ଜଳୁଛି ଜଙ୍ଗଲ : ମନ୍ତ୍ରୀ କହୁଛନ୍ତି ବେଶି ନିଆଁ ଲାଗିନି, ଆମେ ସଚେତନ ଅଛୁ

କନକ ବ୍ୟୁରୋ : ଖରାଦିନ ଆରମ୍ଭ ନହେଉଣୁ ରାଜ୍ୟର ବିଭିନ୍ନ ଜଙ୍ଗଲରେ ନିଆଁ ଲାଗିବା ଆରମ୍ଭ ହେଲାଣି । ଖାସ କରି ବୌଦ୍ଧ ଜଙ୍ଗଲରେ ଲାଗିଥିବା ନିଆଁକୁ ନେଇ ଏବେ ପୂରା ରାଜ୍ୟରେ ଚର୍ଚ୍ଚା । ମାର୍ଚ୍ଚ ପ୍ରଥମ ସପ୍ତାହରୁ ଯଦି ସ୍ଥିତି ଏମିତି ହେଲାଣି ତାହାଲେ ଆଗାମୀ ଦିନରେ କଣ ହେବ ବୋଲି ପ୍ରଶ୍ନ ଉଙ୍କି ମାରୁଛି । ଏହାରି ଭିତରେ ଜଙ୍ଗଲ ଓ ପରିବଶ ମନ୍ତ୍ରୀ ପ୍ରତିକ୍ରିୟା ରଖିଛନ୍ତି । କହିଛନ୍ତି, ଜଙ୍ଗଲ ନିଆଁ ପ୍ରତି ସରକାର ସଚେତନ ଅଛନ୍ତି । ଜଙ୍ଗଲକୁ ଲାଗିଥିବା ଗାଁ ଗୁଡିକରେ ସଚେତନ କରାଯାଇଛି । ୧୭ ଆଦିବାସୀ ଜିଲ୍ଲାରେ  ଲୋକମାନେ ପାରମ୍ପରିକ ଭାବେ ନିଆଁ ଲଗାନ୍ତି । ହେଲେ ଏବେ ରାଜ୍ୟରେ ବିଶେଷ ନିଆଁ ଲାଗିନାହିଁ । ୩୧୦ ଛୋଟ ଛୋଟ ପଏଣ୍ଟରେ ଏବେ ନିଆଁ ଲାଗିଛି ।

ନିଆଁକୁ ରୋକିବା ପାଇଁ ପର୍ଯ୍ୟାପ୍ତ ପରିମାଣର ସ୍କ୍ବାଡ୍‌ ଅଛନ୍ତି । ଘନ ଜଙ୍ଗଲରେ ନିଆଁ ରୋକିବା ସେମାନଙ୍କ ଲକ୍ଷ୍ୟ ରହିଛି । ଆମ ଜଙ୍ଗଲ ସୁରକ୍ଷିତ ଅଛି । ୫୨ ହଜାର ସ୍କୋୟାର କିଲୋମିଟର ଜଙ୍ଗଲ ଆମର ଅଛି । ଗ୍ରାମ ଜଙ୍ଗଲରେ ସାଧାରଣ ଲୋକ ମହୁଲ ପାଇଁ ନିଆଁ ଲଗାଇଥାନ୍ତି । ସବୁଠୁ ବଡ଼ କଥା ହେଲା ଏଯାଏଁ ଶିମିଳିପାଳରେ ନିଆଁ ଲାଗି ନାହିଁ । ଘଞ୍ଚ  ଜଙ୍ଗଲରେ ସ୍କ୍ବାଡ୍‌ ଜଗୁଛନ୍ତି। ଡ୍ରୋନ କ୍ୟାମେରା ବି ଲାଗିଛି । ଫାୟାର ପଏଣ୍ଟକୁ ନଜରରେ ରଖାଯାଇଛି । ଚଳିତ ବର୍ଷରୁ ନିଆଁ ଲିଭା କାର୍ଯ୍ୟରେ ଗାଁ ଲୋକଙ୍କ ନିୟୋଜିତ କରାଯିବାର ଯୋଜନା ରହିଛି । ଏଥିପାଇଁ ପ୍ରତେକ ଗାଁକୁ ଏସଏଚ୍‌ଜି ମାଧ୍ୟମରେ ୧୦ ହଜାର ଟଙ୍କା ଲେଖାଏଁ ପ୍ରୋତ୍ସାହନ ଦିଆଯିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ବୋଲି ମନ୍ତ୍ରୀ ଗଣେଶ ରାମସିଂ ଖୁଣ୍ଟିଆ କହିଛନ୍ତି । 

ମୋଟ୍‌ ଉପରେ ଜଳୁଛି ଜଙ୍ଗଲ,ହୁତୁ ହୁତୁ ହୋଇ ମାଡି ଯାଉଛି ନିଆଁ । ବହୁ ମୂଲ୍ୟବାନ ସମ୍ପତ୍ତି ପୋଡି ନଷ୍ଟ ହୋଇଯାଉଛି । ନିଆଁ ପାହାଡ ଉପରକୁ ମାଡି ଚାଲିଛି । ଦୀର୍ଘ ୫ରୁ ୬ କିଲୋମିଟର ଧରି ନିଆଁ ମାଡି ଚାଲିଥିବା ବେଳେ  ବନ ବିଭାଗର ଦେଖାନାହିଁ । ଯାହାକୁ ନେଇ ଲୋକଙ୍କ ମନରେ ଅସନ୍ତୋଷ ଦେଖାଦେଇଛି । ଖରା ଆରମ୍ଭ ନହେଉଣୁ ହୁତୁ ହୁତୁ ହୋଇ ଜଳିଗଲାଣି ଜଙ୍ଗଲ । ଦିନକୁ ଦିନ ନିଆଁ ଜଙ୍ଗଲରେ ମାଡି ମାଡି ଯାଉଛି । ଖାସ କରି ରାୟଗଡା ବନଖଣ୍ଡ ଅଧିନସ୍ଥ କୁମ୍ଭିକୋଟା ଠାରୁ ଗୁମ୍ମା ପର୍ଯ୍ୟନ୍ତ ଏହି ଜଙ୍ଗଲରେ ନିଆଁ ଲାଗିଛି । ନିଆଁ ଲାଗିବା ଦ୍ୱାରା ଜଙ୍ଗଲରେ ଥିବା ବହୁ ମୂଲ୍ୟବାନ ଗଛ ପୋଡି ପାଉଁଶ ହୋଇଗଲାଣି । ଖାଲି ସେତିକି ନୁହେଁ ବନ୍ୟଜନ୍ତୁ ମଧ୍ୟ ପୋଡି ଯାଉଥିବା ବେଳେ କିଛି ଗାଁ ମୁହାଁ ହେବାରେ ଲାଗିଛନ୍ତି । ହେଲେ ନିଆଁ ଲିଭାଇବା ପାଇଁ ବନ ବିଭାଗର କର୍ମଚାରୀଙ୍କ ଦେଖାନାହିଁ । ଏହି ନିଆଁକୁ ଦେଖି ଜଙ୍ଗଲ ରାସ୍ତା ଦେଇ ଯାଉଥୁବା ଲୋକେ ବି ଭୟଭୀତ ହୋଇପଡୁଛନ୍ତି । ହେଲେ ମନ୍ତ୍ରୀ ଯେଉଁ ବୟାନ ରଖିଛନ୍ତି ତାହାକୁ ନେଇ ଚର୍ଚ୍ଚା ଚାଲିଛି ।