ତିକ୍ତ ହେବାରେ ଲାଗିଛି ଭାରତ-ବାଂଲାଦେଶ କୂଟନୈତିକ ସମ୍ପର୍କ,  ନୂଆଦିଲ୍ଲୀସ୍ଥିତ ଉଚ୍ଚାୟୋଗରେ ସମସ୍ତ କନସୁଲାର ଏବଂ ଭିସା ସେବା ବନ୍ଦ କଲା ବାଂଲା

କନକ ବ୍ୟୁରୋ: ଭାରତ ଏବଂ ବାଂଲାଦେଶ ମଧ୍ୟରେ ତିକ୍ତ ହେବାରେ ଲାଗିଛି କୂଟନୈତିକ ସମ୍ପର୍କ । ଏହା ଏବେ ଏକ ନୂତନ ଏବଂ ଗମ୍ଭୀର ମୋଡ଼ରେ ପହଞ୍ଚିଛି । ବାଂଲାଦେଶ ସୋମବାର ଏକପାଖିଆ ଭାବରେ ନୂଆଦିଲ୍ଲୀସ୍ଥିତ ଏହାର ଉଚ୍ଚାୟୋଗରେ ସମସ୍ତ କନସୁଲାର ଏବଂ ଭିସା ସେବାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ କରିଛି । ଅନିବାର୍ଯ୍ୟ ପରିସ୍ଥିତିକୁ ଦର୍ଶାଇ ବାଂଲାଦେଶୀ ଅଧିକାରୀମାନେ ସୋମବାର ଏହି ପଦକ୍ଷେପ ନେଇଛନ୍ତି । ଶନିବାର ଅଖଣ୍ଡ ହିନ୍ଦୁ ରାଷ୍ଟ୍ର ସେନାର ସଦସ୍ୟମାନେ ଦିଲ୍ଲୀରେ ହାଇକମିଶନ ସମ୍ମୁଖରେ ପ୍ରତିବାଦ କରିବା ପରେ ଏହି ପଦକ୍ଷେପ ନିଆଯାଇଛି । ୨୭ ବର୍ଷୀୟ ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କ ହତ୍ୟାର ପ୍ରତିବାଦରେ ଏହି ପ୍ରତିବାଦ କରାଯାଇଥିଲା । ପ୍ରଦର୍ଶନକାରୀମାନେ ମହମ୍ମଦ ୟୁନୁସଙ୍କ ନେତୃତ୍ୱାଧୀନ ସରକାର ବାଂଲାଦେଶରେ ହିନ୍ଦୁମାନଙ୍କୁ ସୁରକ୍ଷା ଦେବାକୁ ଦାବି କରିଥିଲେ ।

ଅଧିକ ପଢନ୍ତୁ:  ବାଂଲାଦେଶରେ ହିନ୍ଦୁ ଓ ଭାରତୀୟ ଦୂତାବାସ ଆକ୍ରମଣ ପରେ ବଢ଼ୁଛି ତିକ୍ତତା, ଚେତାବନୀ ଦେଲା ଋଷ, ୟୁନୁସ ସରକାରଙ୍କୁ ଦାୟୀ କଲେ ହସିନା

ବାଲାଂଦେଶୀ ଯୁବ ନେତା ସରିଫ ଓସମାନ ହାଦିଙ୍କ ମୃତ୍ୟୁ ପରେ ବାଂଲାଦେଶର ବିଭିନ୍ନ ସ୍ଥାନରେ ହିଂସା ଏବଂ ଭଙ୍ଗାରୁଜା ଘଟଣା ଦେଖିବାକୁ ମିଳୁଛି । ଭାରତୀୟ ହାଇକମିଶନରଙ୍କ ବାସଭବନ ଉପରେ ମଧ୍ୟ ପଥର ମାଡ଼ କରାଯାଇଥିଲା । ଡିସେମ୍ବର ୧୨ ତାରିଖରେ, ମୁହଁ ପିନ୍ଧା ବନ୍ଧୁକଧାରୀମାନେ ଢାକାର ମଧ୍ୟଭାଗରେ ଏକ ଘର ଉପରେ ଆକ୍ରମଣ କରିଥିଲେ । ବିଜୟନଗର ଅଞ୍ଚଳର ଇନକିଲାବ ମଞ୍ଚର ମୁଖପାତ୍ର ହାଦିଙ୍କ ମୁଣ୍ଡରେ ଗୁଳି ବାଜିଥିଲା । ପରେ ସିଙ୍ଗାପୁରରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । 
 

ନିର୍ଦ୍ଧାରିତ ସମୟରେ ହେବ ବାଂଲାଦେଶ ସାଧାରଣ ନିର୍ବାଚନ । ବର୍ତ୍ତମାନ ଚାଲିଥିବା ବ୍ୟାପକ ହିଂସାକାଣ୍ଡ ମଧ୍ୟରେ ଏଭଳି ଘୋଷଣା କରିଛନ୍ତି । ବାଂଲାଦେଶ ଅନ୍ତରୀଣ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍ । ସୋମବାର ଦିନ ସେ ପୁନର୍ବାର ଘୋଷଣା କରିଛନ୍ତି ଯେ ସାଧାରଣ ନିର୍ବାଚନ ନିର୍ଦ୍ଧାରିତ ସମୟ ଅନୁସାରେ ଫେବୃଆରୀ ୧୨ ଆସନ୍ତା ବର୍ଷ ତାରିଖରେ ଅନୁଷ୍ଠିତ ହେବ । ଦେଶର ଲୋକମାନେ ସେମାନଙ୍କର ମତଦାନ ଅଧିକାର ପ୍ରୟୋଗ କରିବାକୁ ଆଗ୍ରହୀ, ଯାହାକୁ ପୂର୍ବ ଏକଛତ୍ରବାଦୀ ସରକାର ଛଡ଼ାଇ ନେଇଥିଲା । ବିତାଡ଼ିତ ଏକଛତ୍ରବାଦୀ ଶାସନର ସମର୍ଥକମାନେ ନିର୍ବାଚନ ପ୍ରକ୍ରିୟାକୁ ବାଧା ଦେବା ପାଇଁ ଲକ୍ଷ ଲକ୍ଷ ଡଲାର ଖର୍ଚ୍ଚ କରୁଛନ୍ତି, ପଳାତକ ନେତା ହିଂସାକୁ ଉସୁକାଉଛନ୍ତି । ତଥାପି, ମଧ୍ୟବର୍ତ୍ତୀକାଳୀନ ସରକାର ଯେକୌଣସି ଚ୍ୟାଲେଞ୍ଜର ମୁକାବିଲା କରିବାକୁ ସମ୍ପୂର୍ଣ୍ଣ ପ୍ରସ୍ତୁତ ମହମ୍ମଦ ୟୁନୁସ୍ କହିଛନ୍ତି ।