କେମିତି ଆକ୍ରମଣ କରିଥିଲେ ଆତଙ୍କବାଦୀ ? କାଶ୍ମୀର ଛାଡୁଛନ୍ତି ପର୍ଯ୍ୟଟକ

କନକ ବ୍ୟୁରୋ : ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ଏଯାଏଁ ୨୮ ଜଣଙ୍କର ମୃତ୍ୟୁ ହୋଇଥିବା ସୂଚନା ଆସୁଛି । ପହଲଗାମର ବୈସରନ ଘାଟିରେ ମଙ୍ଗଳବାର ଦିନ ୨.୪୫ ରେ ହୋଇଥିବା ଆତଙ୍କୀ ଆକ୍ରମଣରେ ୨୦ ରୁ ଅଧିକ ପର୍ଯ୍ୟଟକ ଆହତ ହୋଇଥିବାର ସୂଚନା ଆସୁଛି । ଦ ରେଜିଷ୍ଟାନ୍ସ ଫ୍ରଣ୍ଟ ଅର୍ଥାତ୍ TRF ଏହି ଆକ୍ରମଣର ଦାୟିତ୍ବ ନେଇଛି । ଗୁଳି ବିନିମୟ ପରେ ଆତଙ୍କବାଦୀମାନେ ଘଟଣାସ୍ଥଳରୁ ଖସି ପଳାଇଥିଲେ । ଗୁଇନ୍ଦା ସୂତ୍ରରୁ ଜଣାପଡିଛି ଯେ ପହଲଗାମ ଆକ୍ରମଣରେ ୨ ଜଣ ପାକିସ୍ତାନୀ ଆତଙ୍କବାଦୀ ଏବଂ ୨ ଜଣ ସ୍ଥାନୀୟ ଆତଙ୍କବାଦୀ ସାମିଲ୍ ଥିଲେ । ପର୍ଯ୍ୟଟକଙ୍କ ଉପରେ ଆତଙ୍କୀଙ୍କ ଆକ୍ରମଣ ଖବର ପାଇବା ମାତ୍ରେ ପ୍ରଧାନମନ୍ତ୍ରୀ ମୋଦୀ ସାଉଦି ଆରବର ୨ ଦିନିଆ ଗସ୍ତ ବାତିଲ୍ କରି ବୁଧବାର ସକାଳେ ଭାରତ ଫେରି ଆସିଛନ୍ତି । ଏହି ଆତଙ୍କୀ ଆକ୍ରମଣରେ ନେପାଳ ଏବଂ ୟୁଏଇର ନାଗରିକ ମଧ୍ୟ ପ୍ରାଣ ହରାଇଛନ୍ତି । ଏହାଛଡ଼ା ଜଣେ ଆଇବି ଅଫିସର ଏବଂ ଜଣେ ନୌସେନା ଅଧିକାରୀ ଲେଫ୍ଟନାଣ୍ଟ୍ ବିନୟ ନରୱାଲଙ୍କୁ ମଧ୍ୟ ଆତଙ୍କୀ ଗୁଳି କରି ହତ୍ୟା କରିଛନ୍ତି । 

ତେବେ ଗୃହମନ୍ତ୍ରୀ ଅମିତ୍ ଶାହ ପହଲଗାମ୍ ପହଞ୍ଚି ମୃତକଙ୍କୁ ଶ୍ରଦ୍ଧାଞ୍ଜଳି ଦେବା ସହ ପୀଡ଼ିତ ପରିବାରଙ୍କୁ ସମବେଦନା ଜଣାଇଛନ୍ତି । ସେ ଏଲଜି ମନୋଜ ସିହ୍ନା ଏବଂ ମୁଖ୍ୟମନ୍ତ୍ରୀ ଓମାର୍ ଅବଦୁଲ୍ଲାଙ୍କ ସହ ମଧ୍ୟ ବୈଠକ କରିଛନ୍ତି । ଆତଙ୍କୀଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ନେବାକୁ କୁହାଯାଇଛି । ସୂଚନା ଅନୁସାରେ , ପର୍ଯ୍ୟଟକ ଘାଟିରେ ଅଶ୍ବାରୋହଣ କରିବା ସମୟରେ ଆତଙ୍କବାଦୀ ସେଠାରେ ପହଞ୍ଚିଥିଲେ ଏବଂ ପଞ୍ଜାବୀ ଭାଷାରେ ସେମାନଙ୍କୁ ଧର୍ମ ପଚାରିଥିଲେ । ସମସ୍ତଙ୍କ ପରିଚୟ ଜାଣିବା ପରେ ନର ରାକ୍ଷସ ଆରମ୍ଭ କରିଥିଲେ ଗୁଳିବର୍ଷା । ପାଖାପାଖି ୫୦ ରାଉଣ୍ଡ ଫାୟାରିଂ କରି ନିରୀହଙ୍କୁ ମାରି ପକାଇଲେ ଆତଙ୍କବାଦୀ । ସୂତ୍ର ଅନୁସାରେ , ମୃତକଙ୍କ ମଧ୍ୟରେ ଅଧିକାଂଶ ପୁରୁଷ ରହିଛନ୍ତି । ଏମିତିକି ନାଁ ପଚାରି ପଚାରି ଗୁଳି ମାରିଥିବା ଖବର ମଧ୍ୟ ଜାତୀୟ ଗଣମାଧ୍ୟମରୁ ସୂଚନା ମିଳୁଛି । 

ଗୃହମନ୍ତ୍ରୀ ଅମିତ୍ ଶାହ ଘଟଣାକୁ ଗମ୍ଭୀରତାର ସହ ନେଇ ଗୋଟିଏ ଉଚ୍ଚସ୍ତରୀୟ ବୈଠକ ଡାକିଛନ୍ତି । ଏହି ମିଟିଂରେ ସେନା ସମେତ ସିଆରପିଏଫ୍ , ଜମ୍ମୁ-କାଶ୍ମୀର ପୁଲିସ , ଉପରାଜ୍ୟପାଳ ମନୋଜ କୁମାର ସିହ୍ନା ଭିଡିଓ କନଫରେନ୍ସ ମାଧ୍ୟମରେ ଯୋଡି ହେବେ ବୋଲି ସୂଚନା ରହିଛି । ଗୁଇନ୍ଦା ବିଭାଗ ମୁତାବକ ଆତଙ୍କୀ ପର୍ଯ୍ୟଟକଙ୍କୁ ଟାର୍ଗେଟ୍ କରିବାର ଉଦ୍ଦେଶ୍ୟରେ ଥିଲେ ଏବଂ ପର୍ଯ୍ୟଟକଙ୍କୁ ମାରି ମଧ୍ୟ ଦେଲେ । ଖରାକୁ ଦୃଷ୍ଟିରେ ରଖି ଅଧିକ ପର୍ଯ୍ୟଟକ କାଶ୍ମୀର ଘାଟିକୁ ବୁଲିବାକୁ ଆସନ୍ତି ଯାହାର ଫାଇଦା ଉଠାଇଲେ ଆତଙ୍କବାଦୀ । ଯୋଜନାବଦ୍ଧ ଭାବେ ଅନେକଙ୍କ ଜୀବନ ନେଇଗଲେ । ତେବେ ଆତଙ୍କୀ ଆକ୍ରମଣ ପରେ କୋକୁଆ ଭୟରେ ଅଛନ୍ତି ଲୋକେ । ଜମ୍ମୁ-କାଶ୍ମୀର ଛାଡୁଛନ୍ତି ପର୍ଯ୍ୟଟକ । ଶ୍ରୀନଗର ଏୟାରପୋର୍ଟରେ ଲାଗିଛି ପର୍ଯ୍ୟଟକଙ୍କ ଲମ୍ବା ଲାଇନ୍ । ପ୍ରବଳ ଭିଡ଼ ଭିତରେ ଲୋକଙ୍କୁ ସୁରକ୍ଷିତ ସେବା ଯୋଗାଇ ଦେବା ପାଇଁ ଏୟାର ଇଣ୍ଡିଆର ୨ ଟି ସ୍ବତନ୍ତ୍ର ବିମାନ ବ୍ୟବସ୍ଥା କରାଯାଇଛି ।