ପଶ୍ଚିମବଙ୍ଗ ସରକାରକୁ ସୁରେଶଙ୍କ ନାଲିଆଖି : କହିଲେ, ଖୁଣ୍ଟ ପୋତିଲେ ଲୋକେ ଉପାଡ଼ି ଦେବେ

କନକ ବ୍ୟୁରୋ: ଦିଦିଙ୍କ ଚାଲିକିର ପର୍ଦ୍ଦାଫାଶ କଲେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ । କେମିତି ଦିଦି ନାଲିଆଖି ଦେଖାଇ ବାରମ୍ବାର ଓଡ଼ିଶାକୁ ହଇରାଣ କରୁଛନ୍ତି ସେନେଇ ଭାଣ୍ଡାଫୋଡ୍‌ କରିବା ସହିତ ମନ୍ତ୍ରୀ ଦେଖାଇଛନ୍ତି ନାଲିଆଖି । ଏମିତିକି ପଶ୍ଚିମବଙ୍ଗ ସରକାରଙ୍କୁ ଅସଭ୍ୟ ବୋଲି କହିବାକୁ ସେ ପଛାଇ ନାହାନ୍ତି ।

ସୁରେଶଙ୍କ ଟାର୍ଗେଟ୍‌ରେ ମମତା ସରକାର
କହିଲେ, ଅସଭ୍ୟ ସରକାର ପଶ୍ଚିମବଙ୍ଗରେ
ଆଳୁ ସମସ୍ୟା ସୃଷ୍ଟି କରୁଛନ୍ତି, ଅନୁପ୍ରବେଶ କରାଉଛନ୍ତି
ଦରକାର ପଡ଼ିଲେ
ପଶ୍ଚିମବଙ୍ଗକୁ ପାଠ ପଢାଇବ ଓଡ଼ିଶା

ବର୍ଷବର୍ଷ ଧରି ଓଡ଼ିଶାକୁ ଆଳୁ ବନ୍ଦ କରି ସମସ୍ୟା ସୃଷ୍ଟି କରୁଛି ପଡ଼ୋଶୀ । ଖାସ କରି ଦିଦିଙ୍କ ମନମାନି ଶାସନକୁ ନେଇ ପୁରା ଦେଶରେ ଚର୍ଚ୍ଚା ଚାଲିଛି । ବାରମ୍ବାର ଓଡ଼ିଶା ସରକାରଙ୍କ ପରାମର୍ଶ ପରେ ବି ଦିଦି ମନମାନି ବନ୍ଦ କରୁନାହାନ୍ତି । କେତେବେଳେ ଓଡ଼ିଶାକୁ ଆଳୁ ବନ୍ଦ କରିଦେଉଛନ୍ତି ତ ଆଉ କେତେବେଳେ ପଡୋଶୀରୁ ବେଆଇନ ବାଲି ଉଠାଉଛି । ପୁଣି କେତେବେଳେ ଓଡ଼ିଶାରେ ବାର୍ଡ ଫ୍ଲୁ ହେଉଥିବା କାରଣରୁ ଆନ୍ଧ୍ର ଅଣ୍ଡା ଓ କୁକୁଡ଼ା ଗାଡ଼ିକୁ ବଙ୍ଗରେ ପୂରାଉନି । ଗୋଟିଏ ପରେ ଗୋଟିଏ କାମ କରି ବିବାଦ ଘେରକୁ ଆସୁଛନ୍ତି ଦିଦି । ହେଲେ ଏବେ ଦିଦିଙ୍କ ରାଜସ୍ବ ମନ୍ତ୍ରୀ ବେଆଇନ ପ୍ରବେଶ କରିବା ପରେ ଚର୍ଚ୍ଚା ଜୋର ଧରିଛି । 
ଓଡ଼ିଶାରେ ଅନୁପ୍ରବେଶ କରିବା ପରେ ପଶ୍ଚିମବଙ୍ଗ ସରକାରଙ୍କୁ ରାଜସ୍ବ ମନ୍ତ୍ରୀ ନାଲି ଆଖି ଦେଖାଇଛନ୍ତି । ସୀମାରେ ଅନୁପ୍ରବେଶ କରିଥିବାରୁ ପଶ୍ଚିମବଙ୍ଗ ସରକାରଙ୍କୁ ମନ୍ତ୍ରୀ କଡା ଚେତାବନୀ ଦେଇଛନ୍ତି । କହିଛନ୍ତି, ପଶ୍ଚିମବଙ୍ଗ ଅସଭ୍ୟ ସରକାର । ଆବଶ୍ୟକ ପଡିଲେ ପଶ୍ଚିମବଙ୍ଗକୁ ପାଠପଢାଇ ରାସ୍ତା ଦେଖାଇବ ଓଡ଼ିଶା । 

ବାଲେଶ୍ବର ଉଦୟପୁର ଏବଂ ସହାବାଜିପୁରରେ ପଶ୍ଚିମବଙ୍ଗ ସରକାରର ରାଜସ୍ୱ ମନ୍ତ୍ରୀ ଅନୁପ୍ରବେଶ କରିଛନ୍ତି । ଏହା ଜାଣିବା ପରେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ରାଜ୍ୟର ସୀମା ଛତିଶଗଡ଼, ଝାରଖଣ୍ଡ ଏବଂ ପଶ୍ଚିମବଙ୍ଗ ସହିତ ଅଛି। ମୁଁ ଜିଲ୍ଲା ଗସ୍ତ କରି ଅଧିକାରୀଙ୍କ ସହ ଆଲୋଚନା କରିଛି । ଛତିଶଗଡ଼ ଏବଂ ଝାରଖଣ୍ଡ ସହ ବିଶେଷ ସମସ୍ୟା ନାହିଁ । କିନ୍ତୁ ଆଶ୍ଚର୍ଯ୍ୟ ଓଡିଶା ଗଠନରୁ ଆଜି ଯାଏଁ ବାଲେଶ୍ଵରରେ ସୀମା ଚିହ୍ନଟ ହୋଇନାହିଁ । ଆଲୋଚନା ମାଧ୍ୟମରେ ସୀମା ଚିହ୍ନଟ ହେବାର କଥା । ଏହା ଆରମ୍ଭ ବି ହେଲାଣି । ବିନା ବିବାଦରେ ଆମେ ସବୁ କରିବୁ । ସେମାନେ ମନଇଚ୍ଛା ଖୁଣ୍ଟ ପୋତିଲେ ଲୋକେ ଉପାଡ଼ି ଦେବେ । 

ଦେଶରେ ପ୍ରତି ମୁହୂର୍ତ୍ତରେ ସେମାନେ ବିଶୃଙ୍ଖଳା କରୁଛନ୍ତି । ଏହାକୁ ଗ୍ରହଣ କରାଯିବ ନାହିଁ ବରଂ ସେମାନଙ୍କୁ ପାଠ ପଢାଯିବର ସମୟ ଆସିଛି ବୋଲି ମନ୍ତ୍ରୀ କହିଛନ୍ତି । ମୋଟ୍‌ ଉପରେ ଦିଦିଙ୍କ ବିଶୃଙ୍ଖଳା ଆଉ ଓଡ଼ିଶା ବରଦାସ୍ତ କରିବ ନାହିଁ ବୋଲି ସ୍ପଷ୍ଟ ହୋଇଛି ।

(ଭୁବନେଶ୍ବରରୁ ନବକିଶୋର ସାହୁଙ୍କ ରିପୋର୍ଟ)