ମହାରାଷ୍ଟ୍ର ପୌର ନିର୍ବାଚନ: ଭୋଟ୍ ପୂର୍ବରୁ ମହାୟୁତିର ବଡ଼ ବିଜୟ, ନିର୍ଦ୍ୱନ୍ଦ୍ୱରେ ଜିତିଲେ ୬୮ ପ୍ରାର୍ଥୀ

କନକ ବ୍ୟୁରୋ : ମହାରାଷ୍ଟ୍ରରେ ଆସନ୍ତା ଜାନୁଆରୀ ୧୫ ତାରିଖରେ ହେବାକୁ ଥିବା ପୌର ନିଗମ ଏବଂ ମୁମ୍ବାଇ ମହାନଗର ନିଗମ  ନିର୍ବାଚନ ପୂର୍ବରୁ ବିଜେପି ନେତୃତ୍ୱାଧୀନ 'ମହାୟୁତି' ମେଣ୍ଟ ଏକ ବଡ଼ ସଫଳତା ହାସଲ କରିଛି । ନାମାଙ୍କନ ପତ୍ର ପ୍ରତ୍ୟାହାରର ଶେଷ ତାରିଖ ପରେ ବିଭିନ୍ନ ପୌର ନିଗମରେ ମହାୟୁତିର ୬୮ ଜଣ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି । ଫଳରେ ମତଦାନ ପୂର୍ବରୁ ହିଁ ଶାସକ ମେଣ୍ଟ ଏକ ବଡ଼ ଅଗ୍ରଗତି ଲାଭ କରିଛି ।

ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିବା ଏହି ୬୮ଟି ଆସନ ମଧ୍ୟରୁ ଭାରତୀୟ ଜନତା ପାର୍ଟି (BJP) ସର୍ବାଧିକ ୪୪ଟି ଆସନ ପାଇଥିବା ବେଳେ ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନାକୁ ୨୨ଟି ଏବଂ ଅଜିତ ପାୱାରଙ୍କ ଏନସିପି (NCP) କୁ ୨ଟି ଆସନ ମିଳିଛି । ବିଶେଷ କରି ଠାଣେ ଜିଲ୍ଲାର କଲ୍ୟାଣ-ଡୋମ୍ବିଭଲି ପୌର ନିଗମରେ ସର୍ବାଧିକ ସଂଖ୍ୟକ ପ୍ରାର୍ଥୀ ବିନା ପ୍ରତିଦ୍ୱନ୍ଦ୍ୱିତାରେ ଜିତିଛନ୍ତି । ଏହା ବ୍ୟତୀତ ପୁଣେ, ପିମ୍ପରି-ଚିଞ୍ଚୱାଡ, ପାନଭେଲ, ଭିୱାଣ୍ଡି, ଧୁଲେ, ଜଳଗାଓଁ ଏବଂ ଅହିଲ୍ୟାନଗରରେ ମଧ୍ୟ ମହାୟୁତି ନିଜର ପତିଆର ଅର୍ଜନ କରିଛି ।

ଅଧିକ ପଢ଼ନ୍ତୁ---ପୁଅକୁ ଚିଠି ଲେଖି ଜୀବନ ହାରିଲେ ବାପା ; ପଢ଼ିଲେ ଆପଣ ବି କାନ୍ଦି ପକାଇବେ

ପୁଣେ ପୌର ନିଗମର ୱାର୍ଡ ନମ୍ବର ୩୫ରୁ ବିଜେପି ପ୍ରାର୍ଥୀ ମଞ୍ଜୁଷା ନାଗପୁରେ ଏବଂ ଶ୍ରୀକାନ୍ତ ଜଗତାପ ନିର୍ଦ୍ୱନ୍ଦ୍ୱରେ ବିଜୟୀ ହୋଇଛନ୍ତି । କେନ୍ଦ୍ର ମନ୍ତ୍ରୀ ମୁରଲୀଧର ମୋହୋଲ ଏହାକୁ ବିଜେପି ସରକାରଙ୍କ କାର୍ଯ୍ୟ ଉପରେ ଜନତାଙ୍କ ଆସ୍ଥା ବୋଲି କହିଛନ୍ତି । ସେ ଦାବି କରିଛନ୍ତି ଯେ, "ପୁଣେର ପରବର୍ତ୍ତୀ ମେୟର ବିଜେପିରୁ ହିଁ ହେବେ । ଆମର ଲକ୍ଷ୍ୟ ୧୨୫ଟି ଆସନ ଜିତିବା, ଯେଉଁଥିରୁ ୨ଟିରେ ଆମେ ଜିତିସାରିଛୁ ।" ବିଜେପି ମୁଖପାତ୍ର କେଶବ ଉପାଧ୍ୟାୟ ଏହି ସଫଳତାର ଶ୍ରେୟ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ଲୋକପ୍ରିୟତା ଓ ରବିନ୍ଦ୍ର ଚଭନଙ୍କ ରଣନୀତିକୁ ଦେଇଛନ୍ତି ।

ଅନ୍ୟପଟେ, ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (UBT) ଏହି ବିଜୟ ଉପରେ ପ୍ରଶ୍ନ ଉଠାଇଛି । ସାଂସଦ ପ୍ରିୟଙ୍କା ଚତୁର୍ବେଦୀ ଅଭିଯୋଗ କରିଛନ୍ତି ଯେ, ବିରୋଧୀ ପ୍ରାର୍ଥୀମାନଙ୍କୁ ଇଡି ଏବଂ ସିବିଆଇର ଭୟ ଦେଖାଇ କିମ୍ବା ଲାଞ୍ଚ ଦେଇ ନାମାଙ୍କନ ପ୍ରତ୍ୟାହାର କରିବାକୁ ବାଧ୍ୟ କରାଯାଇଛି । ସେ ନିର୍ବାଚନ କମିଶନଙ୍କ ନୀରବତାକୁ ନେଇ କ୍ଷୋଭ ପ୍ରକାଶ କରିବା ସହ ଏହା ଗଣତନ୍ତ୍ର ପାଇଁ ଲଜ୍ଜାଜନକ ବୋଲି କହିଛନ୍ତି । ସୂଚନାଯୋଗ୍ୟ ଯେ, ମହାରାଷ୍ଟ୍ରର ମୋଟ ୨୯ଟି ପୌର ନିଗମ ପାଇଁ ଜାନୁଆରୀ ୧୫ରେ ମତଦାନ ହେବ ଏବଂ ଜାନୁଆରୀ ୧୬ ତାରିଖରେ ଫଳାଫଳ ପ୍ରକାଶ ପାଇବ ।