ମରିଗଲା ମାନବିକତା : ଦୁଇପୁଅ ଥାଇ ବି ରାସ୍ତାରେ କାନ୍ଦୁଛି ବାପା

କନକ ବ୍ୟୁରୋ: ଦୁଇପୁଅ ଥାଇ ବି ରାସ୍ତାରେ କାନ୍ଦୁଛି ବାପା । ଭାଗ ନଛିଡ଼ିବାରୁ ରୋଗାଗ୍ରସ୍ତ ବୁଢ଼ା ବାପାକୁ ବାହାରେ ଛାଡ଼ି ଚାଲିଗଲେ ଦୁଇପୁଅ । ଶୀତ କାକରରେ ରାତିସାରା ପଡ଼ି ରହିବା ପରେ ଉଦ୍ଧାର କଲେ ପଡୋଶୀ । ଏମିତି ଅଭାବନୀୟ ଖବର ଆସିଛି  ବାଲେଶ୍ୱର ଜିଲ୍ଲା ସିଂଲା ଥାନା ରାଇପୁର ଗାଁରୁ । ଏହି ଗାଁର ରାମଚନ୍ଦ୍ର ଦାସ ନିଜର କଷ୍ଟଅର୍ଜିତ ସମ୍ପତ୍ତିକୁ ଦୁଇପୁଅଙ୍କ ନାଁରେ କରି ଦେଇଛନ୍ତି । ରାମଚନ୍ଦ୍ରଙ୍କ ଦୁଇ ପୁଅ ରବି ଶଙ୍କର ଦାସ ଏବଂ ଶିବ ଶଙ୍କର ଦାସ ବାହାରେ ଚାକିରି କରୁଥିବାରୁ ବାହାରେ ରହନ୍ତି । ଦୁଇ ଭାଇଙ୍କ ସମ୍ପତ୍ତି ଭାଗ କରି ତାଙ୍କ ନାମରେ ନାମିତ ହୋଇ ଯିବା ପରେ ବାପାଙ୍କୁ ପର କରିଦେଲେ । 

ଏବେ ରାମଚନ୍ଦ୍ର ପାରାଲିସିସ ରୋଗରେ ପୀଡ଼ିତ ହୋଇ ଶଯ୍ୟାଶାୟୀ ହୋଇଛନ୍ତି । ୫ ବର୍ଷ ଧରି ରୋଗଗ୍ରସ୍ତ ହୋଇଥିଲେ ମଧ୍ୟ କେବେବି ବାପାଙ୍କୁ ଦେଖା କରିବାକୁ ଆସନ୍ତି ନାହିଁ । ଫଳରେ ଘର ଭିତରେ ଗୋଟିଏ ବିଛଣାରେ ପଡି ରହିଛନ୍ତି ରାମଚନ୍ଦ୍ର । ଗାଁରେ ରହୁଥିବା ଝିଅ କେତେବେଳେ କେମିତି ଆସି ବାପାଙ୍କ କଥା ବୁଝି ଯାଆନ୍ତି । ନହେଲେ ପଡୋଶୀଙ୍କ ଭରଷାରେ ରହିଛନ୍ତି ଅସହାୟ ରାମଚନ୍ଦ୍ର । ଗ୍ରାମବାସୀ ବାରମ୍ବାର କହିବା ପରେ ଗତ ଶୁକ୍ରବାର ଦିନ ଦୁଇପୁଅ ଆସିଥିଲେ । ଗାଁ ଲୋକଙ୍କ ସହମତିରେ ଦୁଇ ମାସ ବାପାଙ୍କୁ ରଖିବା ପାଇଁ ନିଷ୍ପତ୍ତି ନେଇଥିଲେ । ମାତ୍ର ପ୍ରଥମ ଦୁଇମାସ କେଉଁ ପୁଅ ରଖିବେ ତାକୁ ନେଇ ଦୁଇଭାଇଙ୍କ ମଧ୍ୟରେ ଚାଲିଲା ଟଣାଓଟରା । ସମାଧାନ ହୋଇ ନପାରିବାରୁ ଗ୍ରାମବାସୀ ପଳାଇଯାଇଥିଲେ । ଏହା ପରେ ଦୁଇପୁଅ ମଧ୍ୟ ଚାଲି ଯାଇଥିଲେ । ଆଉ ବାହାରେ ବସିଥିବା  ରାମଚନ୍ଦ୍ର ସେମିତି ରାତିସାରା ବାହାରେ ବସି ରହିଥିଲେ । ଭୋର ସମୟରେ ପାଖ ପଡୋଶୀ ରାମଚନ୍ଦ୍ରଙ୍କ କାନ୍ଦ ଶୁଣି ସେଠାରେ ପହଞ୍ଚି ତାଙ୍କୁ ଘର ଭିତରକୁ ନେଇଥିଲେ । 

ଆହୁରି ପଢ଼ନ୍ତୁ: ବାବୁଙ୍କ ସମ୍ପତ୍ତି ତାଲିକାକୁ ନେଇ କଠୋର ସରକାର, ସମ୍ପତ୍ତି ତାଲିକା ନଦେଲେ ହେବନି ପଦୋନ୍ନତି

ବର୍ତ୍ତମାନ ରାମଚନ୍ଦ୍ରଙ୍କ ପାଖରେ ଆଉ କିଛି ନାହିଁ । କିପରି ଭାବରେ ବାକି ଜୀବନ କାଟିବେ ସେହି ଚିନ୍ତାରେ । ସମସ୍ତ ସମ୍ପତ୍ତି ପୁଅ ମାନଙ୍କ ନାମରେ ହୋଇ ଯାଇଥିବାରୁ ପ୍ରଶାସନ ଏଥିଲେ ହସ୍ତକ୍ଷେପ କରି ଅସହାୟ ବୃଦ୍ଧ ରାମଚନ୍ଦ୍ରଙ୍କ ସାହାରା ହେବାକୁ ନିବେଦନ କରିଛନ୍ତି ଗ୍ରାମବାସୀ । ପୁଅ ଜନ୍ମ କରି ଭୁଲ କରିଛି ବୋଲି କାନ୍ଦି କାନ୍ଦି କହୁଛନ୍ତି ରାମଚନ୍ଦ୍ର ।