ଆଶା ଥିଲା ୬୦ ଟପିଲେ ମିଳିବ ବାର୍ଦ୍ଧକ୍ୟ ଭତ୍ତା,  ବୟସ ଗଡିଲେ ବି ସରକାରୀ ସହାୟତା ପାଇବାରୁ ଲକ୍ଷ ଲକ୍ଷ ବୃଦ୍ଧ-ବୃଦ୍ଧା ବଂଚିତ

କନକ ବ୍ୟୁରୋ:  ନା ବାହୁରେ ବଳ ଅଛି... ନା ଅଣ୍ଟିରେ ଧନ । ମୁଣ୍ଡ ଗୁଞ୍ଜିବାକୁ ଖପର ଘର... ପେଟ ପୋଷିବାକୁ ୨ ଗଣ୍ଡା ଛେଳି । ସ୍ଥିତି ଏମିତି ଯେ, ଘର ଖଣ୍ଡେ ସଜାଡ଼ିବାକୁ ବି ଜୁ ପାଉନି । ନୂଆପଡ଼ା ସଦର ବ୍ଲକ୍ ଗୁଡ଼ାପଥରା ଗାଁର ଗରିବ ବୃଦ୍ଧ ଦଂପତି ବୈଦ ବରିହା ଓ ବୁନ୍ଦଲି ବାଇ । ଆଶା ଥିଲା, ବୟସ ୬୦ ଟପିଲେ ବାର୍ଦ୍ଧକ୍ୟ ଭତ୍ତା ମିଳିବ । ସେଥିରେ କାଟିଦେବେ ବୁଢ଼ା ବୟସ ।

ଅଧିକ ପଢନ୍ତୁ ; ଏମିତି ଚାଲିଛି ସରକାରୀ ବ୍ୟବସ୍ଥା; ବାର୍ଦ୍ଧକ୍ୟ ଭତ୍ତା ପାଇଁ ଜଣଙ୍କ ମୃତ୍ୟୁକୁ ଅପେକ୍ଷା କରୁଛନ୍ତି ଯୋଗ୍ୟ ହିତାଧିକାରୀ

ହେଲେ ବିଡ଼ମ୍ୱନା.. ବାର୍ଦ୍ଧକ୍ୟ ଭତ୍ତା ଏବେ ବି ସାତ ସପନ । କେତେ ହାରି ଗୁହାରି କରିଥିଲେ ବି, ନା ପକ୍କା ଆବାସ ମିଳିଛି, ନା ବାର୍ଦ୍ଧକ୍ୟ ଭତ୍ତା ।  ନୂଆପଡ଼ାର ଏ ବୃଦ୍ଧ ଦଂପତି ତ ହାଣ୍ଡିର ଗୋଟିଏ ଭାତ । ବିଧାନସଭାରେ ମନ୍ତ୍ରୀ ରଖିଛନ୍ତି ଉଦବେଗଜନକ ତଥ୍ୟ । ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଲିଖିତ ଉତ୍ତର ରଖିଛନ୍ତି- 
- ଭତ୍ତା ଅପେକ୍ଷାରେ ରାଜ୍ୟର ୭ ଲକ୍ଷରୁ ଅଧିକ ଆବେଦନକାରୀ
- ମଧୁବାବୁ ପେନ୍‌ସନ୍‌ ଯୋଜନାରେ ୭ ଲକ୍ଷ ୧୧ ହଜାର ୧୨୩ ଆବେଦନକାରୀ
- ଜାତୀୟ ସାମାଜିକ ସୁରକ୍ଷା କାର୍ଯ୍ୟକ୍ରମରେ ୧୭ ହଜାର ୬୦୬ ଆବେଦନକାରୀ 
- ବିଭିନ୍ନ ଯୋଜନାରେ ଭତ୍ତା ପାଉଛନ୍ତି ୬୧ ଲକ୍ଷ ୧୦ ହଜାର ୪୫୦ ହିତାଧିକାରୀ