ଯେଉଁମାନେ ଅସ୍ତ୍ରୋପଚାର କରିବାକୁ ଯାଉଛନ୍ତି ସେମାନଙ୍କ ପାଇଁ ଡାଳିମ୍ବ ଖାଇବା କେତେ ସାଙ୍ଘାତିକ୍‌ ଜାଣନ୍ତୁ…

କନକ ବ୍ୟୁରୋ: ଡାଳିମ୍ବକୁ ସ୍ୱାସ୍ଥ୍ୟ ପାଇଁ ଏକ ବରଦାନ ବୋଲି କୁହାଯାଏ। ଏଥିରେ ଭିଟାମିନ୍-ସି, କେ, ଫାଇବର ଏବଂ ପ୍ରଚୁର ପରିମାଣରେ ଆଣ୍ଟି-ଅକ୍ସିଡାଣ୍ଟ ରହିଥାଏ । ସାଧାରଣତଃ ଶରୀରରେ ରକ୍ତର ଅଭାବ ଦୂର କରିବା ପାଇଁ ଡାକ୍ତରମାନେ ଡାଳିମ୍ବ ଖାଇବାକୁ ପରାମର୍ଶ ଦେଇଥାନ୍ତି। କିନ୍ତୁ ଆପଣ ଜାଣିଛନ୍ତି କି, କିଛି ଲୋକଙ୍କ ପାଇଁ ଏହି ଉପକାରୀ ଫଳଟି ମଧ୍ୟ ବିପଦଜନକ ହୋଇପାରେ? ହଁ, ଯଦି ଆପଣ କିଛି ନିର୍ଦ୍ଦିଷ୍ଟ ଶାରୀରିକ ସମସ୍ୟା ଦେଇ ଗତି କରୁଛନ୍ତି, ତେବେ ଡାଳିମ୍ବ ଖାଇବା ଦ୍ୱାରା ଆପଣଙ୍କ ସ୍ୱାସ୍ଥ୍ୟ ବିଗିଡ଼ି ଯାଇପାରେ। ଆସନ୍ତୁ ଜାଣିବା କେଉଁମାନେ ଡାଳିମ୍ବ ଖାଇବା ଉଚିତ୍ ନୁହେଁ ।

ଯେଉଁମାନେ ଅସ୍ତ୍ରୋପଚାର କରିବାକୁ ଯାଉଥିଲେ

ଡାଳିମ୍ବ ଖାଇବା ପୂର୍ବରୁ ସତର୍କ ରହିବା ଉଚିତ । ଡାକ୍ତରମାନେ କୁହନ୍ତି ଯେ ଡାଳିମ୍ବ କିଛି ଔଷଧ ଏବଂ ଆନାସ୍ଥେସିଆରେ ପ୍ରଭାବ ପକାଇପାରେ । ଅର୍ଥାତ ରିଆକ୍ସନ କରିପାରେ ।  ଏଥିସହିତ ଏହା ରକ୍ତ ଜମାଟ ବାନ୍ଧିବା ଉପରେ ମଧ୍ୟ ପ୍ରଭାବ ପକାଇପାରେ । ଏହା ଅସ୍ତ୍ରୋପଚାର ସମୟରେ ଅତ୍ୟଧିକ ରକ୍ତସ୍ରାବ ହେବାର ଆଶଙ୍କା ବଢ଼ାଇପାରେ। ତେଣୁ, ଅଧିକାଂଶ ଡାକ୍ତର ଅସ୍ତ୍ରୋପଚାରର ଅତି କମରେ ଦୁଇ ସପ୍ତାହ ପୂର୍ବରୁ ଡାଳିମ୍ବ ଖାଇବାକୁ ଏଡ଼ାଇବାକୁ ପରାମର୍ଶ ଦିଅନ୍ତି ।
 

ନିମ୍ନ ରକ୍ତଚାପ ରୋଗୀ 
ଡାଳିମ୍ବର ପ୍ରକୃତି ହେଉଛି ଏହା ରକ୍ତଚାପକୁ କମାଇବାରେ ସାହାଯ୍ୟ କରେ। ଯେଉଁମାନଙ୍କର ଉଚ୍ଚ ରକ୍ତଚାପ ଥାଏ, ସେମାନଙ୍କ ପାଇଁ ଏହା ଭଲ। କିନ୍ତୁ ଯେଉଁମାନେ ଆଗରୁ 'ଲୋ-ବ୍ଲଡ୍ ପ୍ରେସର' ସମସ୍ୟାରେ ଅଛନ୍ତି କିମ୍ବା ରକ୍ତଚାପ କମାଇବା ପାଇଁ ଔଷଧ ଖାଉଛନ୍ତି, ସେମାନେ ଡାଳିମ୍ବ ଖାଇବା ଅନୁଚିତ୍। ଏହାଦ୍ୱାରା ରକ୍ତଚାପ ଅଧିକ କମିଯାଇ ମୁଣ୍ଡ ବୁଲାଇବା କିମ୍ବା ଦୁର୍ବଳତା ଦେଖାଦେଇପାରେ।
 

କାଶ ଏବଂ ଥଣ୍ଡା ସମସ୍ୟା 
ଡାଳିମ୍ବର ପ୍ରଭାବ ଥଣ୍ଡା ହୋଇଥାଏ। ଯଦି ଆପଣ କାଶ, କଫ କିମ୍ବା ଶ୍ୱାସକ୍ରିୟା ଜନିତ ସମସ୍ୟାରେ ପୀଡ଼ିତ, ତେବେ ଡାଳିମ୍ବ ଖାଇବା ଦ୍ୱାରା ସଂକ୍ରମଣ ବଢ଼ିଯାଇପାରେ। ବିଶେଷ କରି ଶୀତଦିନେ କିମ୍ବା ରାତି ସମୟରେ ଡାଳିମ୍ବ ଖାଇଲେ ଗଳା ବସିଯିବା ବା କାଶ ବଢ଼ିବାର ଭୟ ଥାଏ।

ଆଲର୍ଜି ସମସ୍ୟା 
ଅନେକ ଲୋକଙ୍କୁ ଡାଳିମ୍ବ ଖାଇବା ଦ୍ୱାରା ଆଲର୍ଜି ହୋଇଥାଏ। ଯଦି ଡାଳିମ୍ବ ଖାଇବା ପରେ ଆପଣଙ୍କ ଶରୀରରେ କୁଣ୍ଡେଇ ହେବା, ଲାଲ୍ ଦାଗ ପଡ଼ିବା, ଫୁଲିଯିବା କିମ୍ବା ନିଶ୍ୱାସ ନେବାରେ କଷ୍ଟ ଅନୁଭବ ହେଉଛି, ତେବେ ତୁରନ୍ତ ଏହାକୁ ଖାଇବା ବନ୍ଦ କରନ୍ତୁ।

ପେଟ ସମସ୍ୟା ଏବଂ ଗ୍ୟାସ୍
ଯଦିଓ ଡାଳିମ୍ବରେ ଫାଇବର ଥାଏ, କିନ୍ତୁ କିଛି ଲୋକଙ୍କ ପାଇଁ ଏହା ହଜମ ପ୍ରକ୍ରିୟାରେ ବାଧା ସୃଷ୍ଟି କରେ। ଯେଉଁମାନଙ୍କର ପେଟ ସଫା ହୁଏ ନାହିଁ କିମ୍ବା ଅତିରିକ୍ତ ଏସିଡିଟି ସମସ୍ୟା ରହିଛି, ସେମାନେ ଅଧିକ ପରିମାଣରେ ଡାଳିମ୍ବ ଖାଇଲେ ଗ୍ୟାସ୍ ଏବଂ କୋଷ୍ଠକାଠିନ୍ୟ ବଢ଼ିପାରେ। ଏହାର ମଞ୍ଜି ଗୁଡ଼ିକ କିଛି ଲୋକଙ୍କ ପେଟରେ ଯନ୍ତ୍ରଣା ମଧ୍ୟ ସୃଷ୍ଟି କରିଥାଏ।

ଔଷଧ ସେବନ କରୁଥିବା ବ୍ୟକ୍ତି
ଯଦି ଆପଣ କୌଣସି ଗୁରୁତର ରୋଗ ପାଇଁ ନିୟମିତ ଔଷଧ ଖାଉଛନ୍ତି, ତେବେ ଡାଳିମ୍ବ ଖାଇବା ପୂର୍ବରୁ ସାବଧାନ ରୁହନ୍ତୁ। ବିଶେଷ କରି କୋଲେଷ୍ଟ୍ରଲ କମାଇବା ପାଇଁ ବ୍ୟବହୃତ ଔଷଧ କିମ୍ବା ରକ୍ତ ପତଳା କରିବା ଔଷଧ   ସହିତ ଡାଳିମ୍ବର ପ୍ରତିକ୍ରିୟା ହୋଇପାରେ, ଯାହା ଶରୀର ପାଇଁ ବିପଦଜନକ ।

ଅଧିକ ପଢନ୍ତୁ:  ଦେଶୀ ନା ନାଲି ? କେଉଁ ପିଆଜ ଦେହ ପାଇଁ ଭଲ ? ଶରୀରରେ ପକାଏ କେମିତି ପ୍ରଭାବ ?

ମଧୁମେହ ରୋଗୀ 
ଡାଳିମ୍ବରେ ପ୍ରାକୃତିକ ଶର୍କରା  ଥାଏ । ଯଦିଓ ଏହାର ଗ୍ଲାଇସେମିକ୍ ଇଣ୍ଡେକ୍ସ କମ୍, ତଥାପି ଡାଇବେଟିସ୍ ରୋଗୀମାନେ ଅଧିକ ପରିମାଣରେ ଡାଳିମ୍ବ ଜୁସ୍ ପିଇବା ଉଚିତ୍ ନୁହେଁ। ଜୁସ୍ ଅପେକ୍ଷା କମ୍ ପରିମାଣରେ ଡାଳିମ୍ବ ଦାନା ଖାଇବା ସୁରକ୍ଷିତ, କିନ୍ତୁ ରକ୍ତରେ ଶର୍କରା ସ୍ତର ଯାଞ୍ଚ କରି ହିଁ ଏହାକୁ ସେବନ କରିବା ଉଚିତ୍।
 
କୌଣସି ବି ଜିନିଷ ଅଧିକ ପରିମାଣରେ ଖାଇବା କ୍ଷତିକାରକ। ଡାଳିମ୍ବ ଏକ ଅତି ଉତ୍ତମ ଫଳ, କିନ୍ତୁ ଆପଣଙ୍କ ଶରୀରର ଅବସ୍ଥାକୁ ଦେଖି ଏହାକୁ ଖାଆନ୍ତୁ। ଯଦି ଆପଣ ଉପରୋକ୍ତ କୌଣସି ବି ସମସ୍ୟାର ସମ୍ମୁଖୀନ ହେଉଛନ୍ତି, ତେବେ ଡାଳିମ୍ବ ଖାଇବା ପୂର୍ବରୁ ଜଣେ ବିଶେଷଜ୍ଞ ଡାକ୍ତରଙ୍କ ପରାମର୍ଶ ନେବା ନିହାତି ଜରୁରୀ। ସତର୍କ ରୁହନ୍ତୁ, ସୁସ୍ଥ ରୁହନ୍ତୁ!