ବୋହୂ ହେବେ ସ୍ମୃତି ମନ୍ଧାନା

କନକ ବ୍ୟୁରୋ : ମହିଳା କ୍ରିକେଟରଙ୍କ ହାତରେ ଲାଗିବ ବିବାହର ମେହେନ୍ଦି । ଅନ୍ତର୍ଜାତୀୟ ମହିଳା କ୍ରିକେଟର ସ୍ମୃତି ମନ୍ଧାନା ଖୁବ୍ ଶୀଘ୍ର ଇନ୍ଦୋରର ବୋହୂ ହେବେ । ସ୍ମୃତି ଇନ୍ଦୋରର ଗାୟକ ଏବଂ ନିର୍ଦ୍ଦେଶକ ପଲାଶ ମୁଛଲଙ୍କୁ ବିବାହ କରିବାକୁ ଯାଉଛନ୍ତି । ଯାହାର ସୂଚନା ସ୍ମୃତିଙ୍କ ବୟଫ୍ରେଣ୍ଡ୍ ପଲାଶ ଦେଇଛନ୍ତି । ଇନ୍ଦୋରରେ ସାମ୍ବାଦିକମାନଙ୍କୁ ଏହି ସୂଚନା ଦେଇଛନ୍ତି ପଲାଶ । ସ୍ମୃତି ମନ୍ଧାନା ଭାରତୀୟ ମହିଳା କ୍ରିକେଟ ଦଳର ଜଣେ ପ୍ରମୁଖ ସଦସ୍ୟ ଏବଂ ବିଶ୍ୱକପ୍ ମ୍ୟାଚ୍ ଖେଳିବା ପାଇଁ ବର୍ତ୍ତମାନ ଇନ୍ଦୋର ଆସିଛନ୍ତି । ଭାରତ-ଇଂଲଣ୍ଡ ମ୍ୟାଚ୍ ଅକ୍ଟୋବର ୧୯ ତାରିଖରେ ଏଠାରେ ଖେଳାଯିବ । ପଲାଶ ମଧ୍ୟ ତାଙ୍କର ଆଗାମୀ ଚଳଚ୍ଚିତ୍ର "ରାଜୁ ବାଜେୱାଲା"ର ସୁଟିଂ ପାଇଁ ଇନ୍ଦୋରରେ ଅଛନ୍ତି ।

Advertisment

ଭାରତୀୟ ମହିଳା କ୍ରିକେଟ୍ ଦଳର ମ୍ୟାଚ୍ ଏବଂ ସ୍ମୃତି ମନ୍ଧାନାଙ୍କ ସମ୍ପର୍କରେ ପ୍ରଶ୍ନ ପଚାରିବାରୁ ପଲାଶ କହିଛନ୍ତି ଯେ ସ୍ମୃତି ଖୁବଶୀଘ୍ର ଇନ୍ଦୋରର ବୋହୂ ହେବେ । ତେବେ ସୂଚନା ଅନୁସାରେ ପଲାଶଙ୍କ ଭଉଣୀ ତଥା ବଲିଉଡ୍ ସିଙ୍ଗର୍ ପଲକ ମୁଛଲ ବିବାହ କରିବା ସମୟରେ ହିଁ ସ୍ମୃତି ଏବଂ ପଲାଶଙ୍କର ନିର୍ବନ୍ଧ ଶେଷ ହୋଇଥିଲା । ପ୍ରାୟ ଗୋଟିଏ ବର୍ଷ ପୂର୍ବରୁ ହିଁ ଦୁହେଁ ନିର୍ବନ୍ଧ କରିଥିଲେ ।

ତେବେ ମହିଳା ଏକଦିବସୀୟ ବିଶ୍ୱକପ୍ ୨୦୨୫ ରେ ଟିମ୍ ଇଣ୍ଡିଆର ଶେଷ ମ୍ୟାଚ୍ ଇଂଲଣ୍ଡ ବିପକ୍ଷରେ ଥିଲା, ଯେଉଁଠାରେ ଇଂଲଣ୍ଡ ୪ ରନରେ ବିଜୟୀ ହୋଇଥିଲା । ଏହି ମ୍ୟାଚ୍ ରେ ଭାରତ ପାଇଁ ହରମନପ୍ରୀତ କୌର, ସ୍ମୃତି ମନ୍ଧାନା ଏବଂ ଦୀପ୍ତି ଶର୍ମା ଚମତ୍କାର ଅର୍ଦ୍ଧଶତକ ହାସଲ କରିଥିଲେ । ଏହି ଅର୍ଦ୍ଧଶତକ ସହିତ, ସ୍ମୃତି ମନ୍ଧାନା ପୂର୍ବତନ ଭାରତୀୟ ମହିଳା କ୍ରିକେଟ କିମ୍ବଦନ୍ତୀ ମିତାଲି ରାଜଙ୍କ ରେକର୍ଡ ଭାଙ୍ଗିଛନ୍ତି। ସେ ଏବେ ମହିଳା ଏକଦିବସୀୟରେ ଭାରତ ପାଇଁ ଘରୋଇ ପରିବେଶରେ ସର୍ବାଧିକ ୫୦+ ସ୍କୋର କରିଥିବା ବ୍ୟାଟ୍ସମ୍ୟାନ୍ ହୋଇଯାଇଛନ୍ତି । ଯଦି ଆମେ ODI କ୍ରିକେଟରେ ସର୍ବାଧିକ ଥର ୫୦+ ରନ କରିଥିବା ମହିଳା ବ୍ୟାଟସମ୍ୟାନଙ୍କ ବିଷୟରେ କଥା ହେବା, ତେବେ ନ୍ୟୁଜିଲ୍ୟାଣ୍ଡର ସୁଜି ବେଟ୍ସଙ୍କ ନାମ ଶୀର୍ଷରେ ଅଛି । ବେଟ୍ସ ODIରେ ଘରୋଇ ପରିବେଶରେ ୨୮ ଥର ୫୦+ ରନର ଇନିଂସ ଖେଳିଛନ୍ତି । ଏବେ ସ୍ମୃତି ମନ୍ଧାନାଙ୍କ ନାମ ଦ୍ୱିତୀୟ ସ୍ଥାନରେ ଅଛି । ମନ୍ଧାନା ଏପର୍ଯ୍ୟନ୍ତ ୨୩ ଥର ODIରେ ଘରୋଇ ପରିବେଶରେ ୫୦+ ରନର ଇନିଂସ ଖେଳିଛନ୍ତି । ଏହି ତାଲିକାରେ ମିତାଲି ରାଜ ଏବଂ ଚାର୍ଲୋଟ ଏଡୱାର୍ଡସଙ୍କ ନାମ ମିଳିତ ଭାବରେ ତୃତୀୟ ସ୍ଥାନରେ ଅଛି । ଉଭୟ ୨୨ ଥର ODIରେ ଘରୋଇ ପରିବେଶରେ ୫୦+ ରନର ଇନିଂସ ଖେଳିଛନ୍ତି ।

ଘରୋଇ ପରିବେଶରେ ODIରେ ସର୍ବାଧିକ 50+ ସ୍କୋର କରିଥିବା ମହିଳା ଖେଳାଳି

୨୮ - ସୁଜି ବେଟ୍ସ (ନ୍ୟୁଜିଲ୍ୟାଣ୍ଡ)
୨୩ - ସ୍ମୃତି ମନ୍ଧାନା (ଭାରତ)
୨୨ - ଚାର୍ଲୋଟ ଏଡୱାର୍ଡସ୍ (ଇଂଲଣ୍ଡ)
୨୨ - ମିଥାଲି ରାଜ (ଭାରତ)