ଓଡ଼ିଶାରେ ମିଳୁନି ଓଡ଼ିଆ ଭାଷାକୁ ଗୁରୁତ୍ୱ; ସୀମାନ୍ତରେ ସବୁଠି ଇଂରାଜୀ ଓ ତେଲୁଗୁ ଭାଷାର ପ୍ରାଧାନ୍ୟ

କନକ ବ୍ୟୁରୋ : ଓଡ଼ିଶାରେ ନାହିଁ ଓଡ଼ିଆ ଭାଷାର ଗୁରୁତ୍ଵ । ସ୍ୱତନ୍ତ୍ର ଓଡ଼ିଶା ଗଠନରେ ଯାହାର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା ତାଙ୍କରି ଅଞ୍ଚଳରେ ଗୁରୁତ୍ୱ ହରାଉଛି ଓଡ଼ିଆ ଭାଷା । ଆନ୍ଧ୍ର ସୀମାନ୍ତ ଅଞ୍ଚଳ ହୋଇଥିବାରୁ ତେଲୁଗୁ ଭାଷାର ପ୍ରଭାବ ବଢ଼ିଛି । ସରକାରଙ୍କ ଏଥିପାଇଁ ନିୟମ ରହିଥିବା ସତ୍ତ୍ୱେ ଅନେକ ଏହାକୁ ପାଳନ କରୁନାହାନ୍ତି ।

କେଉଁଠି ନାମ ଫଳକରେ ଇଂରାଜି ଭାଷାର ବ୍ୟବହାର ତ ଆଉ କେଉଁଠି ବ୍ୟବସାୟିକ ଅନୁଷ୍ଠାନରେ ତେଲୁଗୁ ଭାଷାରେ ଲେଖା ହୋଇଛି ପ୍ରତିଷ୍ଠାନର ନାମ । କିଛି ଅନୁଷ୍ଠାନରେ ତ ଓଡ଼ିଆ ଭାଷାକୁ କଦର୍ଯ୍ୟ କରି ଲେଖାଯାଇଛି । ସରକାରୀ ଅନୁଷ୍ଠାନରେ ମଧ୍ୟ ଇଂରାଜୀ ଭାଷାର ଫଳକ ଲାଗିଛି । ଜିଲ୍ଲାର ପ୍ରାୟ ସମସ୍ତ ସରକାରୀ ଦପ୍ତରରେ ଚିଠି, ନିର୍ଦ୍ଦେଶାବଳୀ ସବୁ ଇଂରାଜିରେ ହିଁ ଲେଖାଯାଉଛି । ଯାହାକୁ ନେଇ କ୍ଷୋଭ ପ୍ରକାଶ କରିବା ସହ ଆଇନ୍‌କୁ କଡ଼ାକଡ଼ି ପାଳନ କରିବା ପାଇଁ ଦାବି ରଖିଛନ୍ତି ବୁଦ୍ଧିଜୀବୀ ।

ଅଧିକ ପଢ଼ନ୍ତୁ : ଆନ୍ଧ୍ର-ଓଡ଼ିଶା ସୀମାରେ ହଜାଯାଉଛି ଓଡ଼ିଆ ଭାଷା ; ସ୍ୱାଭିମାନ ଅଞ୍ଚଳରେ ଓଡ଼ିଆ କହିପାରୁନାହାନ୍ତି ୭୦% ଲୋକେ

ଅପରପକ୍ଷରେ ବାରମ୍ବାର ତାଗିଦ ସତ୍ତ୍ୱେ ଆଇନ୍‌କୁ ବେଖାତିର କରୁଛନ୍ତି, ଆଇନ୍‌କୁ କଡ଼ାକଡ଼ି କରିବା ସହ ଜରିମାନା ଆଦାୟ କରାଯିବ । ଅନ୍ୟ ପ୍ରମାଣପତ୍ର ଓ ପଞ୍ଜୀକୃତ ସମୟରେ ସର୍ତ୍ତାବଳୀ ଗ୍ରହଣ କରିବା ଆବଶ୍ୟକ ବୋଲି କହିଛନ୍ତି ପ୍ରାଶାସନିକ ଅଧିକାରୀ । ଆଇନ୍‌ ତା ବାଟରେ ଯାଉ, ଓଡ଼ିଆ ଅସ୍ମିତା ଚୁଲୁକି ଯାଉ ନ୍ୟାୟରେ ଚାଲିଛି ଭାଷା ଆଇନ୍‌ର କାର୍ଯ୍ୟକାରିତା । ଗଜପତି ଜିଲ୍ଲାରେ ଓଡ଼ିଆ ଭାଷାର ଅପମାନ ମହାପୁରୁଷଙ୍କ ପ୍ରତି ଅପମାନ ସଦୃଶ ।