କିଏ ଦେବେନ୍ଦ୍ର ସିଂ ବୋରା ?  ଯାହାଙ୍କ ବଲରେ ଖାତା ଖୋଲି ପାରିଲେନି ରୋହିତ

କନକ ବ୍ୟୁରୋ:  ରୋହିତ ଶର୍ମା ବିଜୟ ହଜାରେ ଟ୍ରଫିରେ ସିକ୍କିମ ବିପକ୍ଷରେ ୯୪ ବଲରେ ୧୫୫ ରନର ଏକ ବିସ୍ଫୋରକ ପାଳି ଖେଳି ପ୍ରଶଂସକଙ୍କୁ ବହୁତ ମନୋରଞ୍ଜନ କରିଥିଲେ । କିନ୍ତୁ ଦୁଇ ଦିନ ପରେ ହିଁ ସମ୍ପୂର୍ଣ୍ଣ ବିପରୀତ ଦୃଶ୍ୟ ଦେଖିବାକୁ ମିଳିଥିଲା । ରୋହିତ ଏଥର ଉତ୍ତରାଖଣ୍ଡ ବିପକ୍ଷ ମ୍ୟାଚରେ ଖାତା ମଧ୍ୟ ଖୋଲିପାରିଲେ ନାହିଁ । ଜୟପୁରର ସୱାଇ ମାନସିଂହ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚରେ ରୋହିତ ଆଉଟ୍ ହେବା ଦେଖି ପ୍ରଶଂସକମାନେ ବହୁତ ନିରାଶ ହୋଇଥିଲେ । ହଜାର ହଜାର ସଂଖ୍ୟାରେ ପ୍ରଶଂସକ 'ହିଟମ୍ୟାନ୍'ଙ୍କ ବ୍ୟାଟିଂ ଦେଖିବାକୁ ଷ୍ଟାଡିୟମକୁ ଆସିଥିଲେ । ରୋହିତ ଶର୍ମା ମୁମ୍ବାଇ ଇନିଂସର ନିଜର ପ୍ରଥମ ବଲରେ ହିଁ ଆଉଟ୍ ହୋଇଥିଲେ। ଅର୍ଥାତ୍ ସେ 'ଗୋଲଡେନ ଡକ୍'ର ଶିକାର ହୋଇଥିଲେ । ରୋହିତଙ୍କୁ ଉତ୍ତରାଖଣ୍ଡର ଦ୍ରୁତ ବୋଲର ଦେବେନ୍ଦ୍ର ସିଂ ବୋରା ଆଉଟ୍ କରି ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲେ । ବୋରା ସଠିକ୍ ଲାଇନ୍-ଲେନ୍ଥରେ ବଲ୍ ପକାଇଥିଲେ, ଯାହା ଉପରେ ରୋହିତ ଏକ ପୁଲ୍ ଶଟ୍ ଖେଳିଥିଲେ । ଶଟ୍‌ର ଟାଇମିଂ ଠିକ୍ ନଥିଲା ଏବଂ ଜଗମୋହନ ନାଗରକୋଟି ଡିପ୍ ଫାଇନ୍ ଲେଗରେ କ୍ୟାଚ୍ ଧରିଥିଲେ ।

ଅଧିକ ପଢନ୍ତୁ:  ସବୁଠାରୁ କମ୍ ବୟସର ଶତକବୀର ; କେହି ନାହିଁ ବୈଭବଙ୍କ ଟକ୍କରରେ

ପ୍ରଥମ ପ୍ରୟାସରେ ନାଗରକୋଟିଙ୍କ ହାତରୁ ବଲ୍ ଖସିଯାଇଥିଲା, କିନ୍ତୁ ଦ୍ୱିତୀୟ ପ୍ରୟାସରେ ସେ ବଲକୁ ନିଜ ଆୟତ୍ତକୁ ନେଇଥିଲେ । ୨୫ ବର୍ଷୀୟ ଦେବେନ୍ଦ୍ର ସିଂ ବୋରାଙ୍କ ପାଇଁ ରୋହିତ ଶର୍ମାଙ୍କ ଏହି ୱିକେଟ୍ ଅତ୍ୟନ୍ତ ସ୍ୱତନ୍ତ୍ର ଥିଲା । ହେବ ନାହିଁ ବା କାହିଁକି.. ସେ ଭାରତୀୟ କ୍ରିକେଟର ଜଣେ ଦିଗ୍‌ଗଜ ବ୍ୟାଟରଙ୍କୁ ଆଉଟ୍ କରିଥିଲେ । ଏହି ୱିକେଟ୍ ପରେ ଦେବେନ୍ଦ୍ର ଚର୍ଚ୍ଚାକୁ ଆସିଛନ୍ତି। ବିଶେଷ କଥା ହେଉଛି ରୋହିତ ଗତ ମ୍ୟାଚରେ ଏକ ଚମତ୍କାର ଶତକ ହାସଲ କରି ଜବରଦସ୍ତ ଫର୍ମରେ ଥିଲେ, ଏପରି ପରିସ୍ଥିତିରେ ତାଙ୍କୁ ଆଉଟ୍ କରିବା ସହଜ ନଥିଲା । ଦାହାଣହାତୀ ଦ୍ରୁତ ବୋଲର ଦେବେନ୍ଦ୍ର ସିଂ ବୋରା ନିଜ କ୍ୟାରିୟରର ମାତ୍ର ତୃତୀୟ ଲିଷ୍ଟ-ଏ ମ୍ୟାଚ୍ ଖେଳୁଥିଲେ । ରୋହିତ ଶର୍ମାଙ୍କ ରୂପରେ ସେ ଲିଷ୍ଟ-ଏ କ୍ରିକେଟରେ ନିଜର ପଞ୍ଚମ ୱିକେଟ୍ ନେଇଥିଲେ ।

ଅଧିକ ପଢନ୍ତୁ:  ବିଜୟ ହଜାରେ ଟ୍ରଫିରେ ସ୍ଵସ୍ତିକଙ୍କ ଡବଲ ସେଞ୍ଚୁରି; ଓଡ଼ିଶାର ପ୍ରଥମ ବ୍ୟାଟର ଭାବେ ରଚିଲେ ଇତିହାସ

ରୋହିତଙ୍କ ୱିକେଟ୍ ନେବା ନିଶ୍ଚିତ ଭାବରେ ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରେ ତାଙ୍କ ଆତ୍ମବିଶ୍ୱାସ ବଢ଼ାଇବ । ଏହାପୂର୍ବରୁ ହିମାଚଳ ପ୍ରଦେଶ ବିପକ୍ଷ ମ୍ୟାଚରେ ମଧ୍ୟ ବୋରା ଚମତ୍କାର ପ୍ରଦର୍ଶନ କରିଥିଲେ । ହିମାଚଳ ପ୍ରଦେଶ ବିପକ୍ଷରେ ଦେବେନ୍ଦ୍ର ସିଂ ବୋରା ୪୪ ରନ୍ ଦେଇ ୪ଟି ୱିକେଟ୍ ଅକ୍ତିଆର କରିଥିଲେ ଏବଂ ବିଜୟ ହଜାରେ ଟ୍ରଫି ୨୦2୫-୨୬ ର ଆରମ୍ଭ ଦମଦାର ଅନ୍ଦାଜରେ କରିଥିଲେ । ଫାଷ୍ଟ କ୍ଲାସ୍ କ୍ୟାରିୟର କଥା କହିଲେ, ଦେବେନ୍ଦ୍ର ସିଂ ବୋରା ଏପର୍ଯ୍ୟନ୍ତ ଉତ୍ତରାଖଣ୍ଡ ପାଇଁ ୧୫ଟି ମ୍ୟାଚରେ ୩୦ଟି ୱିକେଟ୍ ନେଇଛନ୍ତି । ଏହି ସମୟରେ ତାଙ୍କର ହାରାହାରି ୪୧.୧୩ ଏବଂ ଷ୍ଟ୍ରାଇକ୍ ରେଟ୍ ୬୯.୭ ରହିଛି । ଦେବେନ୍ଦ୍ର ବୋରା ଏହାପୂର୍ବରୁ ଉତ୍ତରାଖଣ୍ଡ ପ୍ରିମିୟର ଲିଗ୍ ୨୦୨୫ରେ ମଧ୍ୟ ଭଲ ପ୍ରଦର୍ଶନ କରିଥିଲେ । ସେ ଦେହରାଦୂନ ୱାରିୟର୍ସ ଦଳର ଅଂଶ ଥିଲେ, ଯେଉଁଠାରେ ସେ ମାତ୍ର ୬ଟି ମ୍ୟାଚରେ ୧୦ଟି ୱିକେଟ୍ ଚଟକାଇଥିଲେ । ପ୍ରାୟ ପ୍ରତ୍ୟେକ ମ୍ୟାଚରେ ସେ ନିଜ ଦଳ ପାଇଁ ଗୁରୁତ୍ୱପୂର୍ଣ୍ଣ ଅବଦାନ ଦେଇ ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ ।