ବୌଦ୍ଧ ଚାଷୀଙ୍କୁ ଚିନ୍ତାରେ ପକାଇଛି ବିଳମ୍ବିତ ମଣ୍ଡି,  ଅମଳ ଧାନ ସାଇତି ରଖିବାକୁ ନାହିଁ ଗୋଦାମ ଘର

କନକ ବ୍ୟୁରୋ:  ବୌଦ୍ଧ ଜିଲ୍ଲାରେ ଖରିଫ ଧାନ ଅମଳ କଲାଣି ଚାଷୀ ହେଲେ ଏପର୍ଯ୍ୟନ୍ତ ଖୋଲିନାହିଁ ଧାନ ମଣ୍ଡି । ଧାର କରଜ କରି ଚାଷ କରିଥିବା ଚାଷୀଙ୍କ ପାଇଁ ବିଳମ୍ବିତ ମଣ୍ଡି, ଚିନ୍ତାର ବିଷୟ ପାଲଟିଛି। ଚାଷୀ ନିଜ ଖଳାରେ ଅମଳ ଧାନକୁ ସାଇତି ରଖିଛନ୍ତି । ମଣ୍ଡିରେ ବିକିବେ ବୋଲି, ଏଣେ ଚାଷୀଙ୍କ ପଛରେ ପଡିଲେଣି ବେପାରୀ । ମଣ୍ଡି ନଖୋଲିବାରୁ ଚାଷୀ ବି ନିଜ କଷ୍ଟ ଉପାର୍ଜିତ ଧାନକୁ ବେପାରୀ ହାତକୁ ଟେକି ଦେବାକୁ ଚିନ୍ତା କଲେଣି ।

 ଏ ବର୍ଷ ଖରିଫ୍‌ ଧାନ ଚାଷକୁ ନେଇ ଅନେକ ସମସ୍ୟାର ସମ୍ମୁଖୀନ ହୋଇଛନ୍ତି ବୌଦ୍ଧ ଚାଷୀ । କେତେବେଳେ ଅତ୍ୟଧିକ ବର୍ଷା, ପୁଣି କେତେବେଳେ ସାର ସଙ୍କଟ । ସବୁ ପରେ ରୋଗପୋକ ନାକେଦମ୍‌ କରିଥିଲା । ସବୁ ପ୍ରତିକୂଳ ପରିସ୍ଥିତି ସତ୍ତ୍ୱେ ନିଜର ଫସଲ ବଞ୍ଚାଇଛନ୍ତି । ଅମଳ କରି ଖଳାକୁ ଆଣିଛନ୍ତି । କଣ୍ଟାମାଳ ବ୍ଲକରେ ପ୍ରାୟ ୫୦%ରୁ ଅଧିକ ଧାନ କଟା ସରିଲାଣି । ଆଉ ୨ ସପ୍ତାହ ସୁଦ୍ଧା ପ୍ରାୟ ସବୁ ଅମଳ ହୋଇଯିବ । ହେଲେ ଏଯାଏଁ ଜିଲ୍ଲାରେ ଖୋଲିନି ମଣ୍ଡି । ଡିସେମ୍ବର ୧୬ରେ ମଣ୍ଡି ଖୋଲିବ ବୋଲି ସ୍ଥିର କରିଛି କମିଟି ।

ଅଧିକ ପଢନ୍ତୁ : ସାରା ରାଜ୍ୟରେ ଖରିଫ ଧାନ କିଣାରେ ଅବ୍ୟବସ୍ଥା । ମଣ୍ଡିରେ ଚାଲିଛି ମିଲର ଏଜେଣ୍ଟଙ୍କ ମନମାନି ।

ଶୀତକାକର, ଅଦିନିଆ ବର୍ଷା ଏବଂ ଚୋରି ଭୟରେ ଖଳାରେ ଧାନକୁ ଛାଡ଼ି କେଉଁଆଡ଼େ ଯାଇପାରୁନାହାନ୍ତି । ସବୁ ସମୟରେ ଖଳାରେ ଜଗି ରହୁଛନ୍ତି । ସେପଟେ ଘରକୁ ଆସିଲେଣି ଚାଷ ପାଇଁ ହାତଉଧାରି ଦେଇଥିବା ସାହୁକାର ଓ  ଔଷଧ ଦୋକାନୀ । ଆଉ ଏଭଳି ପରିସ୍ଥିତିର ସୁଯୋଗ ନେବାକୁ ଅନେଇ ବସିଛନ୍ତି ବ୍ୟବସାୟୀ । ଗାଁ ଗାଁ ବୁଲି ଧାନ କିଣିବାରେ ଲାଗିପଡିଛନ୍ତି । ମଣ୍ଡି ଖୋଲି ନଥିବାରୁ ଧାନ ବେପାରୀ ଓ ଦଲାଲମାନେ ଚାଷୀଙ୍କ ଭାଗ୍ୟ ବିଧାତା ସାଜିଛନ୍ତି। ସେମାନେ ହିଁ ଧାନ ଦର ସ୍ଥିର କରୁଛନ୍ତି ।

କ୍ୱିଣ୍ଟାଲ ପ୍ରତି ୧୮ଶହରୁ ୨ହଜାର ଟଙ୍କାରେ କିଣି ନେଉଥିବା ଜଣାପଡ଼ିଛି । ଫଳରେ ସରକାରଙ୍କ ୮ଶହ ଟଙ୍କା ବୋନସ୍‌ ଚାଷୀଙ୍କ ପାଇଁ ମରୁଭୂମିର ମରୀଚିକା ସଦୃଶ ହୋଇଛି । ସେପଟେ ଆଗାମୀ ଡିସେମ୍ବର ୧୬ ତାରିଖରୁ ଜିଲ୍ଲାରେ କଣ୍ଟାମାଳ ବ୍ଲକରୁ ଧାନ କିଣା ଆରମ୍ଭ କରାଯିବ। ଯେଉଁମାନେ ଅମଳ କରିଛନ୍ତି, ସେମାନେ ସାଇତି ରଖନ୍ତୁ ମଣ୍ଡି ଖୋଲିଲେ ବିକ୍ରି କରିବେ ବୋଲି କହିଛନ୍ତି ଜିଲ୍ଲା ଯୋଗାଣ ଅଧିକାରୀ କହିଛନ୍ତି ।