କନକ ବ୍ୟୁରୋ: ଝାରସୁଗୁଡ଼ା ଜିଲ୍ଲାରେ ବାଲିଘାଟ ଲିଜ୍ ପ୍ରଦାନରେ ହୋଇଥିବା ବଡ଼ ଧରଣର ଦୁର୍ନୀତି ନେଇ କନକ ନ୍ୟୁଜ୍‌ରେ ଖବର ପ୍ରସାରଣ ପରେ ଘଟଣାର ତଦନ୍ତ ଆରମ୍ଭ କରିଛି ଜିଲ୍ଲା ପ୍ରଶାସନ । ରାଜ୍ୟ ସରକାରଙ୍କଠାରୁ ମଧ୍ୟ ତଦନ୍ତ ନିର୍ଦ୍ଦେଶ ଆସିଥିବା ଜଣାପଡ଼ିଛି । ଏହି ଘଟଣା ପରେ ଅତିରିକ୍ତ ଜିଲ୍ଲାପାଳ କିଶୋର ଚନ୍ଦ୍ର ସ୍ୱାଇଁଙ୍କ ନେତୃତ୍ୱରେ ଗଠିତ ଟିମ୍ ଘଟଣାର ଛାନ୍‌ଭିନ୍ ଆରମ୍ଭ ବି କରିଛନ୍ତି । ପ୍ରାଥମିକ ସ୍ଥିତିରେ ଜିଲ୍ଲା ଖଣି ବିଭାଗରୁ ଦୁର୍ନୀତି ଜଣାପଡ଼ିଥିବା ଝାରସୁଗୁଡ଼ା ତହସିଲ ଅନ୍ତର୍ଗତ ଲୋଇସିଂ ବାଲି ଶଯ୍ୟା ସମ୍ପର୍କିତ ଫାଇଲ୍ ମଗାଯାଇ ତାହାର ଯାଞ୍ଚ କରାଯାଉଛି । 

Advertisment

ତଦନ୍ତ ସମ୍ପର୍କରେ ଅତିରିକ୍ତ ଜିଲ୍ଲାପାଳ କହିଛନ୍ତି, ବାଲିଘାଟ ସମ୍ପର୍କିତ ଫାଇଲ୍‌ର ଛାନଭିନ କରାଯାଉଛି । ୨୦୨୦-୨୧ ମସିହାରୁ ୨୦୨୪-୨୦୨୫ ଯାଏଁ ଏହି ବାଲିଘାଟର ବୌଧତା ଥିବା ବେଳେ ୨୦୨୫ ମସିହାରେ ଲିଜ୍ ଅବଧି ଶେଷ ହେବାର ୨୨ ଦିନ ପୂର୍ବରୁ ଲିଜ୍‌ଧାରୀଙ୍କୁ ପରିବେଶ ମଞ୍ଜୁରି ମିଳିଥିଲା। ତେଣୁ ଜିଲ୍ଲା ଖଣି ବିଭାଗ ଲିଜ୍‌ଧାରୀଙ୍କ ସହିତ ୨୨ ଦିନର ଚୁକ୍ତିନାମା କରିଥିବା କହିଛନ୍ତି ଅତିରିକ୍ତ ଜିଲ୍ଲାପାଳ। କୌଣସି କାରଣବଶତଃ ନିର୍ଦ୍ଧାରିତ ଅବଧି ମଧ୍ୟରେ ଲିଜ୍ ଚୁକ୍ତିନାମା ହୋଇନଥିବା ବେଳେ ଏବେ ଅବଧି ଶେଷ ହେବା ପରେ ଚୁକ୍ତିନାମା ପାଇଁ ଜିଲ୍ଲା ଖଣି ବିଭାଗ ଡିଏସ୍ଆରଙ୍କୁ ଚିଠି ଲେଖିଛନ୍ତି।

ଆହୁରି ପଢ଼ନ୍ତୁ : ମରିଗଲା ମାନବିକତା : ଦୁଇପୁଅ ଥାଇ ବି ରାସ୍ତାରେ କାନ୍ଦୁଛି ବାପା

ଏହି ଘଟଣା ନେଇ ପ୍ରକାଶିତ ଖବର ଆଧାରରେ ରାଜ୍ୟ ସରକାରଙ୍କ ପକ୍ଷରୁ ଇ-ମେଲ୍ ଆସିବା ପରେ ଘଟଣାର ଯାଂଚ କରାଯାଉଥିବା ଅତିରିକ୍ତ ଜିଲ୍ଲାପାଳ ସୂଚନା ଦେଇଛନ୍ତି। ଅନ୍ୟପଟେ ଏହି ବାଲିଘାଟର ବ୍ୟାଙ୍କ ଗେରେଣ୍ଟି ନଥିବା ବେଳେ ତାକୁ ନେଇ ମଧ୍ୟ ତଦନ୍ତ କରାଯିବ। ଯଦି କୌଣସି ଅଧିକାରୀ ଏକ ନିର୍ଦ୍ଧିଷ୍ଟ ପକ୍ଷକୁ ସୁବିଧା ଦେବାକୁ ଯାଇ ଉଦ୍ଦେଶ୍ୟମୂଳକ ଭାବେ ବ୍ୟାଙ୍କ୍ ଗ୍ୟାରେଣ୍ଟି ରଖାଯାଇନି ତେବେ କାର୍ଯ୍ୟାନୁଷ୍ଠାନ ନିଶ୍ଚିତ ହେବ। ଦାୟୀ ଅଧିକାରୀ, କର୍ମଚାରୀଙ୍କ ବିରୋଧରେ ଆକ୍ସନ ନିଆଯିବ ବୋଲି କହିଛନ୍ତି ଅତିରିକ୍ତ ଜିଲ୍ଲାପାଳ।