ଇରାନରୁ ଭାରତୀୟଙ୍କ ଉଦ୍ଧାର ପ୍ରକ୍ରିୟା ଜାରି, ‘ଆମେ ମରଣ ମୁହଁରୁ ଫେରିଛୁ’

 କନକ ବ୍ୟୁରୋ;  ଇରାନରେ ଚାଲିଥିବା ବିକ୍ଷୋଭ ଓ ସରକାରୀ ଦମନର ଭୟଙ୍କର ପରିସ୍ଥିତିରେ ଫସିଥିବା ଭାରତୀୟ ନାଗରିକଙ୍କୁ ଫେରାଇବା ପାଇଁ ବିଦେଶ ମନ୍ତ୍ରାଳୟ (ଏମ୍‌ଇଏ) ଜରୁରୀ ଉଦ୍ଧାର ଯୋଜନା ତ୍ବରାନ୍ବିତ କରିଛି । ଆଜି ପ୍ରଥମ ଉଦ୍ଧାର ବିମାନ ତେହେରାନରୁ ଆସି ଦିଲ୍ଲୀରେ ଅବତରଣ କରିଛି । ଏହି ବିମାନରେ ଆସିଥିବା ଭାରତୀୟ ଛାତ୍ର ଓ ପରିବାରବର୍ଗ ଇରାନରେ ଘଟୁଥିବା ଗୁଳିବର୍ଷଣ, ରାସ୍ତାରେ ହିଂସା ଓ ଭୟଙ୍କର ପରିବେଶର ବର୍ଣ୍ଣନା କରିଛନ୍ତି । ସେମାନେ କହିଛନ୍ତି ଯେ ପରିସ୍ଥିତି ଏବେ ପୂରା ଯୁଦ୍ଧ ଭଳି ହୋଇଯାଇଛି । ରାସ୍ତାରେ ଅହରହ ଗୁଳି ଶବ୍ଦ, ଧୂଆଁ ଓ ସଂଘର୍ଷର ଦୃଶ୍ୟ ସର୍ବତ୍ର ଦେଖାଯାଉଛି । ଅନେକେ ଲୋକ ଦୁଇ ସପ୍ତାହ ଧରି ଘରେ ବନ୍ଦୀ ହୋଇ ରହିଥିଲେ। କେତେକ ଛାତ୍ର କହିଛନ୍ତି ଯେ ସେମାନଙ୍କ ହଷ୍ଟେଲ୍ ନିକଟରେ ଗୁଳିଚାଳନା ହେଉଥିଲା ଏବଂ ରାତିରେ ବାହାରକୁ ଯିବା ଅସମ୍ଭବ ହୋଇପଡ଼ିଥିଲା । ଅନେକ ଭାରତୀୟ ଇରାନର ସାମ୍ପ୍ରତିକ ଭୟାବହତା ବର୍ଣ୍ଣନା କରି କହିଛନ୍ତି ଯେ ସେମାନେ ମରଣ ମୁହଁରୁ ଅଳ୍ପକେ ବର୍ତ୍ତି ଯାଇଛନ୍ତି ଏବଂ ଭାରତ ସରକାରଙ୍କ ସମୟୋଚିତ ପଦକ୍ଷେପ ସେମାନଙ୍କ ଜୀବନ ରକ୍ଷା କରିଛି ।

ବିଦେଶ ମନ୍ତ୍ରାଳୟ ସୂତ୍ରରୁ ଜଣାପଡ଼ିଛି ଯେ ଇରାନରେ ପ୍ରାୟ ୧୦,୦୦୦ରୁ ଅଧିକ ଭାରତୀୟ ରହୁଛନ୍ତି । ସେମାନଙ୍କ ମଧ୍ୟରେ ଅଧିକାଂଶ ଛାତ୍ର, ବିଭିନ୍ନ ବୃତ୍ତିଧାରୀ ଓ ପରିବାରବର୍ଗ । ଏମ୍‌ଇଏ ଏବେ ଭାରତୀୟଙ୍କୁ ଫେରିବା ପ୍ରକ୍ରିୟା ତ୍ବରାନ୍ବିତ କରିବାକୁ ଅଧିକ ବିମାନ ନିୟୋଜନ ଯୋଜନା କରୁଛି । ପ୍ରଥମ ବିମାନରେ ମୁଖ୍ୟତଃ ଛାତ୍ର ଓ ମହିଳାମାନେ ଫେରିଛନ୍ତି । ଆଗାମୀ ଦିନରେ ମୁମ୍ବାଇ, ବେଙ୍ଗାଲୁରୁ ଓ ଚେନ୍ନାଇକୁ ମଧ୍ୟ ବିମାନ ଯିବାର ସମ୍ଭାବନା ରହିଛି । ଏମ୍‌ଇଏ ଏୟାରଲାଇନ୍‌ଗୁଡ଼ିକ ସହ ଆଲୋଚନା କରି ଚାର୍ଟର୍ ବିମାନ ବ୍ୟବସ୍ଥା କରିବାକୁ ପ୍ରସ୍ତୁତ ରହିଛି । 

ଅଧିକ ପଢନ୍ତୁ:  ଗାଜା ଶାନ୍ତି ବୋର୍ଡ ଘୋଷଣା କଲେ ଟ୍ରମ୍ପ: ଗୁରୁତ୍ୱପୂର୍ଣ୍ଣ ଭୂମିକାରେ ଭାରତୀୟ

ଭାରତୀୟ ଦୂତାବାସ ତେହେରାନ୍‌ରେ ୨୪ଘଣ୍ଟିଆ ହେଲ୍ପଲାଇନ୍ ଚାଲୁ ରଖିଛି । ଯେଉଁମାନେ ଫେରିବାକୁ ଚାହୁଁଛନ୍ତି ସେମାନଙ୍କୁ ନାମ ରେଜିଷ୍ଟର କରିବାକୁ ଅନୁରୋଧ କରାଯାଇଛି । ଦୂତାବାସ ଭାରତୀୟଙ୍କୁ ସୁରକ୍ଷିତ ସ୍ଥାନରେ ରହିବାକୁ ଓ ବିକ୍ଷୋଭ ଅଞ୍ଚଳରୁ ଦୂରେଇ ରହିବାକୁ ପରାମର୍ଶ ଦେଇଛି । ଏହି ଉଦ୍ଧାର ଯୋଜନା ଭାରତର ନାଗରିକ ସୁରକ୍ଷା ପ୍ରତି ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି। ଆଗାମୀ ଦିନରେ ଅଧିକ ଭାରତୀୟଙ୍କୁ ଫେରାଇବାକୁ ପ୍ରାଥମିକତା ଦିଆଯାଉଛି ।