ଭୁଆଁ ବୁଲାଉଛି ଭୂଅର୍ଜନ ବିଭାଗ!: ଜମି ନେଇଗଲେ କିନ୍ତୁ ଟଙ୍କା ଦେଲେନି

କନକ ବ୍ୟୁରୋ: ଜମି ନେଇଗଲେ କିନ୍ତୁ ଟଙ୍କା ଦେଲେନି। ଭୁଆଁ ବୁଲାଉଛି ଭୂ-ଅର୍ଜନ ବିଭାଗ। ନେହୁରା ହୋଇ ବାର ଦୁଆର ବୁଲୁଛନ୍ତି, ହେଲେ ତଥାପି ନିରବଦ୍ରଷ୍ଟା ପ୍ରଶାସନ। ଜୟପୁର ସହର ଦେଇଯାଇଛି ୨୬ ଓ ୩୨୬ ନମ୍ବର ଜାତୀୟ ରାଜପଥ। ରାଞ୍ଚି ବିଜୟୱାଡ଼ା କରିଡ଼ର ସହ ଯୋଡ଼ି ହୋଇଛି। ଜନଗହଳି ସହ ଗାଡ଼ି ଚଳାଚଳ ମାତ୍ରାଧିକ ହେବା ଓ ଦୁର୍ଘଟଣା ଘଟିବାରୁ ଟ୍ରାଫିକ ସମସ୍ୟାର ସମାଧାନ ପାଇଁ ବାଇପାସ୍ ରାସ୍ତାର ପରିକଳ୍ପନା କଲେ ସରକାର।

୪.୯ କିମି ଲମ୍ବା ରାସ୍ତା ପାଇଁ ୮୪.୫୮ କୋଟି ଟଙ୍କାର ଅଟକଳ ମଧ୍ୟ ହେଲା। ୨୦୨୧ରୁ କାମ ବି ଆରମ୍ଭ ହେଲା। ବାଇପାସ ପାଇଁ ଅଧିଗ୍ରହଣ ହୋଇଥିବା ଜମି ମଧ୍ୟରେ ୧୯୮୭ ମସିହାରେ ଜୟପୁର ସହରର ମକାପୁଟରେ ଥିବା ସରକାରୀ ଜମିକୁ ଆର୍ଥିକ ସ୍ୱଛଳ ନଥିବା ହିତାଧିକାରୀଙ୍କୁ ଘର ଢ଼ିଅ ତିଆରି କରିବା ପାଇଁ ୨୦ ପୁଟ ଓସାର ଓ ୩୦ ପୁଟ ଲମ୍ବା ହିସାବରେ ୧୦୦ରୁ ଅଧିକ ଲୋକଙ୍କୁ  ଜମି ପ୍ଳଟ କରି ବିକ୍ରି କରିଥିଲା। ସେଥିମଧ୍ୟରୁ ୩୨ଟି ପ୍ଳଟ ଦେଇ ଏହି ବାଇପାସ୍ ରାସ୍ତା ନିର୍ମାଣ ହେଉଛି। ନା କ୍ଷତିପୂରଣ ଦେଲେ ନା ଆଉ ନୂଆ ଜମି ଯୋଗାଇଲେ।

ଆହୁରି ପଢ଼ନ୍ତୁ : ମରିଗଲା ମାନବିକତା : ଦୁଇପୁଅ ଥାଇ ବି ରାସ୍ତାରେ କାନ୍ଦୁଛି ବାପା

ଏନେଇ ଗୃହ ନିର୍ମାଣ ବିଭାଗ ପକ୍ଷରୁ ପ୍ରତିକ୍ରିୟା ରଖାଯାଇଛି। କୁହାଯାଇଛି, ଏହା ସରକାରଙ୍କ ଜମି। ସେ ଯେତେବେଳେ ଚାହିଁବେ ନେଇଯିବେ। ଏଠାରେ ପ୍ରଶ୍ନ ଉଠୁଛି, ଯଦି ସରକାରୀ ଅଧିକାରୀଙ୍କ ଦୂରଦୃଷ୍ଟି ନଥିଲା ତେବେ ଏହି ଯୋଜନା କାହିଁକି କରୁଥିଲେ? ଆର୍ଥିକ ଅନଟନ ଦେଇ ଗତି କରୁଥିବା ହିତାଧିକାରୀଙ୍କୁ ସ୍ୱପ୍ନ ଦେଖାଇ ଛଡ଼ାଇନେଲେ।