ଗତ କିଛି ଦିନ ଧରି ଉତ୍ତରପ୍ରଦେଶର ନୂଆ ଆତଙ୍କ ପାଲଟିଛି ବ୍ଲୁ ଡ୍ରମ୍ । ସୋସିଆଲ୍ ମିଡିଆରେ ବି ନୀଳ ଡ୍ରମକୁ ନେଇ ଭାରି ଚର୍ଚ୍ଚା । ଏହି ଡ୍ରମର ଚର୍ଚ୍ଚା ସେତେବେଳେ ଆରମ୍ଭ ହେଲା ଯେତେବେଳେ ସୌରଭ ନାମକ ଜଣେ ଯୁବକଙ୍କୁ ଅତି ନିର୍ମମ ଭାବରେ ତାଙ୍କ ପତ୍ନୀ ମୁସ୍କାନ୍ ହତ୍ୟା କରିଥିଲେ । ପରକୀୟା ପ୍ରୀତି ପାଇଁ ପ୍ରେମିକ ସାହିଲ୍ ସହ ମିଶି ମୁସ୍କାନ୍ ସ୍ବାମୀଙ୍କୁ ୧୫ ଖଣ୍ଡ କରି କାଟି ନୀଳ ଡ୍ରମରେ ସିମେଣ୍ଟ୍ ଦେଇ ଭର୍ତ୍ତି କରିଥିଲେ । ଘଟଣାକୁ ବହୁ ଦିନ ବିତି ଯାଇଥିଲେ ବି ବ୍ଲୁ ଡ୍ରମର ଟ୍ରେଣ୍ଡ୍ କମିବାର ନାଁ ନେଉନି । କେତେବେଳେ ରିଲ୍ ତ କେତେବେଳେ ସିନେମା ଗୀତରେ ଦେଖିବାକୁ ମିଳିଲାଣି ଏହି ନୀଳ ଡ୍ରମ୍ । ଏମିତିକି ଏବେ ଲୋକ ମଧ୍ୟ ନୀଳ ଡ୍ରମ୍ କିଣିବାକୁ ଭୟ କରୁଛନ୍ତି । ଡ୍ରମ୍ ବ୍ୟବସାୟକୁ ନେଇ ପ୍ରସିଦ୍ଧ ଅଲ୍ଲିଗଡ଼ରେ ଡ୍ରମ୍ ବେପାରୀଙ୍କ ବ୍ୟବସାୟ ମାନ୍ଦାରେ ଚାଲିଛି କହିଲେ ଚଳେ । ଯାହାକୁ ଦେଖ ଆତଙ୍କର ଅନ୍ୟନାମ ବ୍ଲୁ ଡ୍ରମ୍ ବୋଲି କହୁଛନ୍ତି । 

Advertisment

ତେବେ ଟ୍ରେଣ୍ଡକୁ ନଜରରେ ରଖି ଗୋଟିଏ ବିବାହ ସମାରୋହରେ ବରର ସାଙ୍ଗମାନେ ବର ଏବଂ ବଧୂଙ୍କୁ ବ୍ଲୁ ଡ୍ରମ୍ ଉପହାର ଦେଇଥିଲେ । ଯାହା ଏବେ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହେଉଛି । ଘଟଣାଟି ଉତ୍ତରପ୍ରଦେଶର ହମୀରପୁରର ବୋଲି ଜଣାପଡ଼ିଛି । ଯେଉଁଠି ବରବଧୂଙ୍କୁ ବର ସାଙ୍ଗମାନେ ବ୍ଲୁ ଡ୍ରମ୍ ଉପହାର ସ୍ବରୂପ ଦେଇଛନ୍ତି । ଖାଲି ଏତିକି ନୁହଁ ଡ୍ରମ୍ ଦେବା ସମୟରେ ବନ୍ଧୁମାନେ କହିଥିଲେ ଯେ ‘ଭାଉଜ ନିଅ ଉପହାର ଭବିଷ୍ୟତରେ କାମ ଦେବ ।’ ଏହି ନୀଳଡ୍ରମକୁ ଦେଖି ରିସେପସନରେ ଆସିଥିବା ଅତିଥି ମଧ୍ୟ ହକ୍କାବକ୍କା ହୋଇ ଚାହିଁଛନ୍ତି । ତେବେ ଏହି ଭିଡିଓଟି ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି ଯାହାକୁ ଦେଖି ୟୁଜର୍ସ ଭିନ୍ନ ଭିନ୍ନ ପ୍ରତିକ୍ରିୟା ଦେଉଛନ୍ତି । କିଏ କହୁଛନ୍ତି ‘ହତ୍ୟା ଘଟଣାକୁ ମଜା କରିସାରିଲେଣି ।’ ଆଉ କିଏ କହୁଛନ୍ତି , ‘ଏମିତିକା ସାଙ୍ଗ ଭଗବାନ କାହାକୁ ନ ଦିଅନ୍ତୁ ।’