କନକ ବ୍ୟୁରୋ: ଓଡ଼ିଶା କ୍ରିକେଟ୍ ପାଇଁ ବୁଧବାର, ୨୪ ଡିସେମ୍ବର ଦିନଟି ଐତିହାସିକ ପାଲଟିଯାଇଛି । ଓପନିଂ ବ୍ୟାଟର ସ୍ୱସ୍ତିକ ସାମଲ ବିଜୟ ହଜାରେ ଟ୍ରଫିର ଏକ ମ୍ୟାଚରେ ସୌରାଷ୍ଟ୍ର ବିପକ୍ଷରେ ଆଲୁରଠାରେ ଏକ ସ୍ମରଣୀୟ ପାଳି ଖେଳି ନିଜ ନାମକୁ ଇତିହାସ ପୃଷ୍ଠାରେ ଲିପିବଦ୍ଧ କରିଛନ୍ତି । ଏହି ଡାହାଣହାତୀ ବ୍ୟାଟର ୧୬୯ ବଲରେ ୨୧୨ ରନ୍ ସଂଗ୍ରହ କରି କେବଳ ନିଜ ଦଳକୁ ଏକ ଶକ୍ତିଶାଳୀ ସ୍ଥିତିରେ ପହଞ୍ଚାଇ ନାହାନ୍ତି, ବରଂ ଲିଷ୍ଟ-ଏ କ୍ରିକେଟରେ ଓଡ଼ିଶା ପକ୍ଷରୁ ଦ୍ୱିଶତକ ହାସଲ କରିଥିବା ପ୍ରଥମ ଖେଳାଳି ଭାବେ ଇତିହାସ ରଚିଛନ୍ତି ।

Advertisment

ସାମଲଙ୍କ ଏହି ପାଳି ବିଜୟ ହଜାରେ ଟ୍ରଫି ଇତିହାସରେ ପଞ୍ଚମ ସର୍ବୋଚ୍ଚ ବ୍ୟକ୍ତିଗତ ସ୍କୋର ମଧ୍ୟ ହୋଇଛି । ଏହି ସମୟରେ ସେ ୨୦୧୯ ମସିହାରେ ଯଶସ୍ୱୀ ଜୟସ୍ୱାଲଙ୍କ ଦ୍ୱାରା କରାଯାଇଥିବା ୨୦୩ ରନର ରେକର୍ଡକୁ ପଛରେ ପକାଇ ଦେଇଛନ୍ତି । ତାଙ୍କର ଚମତ୍କାର ବ୍ୟାଟିଂ ବଳରେ ଓଡ଼ିଶା ନିଜର ୫୦ ଓଭରରେ ୬ ଉଇକେଟ ହରାଇ ୩୪୫ ରନର ଏକ ବିଶାଳ ସ୍କୋର ଛିଡ଼ା କରିଛି, ଯାହା ସୌରାଷ୍ଟ୍ର ଭଳି ଶକ୍ତିଶାଳୀ ଦଳ ବିରୋଧରେ ଏକ ବଡ଼ ସଫଳତା ବୋଲି କୁହାଯାଉଛି । ସ୍ୱସ୍ତିକ ସାମଲ ନିକଟରେ ନିଜ ସାଥୀ ଖେଳାଳି ରାଜେଶ ମହାନ୍ତିଙ୍କ ସହ ଆଇପିଏଲ୍ ୨୦୨୬ ନିଲାମରେ ସାମିଲ ହୋଇଥିଲେ, କିନ୍ତୁ ଉଭୟଙ୍କୁ କୌଣସି କ୍ରେତା ମିଳିନଥିଲେ ।

ଅଧିକ ପଢ଼ନ୍ତୁ : ବଡ଼ ଇଭେଣ୍ଟ ହେବ ବିଜୟ ହଜାରେ; ଟୁର୍ଣ୍ଣାମେଣ୍ଟ ଖେଳୁଛି ଅଧା ଟିମ୍ ଇଣ୍ଡିଆ

ତଥାପି, ଏହି ପାଳି ଜରିଆରେ ସାମଲ ପ୍ରମାଣ କରିଛନ୍ତି ଯେ ସେ ବଡ଼ ମଞ୍ଚ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି । ଏହି ୨୫ ବର୍ଷୀୟ ବ୍ୟାଟର ଓଡ଼ିଶା ପାଇଁ ପାଳି ଆରମ୍ଭ କରି ଦଳକୁ ଏକ ଦୃଢ଼ ଭିତ୍ତିଭୂମି ଦେଇଥିଲେ, କିନ୍ତୁ ଓମ୍, ସନ୍ଦୀପ ପଟ୍ଟନାୟକ ଏବଂ ଗୋବିନ୍ଦ ପୋଦ୍ଦାର ଶୀଘ୍ର ଆଉଟ୍ ହୋଇଯିବା ଫଳରେ ଦଳ ୧୧.୫ ଓଭରରେ ୫୯ ରନରେ ୩ଟି ୱିକେଟ ହରାଇ ବସିଥିଲା ।

ଏହି କଠିନ ସମୟରେ ସାମଲ ଅଧିନାୟକ ବିପ୍ଳବ ସାମନ୍ତରାୟଙ୍କ ସହ ମିଶି ପାଳିକୁ ସମ୍ଭାଳିଥିଲେ । ଉଭୟ ଚତୁର୍ଥ ଓ୍ବିକେଟ ପାଇଁ ୨୧୧ ବଲରେ ୨୬୧ ରନର ଏକ ବିଶାଳ ଭାଗିଦାରୀ କରିଥିଲେ, ଯାହା ମ୍ୟାଚର ଗତିପଥ ବଦଳାଇ ଦେଇଥିଲା । ଏହି ଭାଗିଦାରୀରେ ସାମନ୍ତରାୟ ମଧ୍ୟ ଶତକ ହାସଲ କରିଥିବା ବେଳେ ସାମଲ ଏକାକୀ ୧୫୬ ରନ୍ ଯୋଡ଼ିଥିଲେ । ସେ ଶେଷ ଓଭରର ଚତୁର୍ଥ ବଲରେ ଆଉଟ୍ ହୋଇଥିଲେ, କିନ୍ତୁ ସେତେବେଳକୁ ଓଡ଼ିଶା ଏକ ବଡ଼ ସ୍କୋରରେ ପହଞ୍ଚି ସାରିଥିଲା । ତାଙ୍କର ଏହି ପାଳିରେ ୨୧ଟି ଚୌକା ଏବଂ ୮ଟି ଛକା ସାମିଲ ଥିଲା, ଯାହା ତାଙ୍କର ଆକ୍ରମଣାତ୍ମକ ଚିନ୍ତାଧାରାକୁ ଦର୍ଶାଉଛି । ଓଡ଼ିଶା ପାଇଁ ଏହା ତାଙ୍କର ୧୪ତମ ଲିଷ୍ଟ-ଏ ମ୍ୟାଚ୍ ଥିଲା ଏବଂ ଏହା ସହିତ ସେ ଲିଷ୍ଟ-ଏ କ୍ରିକେଟରେ ଦ୍ୱିଶତକ ହାସଲ କରିଥିବା ୧୪ତମ ଭାରତୀୟ ବ୍ୟାଟର ହୋଇଛନ୍ତି ।