ଜମିହରାଙ୍କୁ ଏମସିଏଲର ଜୁଲମ୍

କନକ ବ୍ୟୁରୋ: କାହାର କୋଠା ଭାଙ୍ଗି ପଡିଛି ତ ଆଉ କାହାର ଛପର ଉଡ଼ିଯାଇଛି । ପୁନର୍ବାସ-ଥଇଥାନ ବ୍ୟବସ୍ଥା ନକରି ଗାଁ ଖାଲି କରୁଛି କମ୍ପାନି । ଯିଏ ମନା କରୁଛନ୍ତି ତାଙ୍କୁ ନାଲି ଆଖି ଦେଖାଉଛନ୍ତି ଏମସିଏଲ କର୍ତ୍ତୃପକ୍ଷ । ସୁନ୍ଦରଗଡ଼ ଜିଲ୍ଲାର ଗୋପାଳପୁର, ସିଆରମାଲରେ କୋଇଲା ଖଣି ଖୋଳୁଛି ଏମସିଏଲ୍‌। ଆଉ ଏଠି ନିୟମ କାନୁନ କଥା ଛାଡନ୍ତୁ ହାଇକୋର୍ଟଙ୍କ ନିର୍ଦ୍ଦେଶକୁ ବି ଫୁ କରି ଉଡ଼ାଇ ଦେଉଛି ।

Advertisment

ଅଧିକ ପଢ଼ନ୍ତୁ : ଏମ୍‌ସିଏଲ୍‌ର ମନମାନୀ, କଲବଲ କରୁଛି କମ୍ପାନୀ

ନିୟମ ଅନୁସାରେ,

କମ୍ପାନି ପ୍ରଥମେ ପୁନର୍ବାସ ଓ ଥଇଥାନ ବ୍ୟବସ୍ଥା କରିବ
ଥଇଥାନ କଲୋନିରେ ଶିକ୍ଷା ଠାରୁ ସ୍ୱାସ୍ଥ୍ୟ, ପାନୀୟ ଜଳ ଭଳି ବ୍ୟବସ୍ଥା ରହିବ
ତା'ପରେ ଲୋକଙ୍କୁ ସ୍ଥାନାନ୍ତର କରି ଗାଁ ଖାଲି କରାଯିବ
ହେଲେ ଏଠାରେ ସବୁ ନିୟମକୁ ମୋଡ଼ିମାଡ଼ି ନିଜ ପକେଟରେ ପୂରାଇ ଦେଇଛନ୍ତି ଏମସିଏଲ୍‌ କର୍ତ୍ତୃପକ୍ଷ। ମନ ଇଛା ନିରିହ ଲୋକଙ୍କ ଉପରେ ଜୁଲମ୍‌ କରୁଥିବା ଅଭିଯୋଗ ହୋଇଛି।

ଏମସିଏଲ ପୁର୍ନବାସ ଓ ଥଇଥାନ କଲୋନିରେ ପହଞ୍ଚିଥିଲେ ଆମ ପ୍ରତିନିଧି । ସିଆରମାଲ ପ୍ରୋଜେକ୍ଟ ପାଇଁ ପୁର୍ନବାସ ଓ ଥଇଥାନ କଲୋନିରେ ନିର୍ମାଣ କାମ ସରିବାକୁ ଆହୁରି ବର୍ଷେରୁ ଅଧିକ ସମୟ ଲାଗିବ। ବିସ୍ଥାପନ କଲୋନୀରେ ସ୍କୁଲ, ରାସ୍ତା, ଡାକ୍ତରଖାନା, ପାନୀୟ ଜଳ ବ୍ୟବସ୍ଥା ଠାରୁ ଆରମ୍ଭ କରି ଗୋଷ୍ଠୀଗତ ଅଧିକାର ପାଇଁ ଚାଲିଥିବା ନିର୍ମାଣ ସରିନାହିଁ । ଯେଉଁଠି ଗୋଷ୍ଠୀଗତ ଅଧିକାର କାମ ସରିନି ସେଠି ଗାଁକୁ ଖାଲି କରିବା ମାନେ ଲୋକଙ୍କୁ ହଇରାଣ କରିବା ନୁହେଁ ତ କଣ।

ଅଧିକ ପଢ଼ନ୍ତୁ :ଖଣି ଅଞ୍ଚଳରେ ଥମୁନି ଲୋକଙ୍କ ଦୁଃଖ, ମିଛ ରିପୋର୍ଟ ଦେଇ ଖଣି ସମ୍ପ୍ରସାରଣ କରୁଛି ଏମସିଏଲ

ଏହିଭଳି ଘଟଣା ଦେଖିଲେ ମନରେ ଗୋଟିଏ କଥା ଆସୁଛି, ଯେତେ ବେଳେ ରାଷ୍ଟ୍ରାୟତ କମ୍ପାନିର କଥା ଆସେ ସେତେବେଳେ ପ୍ରଶାସନ ଓ ସରକାର ଚୁପ୍ ହେଇଯାଆନ୍ତି କାହିଁକି । ଅନ୍ୟପଟେ ଅତିରିକ୍ତ ଜିଲ୍ଲପାଳ ରାଜସ୍ୱ କହିଛନ୍ତି, ଏହିଭଳି ଜୁଲୁମ ହୋଇପାରିବନାହିଁ । ପୁର୍ନବାସ ଓ ଥଇଥାନର ସମସ୍ତ ସୁବିଧା ନହେବା ଯାଏଁ କମ୍ପାନି ଘର ଭାଙ୍ଗିପାରିବନାହିଁ । ପ୍ରଶାସନ ଶୁଣିବ ନାହିଁ ! ରାଜ୍ୟ ସରକାର ଶୁଣିବେ ନାହିଁ ! ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ପାଳନ ହେବ ନାହିଁ ! ତାହା ହେଲେ ଏଇ ଆଦିବାସୀ କାହାର ଦ୍ୱାରସ୍ଥ ହେବେ? ଏମାନଙ୍କୁ କିଏ ନ୍ୟାୟ ଦେବ? କାହିଁକି ଚୂପ୍‌ ସରକାର?