳିଦେଲେ । ଦୁଃଖର କଥା ହେଉଛି ନଡିଆ କତାକୁ ପ୍ରେସର ଦେଇ ବସ୍ତାରେ ଭର୍ତ୍ତି କଲା ପରି ସ୍ବାମୀକୁ ବସ୍ତାରେ ଭର୍ତ୍ତି କରିଥିଲେ ସ୍ତ୍ରୀ । ଗୋଡ଼ ଦୁଇଟିକୁ ଏମିତି ମୋଡିଥିଲେ ଯେ ଅର୍ଦ୍ଧଦଗ୍ଧ ଶବଟି ଯେତେବେଳେ ମିଳିଥିଲା ତାହା ଆଣ୍ଠୁମାଡି ଜଳିଥିବାର ଚିତ୍ର ସାମ୍ନାକୁ ଆସିଥିଲା । ଜଣେ ପତ୍ନୀ ଏତେ ନିର୍ଦ୍ଦୟୀ କେମିତି ହୋଇପାରେ ଏହାର ଉଦାହରଣ ସମାଜକୁ ଦେଇ ଥାନାର ଅନ୍ଧକାରରେ ଏବେ ପାପର ପ୍ରାୟଶ୍ଚିତ କରୁଛନ୍ତି ଗୋପାଲୀ ଦେବୀ ଏବଂ ଦୀନଦୟାଲ୍ । 

ବର୍ତ୍ତମାନ ଠିକ୍ ସମାନ ଭାବେ ଆଉ ଏକ ଖବର ସାମ୍ନାକୁ ଆସିଛି ଯେଉଁଥିରେ ବିବାହର ମାତ୍ର ୧୫ ଦିନ ପରେ ସ୍ବାମୀକୁ ମାରିଦେଇଛି ନବବିବାହିତା ସ୍ତ୍ରୀ । ଘଟଣାଟି ଉତ୍ତରପ୍ରଦେଶ ଓରେୟାର ବୋଲି କୁହାଯାଉଛି । ଯେଉଁଠାରେ ସ୍ବାମୀକୁ ମାରିବା ପାଇଁ ସ୍ତ୍ରୀ ୨ ଲକ୍ଷ ଟଙ୍କା ସୁପାରୀ ଦେଇଥିଲା । ଦିଲ୍ଲୀପ ଏବଂ ପ୍ରଗତୀଙ୍କ ବିବାହ ଧୁମଧାମରେ ହୋଇଥିବା ବେଳେ ପ୍ରଗତୀ ପୂର୍ବରୁ ଅନୁରାଗ ନାମକ ଜଣେ ଯୁବକଙ୍କୁ ଭଲ ପାଉଥିଲେ ଏବଂ ବିବାହରେ ଖୁସି ନଥିଲେ । ଯେତେବେଳେ ଅନୁରାଗ ଏବଂ ପ୍ରଗତୀଙ୍କ ମିଳନରେ ବାଧା ଉପୁଜିଲା ରାସ୍ତାର କଣ୍ଟା ଦିଲ୍ଲୀପକୁ ହଟାଇବା ପାଇଁ ଦୁହେଁ ସୁପାରୀ କିଲରଙ୍କ ସହ କଣ୍ଟାକ୍ଟ କଲେ ଏବଂ ପ୍ଲାନିଂ ଅନୁସାରେ ହତ୍ୟାକାଣ୍ଡ ରଚାଗଲା , ଯାହା ସଫଳ ମଧ୍ୟ ହେଲା । ଆଉ ଶେଷରେ ପୁଲିସ୍ ପ୍ରଗତୀ , ଅନୁରାଗ ଏବଂ ଉକ୍ତ ସୁପାରୀ କିଲରକୁ ଧରିବାରେ ମଧ୍ୟ ସଫଳ ହେଲା । 

ବର୍ତ୍ତମାନ ପ୍ରତିଦିନ ଏହିଭଳି ଘଟଣା ସାମ୍ନାକୁ ଆସୁଛି । ସଂପର୍କ ଯଦି ସୁହାଉନି ଏହାର ବିକଳ୍ପ ଆଇନ୍ ବ୍ୟବସ୍ଥା ମଧ୍ୟ ରହିଛି । କିନ୍ତୁ ଜୀବନରୁ ମାରିଦେବା କେତେ ଯେ ଠିକ୍ ଏହାର ବିଚାର କରିବାର ସମୟ ଆସିଛି ।