ମାତ୍ର ୪ଟି ଫଟୋ ଲାଗି ପଳାଇଲା କ୍ୟାବିନେଟ୍‌ ମନ୍ତ୍ରୀ ପଦ !

କନକ ବ୍ୟୁରୋ: ୪ଟି ଫଟୋ ଲାଗି ଗଲା କ୍ୟାବିନେଟ୍‌ ମନ୍ତ୍ରୀ ପଦ । କଥାଟା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ସତ । ମହାରାଷ୍ଟ୍ରରେ ସରପଂଚ ହତ୍ୟାକୁ ନେଇ ହୋଇଥିବା ରାଜନୀତିରେ ବଳି ପଡ଼ିଛନ୍ତି ମନ୍ତ୍ରୀ । ଗତକାଲି ବିଳମ୍ବିତ ରାତ୍ରୀରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍‌ ଓ ଅଜିତ୍‌ ପାୱାରଙ୍କ ମଧ୍ୟରେ ହୋଇଥିବା ରୁଦ୍ଧଦ୍ବାର ବୈଠକ ପରେ ଚର୍ଚ୍ଚା ହେଉଥିଲା କି ଧନଞ୍ଜୟ ମୁଣ୍ଡେ କ୍ୟାବିନେଟ୍‌ ମନ୍ତ୍ରୀପଦରୁ ଇସ୍ତଫା ଦେବେ ବୋଲି । ଆଉ ଆଜି ସକାଳୁ ସକାଳୁ ନିଜର ଇସ୍ତଫା ପତ୍ର ମୁଖ୍ୟମନ୍ତ୍ରୀଙ୍କୁ ସେ ଫଠାଇଥିବା ଜଣାପଡ଼ିଛି । 

ବହୁଚର୍ଚ୍ଚିତ ବିଡ୍‌ ଜିଲ୍ଲାରେ ସରପଂଚଙ୍କୁ ହତ୍ୟା କରାଯାଇଥିଲା । ଏହି ଘଟଣାକୁ ନେଇ ପୁରା ମହାରାଷ୍ଟ୍ରରେ ରାଜନୀତି ଜୋର ଧରିଥିବା ବେଳେ ଦେବେନ୍ଦ୍ର ସରକାରଙ୍କୁ ଘେରିଥିଲେ ବିରୋଧୀ । ଆଜି ଜିଲ୍ଲାବନ୍ଦ ନେଇ ମଧ୍ୟ ସୂଚନା ରହିଛି । ସ୍ଥିତି ଅଣାୟତ୍ତ ହେବା ପରେ କ୍ୟାବିନେଟ୍‌ ମନ୍ତ୍ରୀଙ୍କ ସହ ୱାନ ଟୁ ୱାନ ଆଲୋଚନା କରିଥିଲେ ମୁଖ୍ୟମନ୍ତ୍ରୀ । କୁହାଯାଉଥିଲା କି , ଏହି ଆଲୋଚନା ସମୟରେ ଉପ-ମୁଖ୍ୟମନ୍ତ୍ରୀ ଅଜିତ୍‌ ପାୱାର ବି ଉପସ୍ଥିତ ଥିଲେ । ମାନସମନ୍ଥନ ହେବା ପରେ ଧନଞ୍ଜୟଙ୍କୁ ଇସ୍ତଫା ଦେବାକୁ କୁହାଯାଉଥିଲା । ମିଳିଥିବା ସୂଚନା ଅନୁସାରେ, ଏହି ହତ୍ୟାକାଣ୍ଡକୁ ନେଇ କିଛି ଫଟୋ ଭାଇରାଲ ହୋଇଥିଲା । ଏହି ଫଟୋରେ ଦେଖିବାକୁ ମିଳିଥିଲା କି ସରଂପଚଙ୍କୁ ପ୍ରଥମେ ନିବସ୍ତ୍ର କରାଯାଇଥିଲା । ପରେ ପରେ ପାଇପ୍‌ ଓ ଅନ୍ୟ ଅସ୍ତ୍ର ସାହାଯ୍ୟରେ ହତ୍ୟା କରାଯାଇଥିଲା । ମୁର୍ମୂଷ ଅବସ୍ଥାରେ ପଡ଼ିଥିବା ବେଳେ ତାଙ୍କ ଉପରେ ପରିସ୍ରା କରିଥିଲେ ଅଭିଯୁକ୍ତ । ଅଭିଯୁକ୍ତଙ୍କ ସହ ମନ୍ତ୍ରୀଙ୍କ ଘନିଷ୍ଠ ସମ୍ପର୍କ ବି ରହିଛି । ତେଣୁ ମନ୍ତ୍ରୀ ପଦ ଯାଇଥିବା କୁହାଯାଉଛି । 

ମହାରାଷ୍ଟ୍ର ରାଜନୀତିରେ କିଛି ଠିକ୍‌ଠାକ୍‌ ନାହିଁ । ବିଧାନସଭା ନିର୍ବାଚନରେ ଏନଡିଏ ବିଜୟ ହେବା ପରେ ଦେବେନ୍ଦ୍ରଙ୍କ କାନ୍ଧରେ ସିଏମ୍‌ ଚୌକିର ଦାୟିତ୍ବ ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ହେଲେ ଏବେ ସରକାରରେ କିଛି ଠିକ୍‌ଠାକ୍‌ ଚାଲିନଥିବା କୁହାଯାଉଛି । ଖାସ କରି ମୁଖ୍ୟମନ୍ତ୍ରୀଙ୍କ ସହ ଅନ୍ୟ ନେତା ଓ ବିଶେଷ କରି ଉପମୁଖ୍ୟମନ୍ତ୍ରୀଙ୍କ ମନାନ୍ତର ରହୁଛି । ଯେଉଁଥି ଲାଗି ସରକାର ଯେଉଁପରି ଭାବରେ ଚାଲିବା କଥା ଚାଲିପାରୁନି ବୋଲି ଲୋକେ କହିଲେଣି । 

ପ୍ରଥମେ ଏକନାଥ ସିନ୍ଦେ, ଏବେ ଅଜିତ୍‌ କୁମାର । ମହାରାଷ୍ଟ୍ରର ଦୁଇ ଚର୍ଚ୍ଚିତ ନେତାଙ୍କ ସହ ଦେବେନ୍ଦ୍ରଙ୍କ ମନାନ୍ତର ରହିଥିବା କୁହାଯାଉଛି । ଯାହାକୁ ନେଇ ଅଧରାତିରେ ଅଜିତ୍‌ଙ୍କ ଘରେ ପହଞ୍ଚିଥିଲେ ଦେବେନ୍ଦ୍ର । ଏହାପରେ ପାଖାପାଖି ଦେଢରୁ ୨ ଘଂଟା ପର୍ଯ୍ୟନ୍ତ ଉଭୟ ନେତା କଥାବାର୍ତ୍ତା ହୋଇଥିଲେ । କଥା ହେଲା ବିଡ୍‌ ଜିଲ୍ଲାରେ ସରଂପଚଙ୍କୁ ହତ୍ୟା ହୋଇଥିବା ଘଟଣାକୁ ନେଇ ଉଭୟଙ୍କ ମଧ୍ୟରେ ମନାନ୍ତର ହୋଇଛି । କୁହାଯାଉଛି ଏହି ଘଟଣା ସମ୍ପର୍କରେ ସୋସିଆଲ ମିଡିଆରେ କିଛି ଫଟୋ ଭାଇରାଲ ହୋଇଥିଲା ।

ଭାଇରାଲ ଫଟୋକୁ ଦେଖି ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖିବାକୁ ମିଳିଥିଲା । ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହେବା ସହିତ ପୁରା ଜିଲ୍ଲାର ଅଖଚକ ବନ୍ଦ ହେବାକୁ ନେଇ ନିଷ୍ପତ୍ତି ହେଲା । ପୁରା ଘଟଣାକୁ ନେଇ କ୍ୟାବିନେଟ୍‌ ମନ୍ତ୍ରୀ ଧନଞ୍ଜୟ ମୁଣ୍ଡାଙ୍କ ଇସ୍ତଫା ଦାବି ହୋଇଥିଲା । ତେଣୁ ଏବେ କଣ କରିବେ ସେନେଇ ଟେନସନ୍‌ରେ ଥିଲେ ଦେବେନ୍ଦ୍ର । ଏହାରି ଭିତରେ ଗଣମାଧ୍ୟରୁ ଦୂରେଇ ଅଧ ରାତିରେ ଅଜିତଙ୍କ ଘରେ ପହଞ୍ଚିଥିଲେ ଦେବେନ୍ଦ୍ର । ହେଲେ ଏ ଖବର ଗଣମାଧ୍ୟମ ପାଖରେ ପହଞ୍ଚିଯାଇଥିଲା ।

ଅଧ ରାତିରେ ବଙ୍ଗଳାରେ କି ଆଲୋଚନା ହେଲା ?

ଅଧ ରାତିରେ ଖୋଦ୍‌ ମୁଖ୍ୟମନ୍ତ୍ରୀ ଉପମୁଖ୍ୟମନ୍ତ୍ରୀଙ୍କ ଘରେ ପହଞ୍ଚିବା ପରେ ପ୍ରଶ୍ନ ଉଠୁଛି ଉଭୟଙ୍କ ମଧ୍ୟରେ କି ଆଲୋଚନା ହେଲା । ଦେବେନ୍ଦ୍ର ପହଞ୍ଚିବା ପୂର୍ବରୁ ପ୍ରଦେଶ ଅଧ୍ୟକ୍ଷ ସୁନୀଲ ତଟ୍ଟକରେ ଓ କ୍ୟାବିନେଟ୍‌ ମନ୍ତ୍ରୀ ଧନଞ୍ଜୟ ମୁଣ୍ଡେ ଉପସ୍ଥିତ ଥିଲେ । ସିଏମ ପହଞ୍ଚିବା ପରେ ଉଭୟଙ୍କ ମଧ୍ୟରେ ଆଲୋଚନା ଜୋରଦାର ହୋଇଥିଲା । ପରେ ପରେ ଫଡନାଭିସ୍‌ ବାହାରିଥିଲେ । କୁହାଯାଉଛି ଏହି ହତ୍ୟାକାଣ୍ଡରେ କୁଆଡ଼େ କ୍ୟାବିନେଟ୍‌ ମନ୍ତ୍ରୀଙ୍କ ସଂପୃକ୍ତି ରହିଛି । ତେଣୁ ତାଙ୍କ ମନ୍ତ୍ରୀପଦ ବିପଦରେ ରହିଥିଲା । ଏ ମୃତ୍ୟୁ ଘଟଣାର ତଦନ୍ତ ସିଆଇଡି କରୁଛି । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ସରପଂଚଙ୍କ ହତ୍ୟାକାରୀଙ୍କ ସହ  କ୍ୟାବିନେଟ୍‌ ମନ୍ତ୍ରୀ ସମ୍ପର୍କ ରହିଛି । ତେଣୁ ତାଙ୍କ ହତ୍ୟାରେ ମନ୍ତ୍ରୀଙ୍କ ଭୂମିକା ସନ୍ଦେହ ଘେରକୁ ଆସିଥିଲା । ଏମିତିକି ଧନଞ୍ଜୟ ଆଜି ଇସ୍ତାଫା ଦେବା ନେଇ ଚର୍ଚ୍ଚା ହେବା ପରେ ସେ ଇସ୍ତଫା ଦେଇଛନ୍ତି । ଅବଶ୍ୟ ଏନେଇ ବିଜେପି ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇନି କିନ୍ତୁ ଚର୍ଚ୍ଚା ଜୋର ଧରିଛି । ମୋଟ୍‌ ଉପରେ ମହାରାଷ୍ଟ୍ର ରାଜନୀତିର ଗତି ଏବେ ଯାଉଛି କୁଆଡ଼େ ତାହାକୁ ନେଇ ଆଲୋଚନା ବି ହେଉଛି ।