ଗୋପାଳନରୁ ପରିବାର ପ୍ରତିପୋଷଣ, ଦିନକୁ ୬୦ରୁ ୭୦ ଲିଟର କ୍ଷୀର ସଂଗ୍ରହ

କନକ ବ୍ୟୁରୋ;  ଏବେ କେବଳ ପୁରୁଷ ନୁହଁନ୍ତି, ମହିଳା ମାନେ ମଧ୍ୟ ଘର ଚଳାଇବା ପାଇଁ ଅଣ୍ଟା ଭିଡ଼ୁଛନ୍ତି । ଟେରଲିଂ, ଗୋପାଳନ ଭଳି କାମ କରି କିଛି ରୋଜଗାର କରୁଛନ୍ତି । ସେହିଭଳି ଜଣେ ମହିଳା ହେଉଛନ୍ତି କୋରାପୁଟ ଜିଲ୍ଲା ଲକ୍ଷ୍ମୀପୁର ବ୍ଲକର ସନ୍ତୋଷୀ ଗୌଡ଼ । ସେ ଗୌଡ଼ଗୁଡା ପଞ୍ଚାୟତର ଏମ୍‌ବିକେ ଭାବେ କାମ କରନ୍ତି । ତା’ ସହିତ ଗୋପାଳନ ମଧ୍ୟ କରନ୍ତି । ପ୍ରଥମେ ଦେଶୀ ଗାଇ ରଖି ବ୍ୟବସାୟ ଆରମ୍ଭ କରିଥିଲେ । ଏବେ ଆନ୍ଧ୍ରପ୍ରଦେଶରୁ ୫ଟି ଜର୍ସି ଗାଈ ଆଣି ପାଳନ କରୁଛନ୍ତି । ପ୍ରତିଦିନ ୬୦ରୁ ୬୫ ଲିଟର କ୍ଷୀର ସଂଗ୍ରହ ହେଉଛି । ଯାହାକୁ ବିକ୍ରି କରି ଲାଭବାନ ହେଉଛନ୍ତି ସନ୍ତୋଷୀ ।  ସନ୍ତୋଷୀଙ୍କ ସ୍ବାମୀ ଡ୍ରାଇଭର ଭାବେ କାମ କରନ୍ତି ।

ଅଧିକ ପଢନ୍ତୁ ;  ସ୍ୱାବଲମ୍ବୀ ହେବାର ବାଟ ଦେଖାଇଲା ମୁଦ୍ରା ଯୋଜନା । ଗୋପାଳନ କରି ସ୍ୱାବଲମ୍ବୀ ରାଧାରାଣୀ, ପ୍ରଧାନମନ୍ତ୍ରୀ କଲେ ପ୍ରଶଂସା

ଯେତିକି ରୋଜଗାର ହୁଏ ସେଥିରେ ଚଳିବା ବଡ଼ କଷ୍ଟକର । ତେଣୁ ସ୍ବାମୀ ମଧ୍ୟ ଗୋପାଳନରେ ସମସ୍ତ ସହଯୋଗ କରନ୍ତି। ପରିବାର ଲୋକଙ୍କ ସହଯୋଗରେ ଗୋପାଳନ ବେଶ ଭଲ ଭାବେ ଚାଲିଛି । ସରକାରଙ୍କ ପକ୍ଷରୁ କାମଧେନୁ ଯୋଜନାରେ ଦୁଇଟି ଜର୍ସି ଗାଈ ଓ ଗୁହାଳ ସୁବିଧା ପାଇଛନ୍ତି । ହେଲେ କ୍ଷୀର ବିକ୍ରି କରିବାକୁ ବଜାର ସୁବିଧା ନଥିବାରୁ ପନିର କରି ନିକଟସ୍ଥ କାକିରିଗୁମା ବଜାରରେ ବିକ୍ରି କରୁଛନ୍ତି । ଏହି ଅଞ୍ଚଳରେ ଲୋକଙ୍କ ରୋଜଗାରର ପ୍ରମୁଖ ମାଧ୍ୟମ ଗୋପାଳନ । ହେଲେ ବିକ୍ରି କରିବାକୁ ବ୍ୟବସ୍ଥା କରାଗଲେ ଲୋକମାନେ ଆହୁରି ଉପକୃତ ହୋଇପାରନ୍ତେ ।  ପ୍ରୋତ୍ସାହନ ମିଳିଲେ ଆଗକୁ ଏକ ବଡ଼ ଡାଇରୀ ଫାର୍ମ କରିବାର ଲକ୍ଷ୍ୟ ରଖିଛନ୍ତି ସନ୍ତୋଷୀ ।