ତଣ୍ଡ ଗଣୁଛନ୍ତି ଜନତା, ମୁଣ୍ଡ ନେଉଛି ଆମ ବସ୍‌: ଅନଭିଜ୍ଞ ଡ୍ରାଇଭରଙ୍କ ହାତରେ ଦିଆଯାଉଛି ଷ୍ଟିୟରିଂ

କନକ ବ୍ୟୁରୋ:  ଲୋକଙ୍କ ଗାଡ଼ିକୁ ଜଗୁଛନ୍ତି ସରକାର । କିନ୍ତୁ ସରକାରଙ୍କ ଅଧୀନରେ ଥିବା ଗାଡ଼ିକୁ ଜଗିବ କିଏ? ଆମେ କହୁଛୁ 'ଆମ ବସ୍‌' କଥା । ଭୁବନେଶ୍ୱରରେ ମର୍ମନ୍ତୁଦ ଦୁର୍ଘଟଣାକୁ ୩ ଦିନ ବିତିଥିଲେ ବି, ଏଯାଏଁ ଲୋକଙ୍କ ମନରୁ ଦୂରେଇନି ଅସନ୍ତୋଷ । ଗୋଟିଏ ପଟେ ଲୋକଙ୍କ ଉପରେ ବୋଝ ପରେ ବୋଝ ଲଦା ଚାଲିଥିବା ବେଳେ, ଆମ ବସ୍‌ ବିପଦର କାରଣ ପାଲଟିବା ସରକାରଙ୍କୁ ଜନତାଙ୍କ କାଠଗଡ଼ାରେ ଠିଆ କରିଛି ।      

ଆମକୁ ଏତେ ଜଗୁଛ, ‘ଆମ ବସ୍‌’କୁ ଜଗିବ କେବେ? 

ଆମ୍‌ ବସ୍‌ର ମତିଗତି ଦେଖି ସରକାରକୁ କିଛି ଏମିତି ପଚାରିବା ଆରମ୍ଭ କଲେଣି ଲୋକେ। ‘ଆମ ବସ୍‌’କୁ କହିଲେଣି ‘ଯମ ବସ୍‌’ । ଶନିବାର ଦୁର୍ଘଟଣା ପରେ, ସାମ୍ନାକୁ ଆସୁଛି ଅନେକ ଚାଞ୍ଚଲ୍ୟକର କଥା ।

ଅଧିକ ପଢନ୍ତୁ: ରାଜଧାନୀ ରାଜରାସ୍ତାରେ ଗଡ଼ିଲା ମୁଣ୍ଡ, ପୁଣି ଜୀବନ ନେଲା ‘ଆମ ବସ୍’

- ଡ୍ରାଇଭରଙ୍କର ଇଲେକ୍‌ଟ୍ରିକ୍ ବସ୍‌ରେ ଆଦୌ ଅଭିଜ୍ଞତା ନଥିଲା

- ଡିଜେଲ ବସ୍‌ର ଚାଳକ ସେଦିନ ପ୍ରଥମ ଥର ଇଲେକ୍‌ଟ୍ରିକ୍ ବସ୍ ଚଳାଉଥିଲେ

- ବସ୍‌ ଅଟକାଇବା ବେଳେ ଇ-ବସ୍‌ର ହ୍ୟାଣ୍ଡବ୍ରେକ୍ ଖୋଜି ପାଇନଥିଲେ

- ବିବ୍ରତ ହୋଇ ବ୍ରେକ୍ ବଦଳରେ ଆକ୍ସିଲେରେଟର୍ ଚାପି ଦେଇଥିଲେ 

ଏସବୁ ସତ ହୋଇଥିଲେ ସାଂଘାତିକ। ଇ- ବସ୍‌ରେ ତାଙ୍କୁ ପର୍ଯ୍ୟାପ୍ତ ତାଲିମ ଦିଆଯାଇଥିଲା କି ନାହିଁ, ତାହା ବଡ଼ ପ୍ରଶ୍ନ । ଗୋଟିଏ ଦୁର୍ଘଟଣା ପରେ, କ୍ରୁଟ୍‌ ଓ ପରିବହନ ବିଭାଗ ପକ୍ଷରୁ ଯାଞ୍ଚ କଡ଼ାକଡ଼ି କରାଯାଉଥିଲେ ବି, ପୁଣି ଦୁର୍ଘଟଣା ଘଟିଲେ ସେଇ ଅଧ୍ୟାୟର ପୁନରାବୃତ୍ତି ହେଲା ଭଳି ଲାଗୁଛି । ଏନେଇ ପ୍ରତିକ୍ରିୟା ରଖିଛନ୍ତି ନଗର ଉନ୍ନୟନ ମନ୍ତ୍ରୀ ।  ଫେବ୍ରୁଆରି ୧ରୁ ଗାଡ଼ି ମାଲିକଙ୍କ ଉପରେ ବଢ଼ିବ ଚାପ । ବୀମା ଓ ପ୍ରଦୂଷଣ ପ୍ରମାଣପତ୍ର ନଥିଲେ କିମ୍ୱା ଜରିମାନା ବାକି ଥିଲେ ଫାସ୍‌ଟ୍ୟାଗ୍ ସକ୍ରିୟ ହେବନି । ସାଧାରଣ ପରିବହନ ଗାଡ଼ିରେ ଲୋକେସନ୍ ଟ୍ରାକିଂ ଯନ୍ତ୍ର ବାଧ୍ୟତାମୂଳକ କରାଯାଇଛି । ଗାଡ଼ି ସ୍ପିଡ୍ ସାଇନ୍‌ ବୋର୍ଡ ନ ଲଗାଇ ଜୋରଜବରଦସ୍ତ ଜରିମାନା ଆଦାୟର ବି ଅଭିଯୋଗ ହେଉଛି ।  ଗୋଟିଏ ପଟେ ଗାଡ଼ି ମାଲିକ ଓ ଚାଳକଙ୍କ ଉପରେ ସରକାର ବୋଝ ଲଦି ଚାଲିଥିବା ବେଳେ, ଅନ୍ୟପଟେ ନିଜ ଅଧୀନରେ ଥିବା ଗାଡ଼ିର ବେପରୁଆପଣକୁ ଆଖି ବୁଜିଦେବା ଜନଅସନ୍ତୋଷର କାରଣ ପାଲଟିଛି ।