ସାମାଜିକ ସୁରକ୍ଷାର ବିକଳ ଚିତ୍ର,  ଯୋଗ୍ୟ ହୋଇ ବି ମିଳୁନି ଭତ୍ତା

କନକ ବ୍ୟୁରୋ: ସାମାଜିକ ସୁରକ୍ଷା ଯୋଜନାର ଏ କି ଚିତ୍ର । ବାରମ୍ବାର ଆବେଦନ ପରେ ବି ଯୋଗ୍ୟଙ୍କୁ ଭତ୍ତା ଅନ୍ତର୍ଭୁକ୍ତ କରାଯାଉନି । ଆଉ ଅଯୋଗ୍ୟଙ୍କୁ ବର୍ଷ ବର୍ଷ ଧରି ସରକାରୀ ସୁବିଧାରେ ଲାଭ ପାଉଛନ୍ତି । ଗରିବ ଲୋକଟିଏ ଅଭିଯୋଗ କରି କରି ଥକିଗଲେ ବି ସୁଫଳ ମିଳୁନି । ନୂଆପଡ଼ାରୁ ଆସିଛି ଏମିତି ବୃଦ୍ଧ ଦମ୍ପତିଙ୍କ ଖବର । ଯୋଗ୍ୟ ହୋଇଥିବା ସତ୍ତ୍ବେ ବର୍ଷ ବର୍ଷ ଧରି ଭତ୍ତା ପାଇବାରୁ ବଞ୍ଚିତ ହୋଇଛନ୍ତି । ବୟସ ୬୦ ଅତିକ୍ରମ କଲାଣି । ଘର ଖଣ୍ଡେ ସଜାଡ଼ିବା ପାଇଁ ବୟସ ନାହିଁ କି କାମ କରିବାକୁ ସାମର୍ଥ୍ୟ ନାହିଁ। ଛେଳି କେତେଟା ରଖିଛନ୍ତି । ସେଥିରୁ ଯାହା କିଛି ରୋଜଗାର ହୁଏ ସେଥିରେ ଚଳିବା ଭାରି କଷ୍ଟକର । ହେଲେ ଆଜି ଯାଏଁ ଭତ୍ତା ହୋଇପାରୁନି। ସରକାରୀ କାର୍ଯ୍ୟାଳୟ ଦୌଡ଼ି ଦୌଡ଼ି ଚପଲ ଘୋରି ହୋଇଗଲାଣି, ହେଲେ ବାବୁଙ୍କ ଆଖିରେ ପଡ଼ୁନି ବୃଦ୍ଧ ଦମ୍ପତିଙ୍କ ଦୁଃଖ । 

ନା ମିଳୁଛି ଭତ୍ତା ନା ରାସନ ଚାଉଳ; ଛିଣ୍ଡା ଜରି ତଳେ ଜୀବନ ଜିଉଁଛନ୍ତି ୭୯ ବର୍ଷୀୟ ବୃଦ୍ଧ

ନୂଆପଡ଼ା ସଦର ବ୍ଲକ ଗୁଡ଼ାପଥରା ଗାଁର ବୈଦ ବରିହା ଓ ବୁନ୍ଦଲି ବାଇ । ବୃଦ୍ଧ ଦମ୍ପତିଙ୍କ ପାଇଁ ସରକାରୀ ସହାୟତା ହେଉଛି ଖାଦ୍ୟ ସୁରକ୍ଷା ଯୋଜନାରେ ମିଳୁଥିବା ପୁଞ୍ଜାଏ ଚାଉଳ । କେଉଁ ଅପରାଧ ଯୋଗୁଁ ନିଃସହାୟ ବୃଦ୍ଧ ଦମ୍ପତି ଭତ୍ତା ପାଇବାରୁ ବଞ୍ଚିତ? ତୁରନ୍ତ ଏମାନଙ୍କୁ ଭତ୍ତା ଅନ୍ତର୍ଭୁକ୍ତ କରିବାକୁ ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେବାକୁ ସ୍ଥାନୀୟ ଅଞ୍ଚଳବାସୀ ନିବେଦନ କରିଛନ୍ତି ।  ରାଜ୍ୟରେ ଅନେକ ଅଯୋଗ୍ୟ ହିତାଧିକାରୀଙ୍କୁ ଭତ୍ତା ପାଇ ଚାଲିଛନ୍ତି । ସେମାନଙ୍କୁ କଟା ଯାଉନି, ଫଳରେ ନୂଆ ଆବେଦନକାରୀ ଭତ୍ତା ପାଇଁ ମାସ ମାସ ଧରି ଅପେକ୍ଷା କରିବାକୁ ପଡ଼ୁଛି । ଆଉ ଯୋଗ୍ୟ ମାନଙ୍କୁ ହତାଶ ହେବାକୁ ପଡ଼ୁଛି ।