/kanak/media/agency_attachments/2024-07-23t061209958z-vpn68eiq1eknckql8r0y.jpg)
/kanak/media/media_files/2025/10/17/53-2025-10-17-13-40-02.jpg)
କନକ ବ୍ୟୁରୋ : ଦିଲ୍ଲୀ ବିଶ୍ୱବିଦ୍ୟାଳୟର ଆମ୍ବେଦକର କଲେଜରେ ଗୁରୁବାର ଦିନ ଏକ ଚମକାଇଦେବା ଭଳି ଘଟଣା ଘଟିଛି । କଲେଜ ପରିସରରେ ଥିବା ଜଣେ ପ୍ରଫେସରଙ୍କ ରୁମରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ବା ଏବିଭିପିର ଜଣେ ନେତ୍ରୀ ଜଣେ ବରିଷ୍ଠ ପ୍ରଫେସର ସୁଜିତ କୁମାରଙ୍କୁ ପିଟୁଥିବାର ଭିଡିଓ ଭାଇରାଲ ହେଉଛି । ଏହି ପୂରା ଘଟଣାକ୍ରମ ଦିଲ୍ଲୀ ପୁଲିସର ଉପସ୍ଥିତିରେ ହୋଇଛି । ଏହାକୁ ନେଇ କଲେଜ ପରିସରରେ ଅଶାନ୍ତି ଦେଖିବାକୁ ମିଳିଛି । ଦିଲ୍ଲୀ ପୁଲିସ କହିଛି କି, ଅଭିଯୋଗ ହୋଇଛି ଓ ଏହାର ଯାଂଚ ଚାଲିଛି ।
ଦୀପିକା ଝାଙ୍କ କହିବା କଥା କଲେଜର କିଛି ଛାତ୍ରୀଙ୍କ ଡାକରା ପାଇ ସେ ଆସିଥିଲେ । ଛାତ୍ରୀଙ୍କ ଅଭିଯୋଗ ଥିଲା କି, ପ୍ରଫେସର ସୁଜିତ କୁମାର ସେମାନଙ୍କ ସହ ଅଭଦ୍ର ବ୍ୟବହାର କରୁଛନ୍ତି । ଦୀପିକାଙ୍କ କହିବା ମୁତାବକ ଏନେଇ ପ୍ରଫେସରଙ୍କ ସହ ଆଲୋଚନା ଚାଲିଥିବା ବେଳେ ପ୍ରଫେସର ତାଙ୍କୁ ଧମକ ଦେବା ସହ ଅଭଦ୍ର ବ୍ୟବହାର କରିଥିଲେ । ଏହାକୁ ନେଇ ମୁଁ କ୍ଷଣିକ ପାଇଁ ମାନସିକ ଭାରସାମ୍ୟ ହରାଇ ପ୍ରଫେସରଙ୍କ ଉପରକୁ ହାତ ଉଠାଇଦେଇଥିଲି ବୋଲି ଦୀପିକା କହିଛନ୍ତି । ଏହାକୁ ନେଇ ସେ ଦୁଃଖ ପ୍ରକାଶ କରିଛନ୍ତି ଓ କ୍ଷମା ମାଗିଛନ୍ତି ।
ସେପଟେ ଏହି ଘଟଣାକୁ ନେଇ କଂଗ୍ରେସର ଛାତ୍ର ଶାଖା ଏନଏସୟୁଆଇ କହିଛି କି, ଏବିଭିପି କଲେଜରେ ଗୁଣ୍ଡାଗିରି କରୁଛି । ସଂଗଠନର ରାଷ୍ଟ୍ରୀୟ ଅଧ୍ୟକ୍ଷ ବରୁଣ ଚୌଧୁରୀ କହିଛନ୍ତି ଜଣେ ବରିଷ୍ଠ ପ୍ରଫେସରଙ୍କ ଉପରେ ଆକ୍ରମଣ ସାରା ଶିକ୍ଷକ ସମୁଦାୟର ଗାରିମା ଉପରେ ଆକ୍ରମଣ । ବିଶ୍ୱବିଦ୍ୟାଳୟରେ ଭୟର ବାତାବାରଣ ସୃଷ୍ଟି କରି ଅରାଜକତା ଚଳାଇବାକୁ ଏବିଭିପି ଚାହୁଥିବା ସେ ଅଭିଯୋଗ କରିଛନ୍ତି ।
କେବଳ ସେତିକି ନୁହେଁ ପୁଲିସ ଉପସ୍ଥିତିରେ ଏଭଳି ଘଟଣା ଘଟିଥିବାରୁ ପୁଲିସର ଭୂମିକାକୁ ନେଇ ଏନଏସୟୁଆଇ ପ୍ରଶ୍ନ ଉଠାଇଛି । ଏହାସହ ଏହି ଆଲୋଚନାରେ ଥିବା ଅନ୍ୟ ଛାତ୍ରଛାତ୍ରୀଙ୍କ ସହ ଦୀପିକା ଝାଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଏନଏସୟୁଆଇ ଦାବି କରିଛି ।