ବିହାର ରାଜନୀତିରେ ହଲଚଲ । ବିଜେପିର ୭ ବିଧାୟକଙ୍କୁ ମନ୍ତ୍ରୀ ପଦ ଦେଲେ ନୀତିଶ

କନକ ବ୍ୟୁରୋ: ବିହାର ରାଜନୀତିକୁ ନେଇ ଥମୁନି ଚର୍ଚ୍ଚା । କାରଣ ବର୍ଷର ଶେଷ ମାସକୁ ନିର୍ବାଚନ ଥିବା ବେଳେ ଆଜି ମନ୍ତ୍ରିମଣ୍ଡଳ ସଂପ୍ରସାରଣ କରିଛନ୍ତି ନୀତିଶ କୁମାର । ହେଲେ ହଠାତ୍‌ କାହିଁକି ମନ୍ତ୍ରିମଣ୍ଡଳ ସଂପ୍ରସାରଣ ହେଲା ସେନେଇ ବର୍ତ୍ତମାନ ସୁଦ୍ଧା କୌଣସି ଖବର ମିଳିନାହିଁ । କିନ୍ତୁ ମନ୍ତ୍ରିମଣ୍ଡଳକୁ ସଂପ୍ରସାରଣ ପରେ ଚର୍ଚ୍ଚା ବଢିଛି । ଗୁରୁତ୍ବପୂର୍ଣ୍ଣ କଥା ହେଲା, ଆଜି ଶପଥ ନେଇଥିବା ସମସ୍ତ ମନ୍ତ୍ରୀ ବିଜେପିର ବିଧାୟକ ଅଛନ୍ତି । ତେଣୁ ଆଗାମୀ ଦିନରେ ନୀତିଶ ଏନଡିଏ ସହ ମିଶି ନିର୍ବାଚନ ଲଢିବେ ବୋଲି ଗୋଟିଏ ପ୍ରକାର ସ୍ପଷ୍ଟ ହୋଇଛି । 

ବିହାର ରାଜନୀତିରେ ବଡ଼ ହଲଚଲ
ସଂପ୍ରସାରଣ ହେଲା ନୀତିଶଙ୍କ ମନ୍ତ୍ରିମଣ୍ଡଳ
ବିଜେପିର ୭ ବିଧାୟକ ପାଇଲେ ମନ୍ତ୍ରୀ ପଦ 
ଚର୍ଚ୍ଚାରେ ପଡ଼ିଲା କି ଯବନିକା
ଏନଡିଏ ସହ ମିଶି ନିର୍ବାଚନ ଲଢିବେ ନୀତିଶ

ଦିଲ୍ଲୀରେ ବିଜେପିର ବଡ଼ ବିଜୟ ପରେ ଏବେ ବିହାରକୁ ଫୋକସ୍‌ରେ ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଖାଲି ଫୋକସ କରିଛନ୍ତି ତାହା ନୁହେଁ ବରଂ ଗସ୍ତ ବି କରିଛନ୍ତି । ବଜେଟ୍‌ରେ ଏନେଇ ସ୍ପଷ୍ଟ ଦେଖାଯାଇଥିଲା ବିହାରକୁ ଅନ୍ୟ ରାଜ୍ୟ ତୁଳନାରେ ଅଧିକ ଅନୁଦାନ ମିଳିଛି । ଅବଶ୍ୟ ଏହାକୁ ନେଇ ବିରୋଧୀମାନେ ଗର୍ଜନ କରିଥିଲେ । ହେଲେ ବିଜେପି ସାଂସଦ ସମ୍ବିତ ପାତ୍ର କହିଥିଲେ, ବିହାରର ଅର୍ଥନୀତିର ବିକାଶ କରିବାକୁ ହେଲେ ଅଧିକ ଅନୁଦାନ ଆବଶ୍ୟକ । ଏଥିରେ କୌଣସି ରାଜନୀତି ନାହିଁ । କେନ୍ଦ୍ରରେ ମୋଦୀ ସରକାର ଆସିବା ପରେ ପ୍ରତିରାଜ୍ୟକୁ ସମାନ ଭାବରେ ଦେଖାଯାଉଛି । ଏମିତିକି ଗତକାଲି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ତଥା କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଜେପି ନଡ୍ଡା ମଧ୍ୟ ନୀତିଶଙ୍କ ସହ ୱାନ ଟୁ ୱାନ ଆଲୋଚନା କରିଥିଲେ । ଏହିରୁଦ୍ଧ ଦ୍ବାର ବୈଠକୁ ନେଇ ଜାତୀୟ ଗଣମାଧ୍ୟମରେ ଚର୍ଚ୍ଚା ବି ହେଲା । ଆଉ ଆଜି ନୀତିଶ କୁମାର ନିଜ ମନ୍ତ୍ରୀମଣ୍ଡଳ ସଂପ୍ରସାରଣ କରିବାର ଅର୍ଥ ନୀତିଶ ଆଗକୁ ଏନଡିଏ ସହ ହିଁ ରହିବେ । 

ଉପ-ମୁଖ୍ୟମନ୍ତ୍ରୀ କରିଥିଲେ
୭ ବିଜେପି ନେତାଙ୍କୁ ମନ୍ତ୍ରୀ ପଦ ବି ଦେଲେ

ନୀତିଶ କୁମାରକୁ ନେଇ ଚର୍ଚ୍ଚା ଥମୁନି । କାରଣ କୁହାଯାଉଥିଲା ସେ ଏନଡିଏରେ ଖୁସି ନାହାନ୍ତି । ଖୁବଶୀଘ୍ର ଇଣ୍ଡି ମେଣ୍ଟରେ ଯୋଗ ଦେଇ ନିର୍ବାଚନ ଲଢିବେ । ଖାସ କରି ପୂର୍ବତନ ପିଏମ ମନମୋହନ ସିଂହଙ୍କ ଦେହାନ୍ତ ସମୟରେ ସେ ଦିଲ୍ଲୀ ତ ଯାଇଥିଲେ ହେଲେ ବିଜେପି ନେତାଙ୍କ ସହ ଆଲୋଚନା କରିନଥିଲେ । ପରେ ପରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବକୁ ବି ସେ ଯାଇନଥିଲେ । ଏହି ସମୟରେ ଆରଜେଡି ନେତା କହିଥିଲେ ନୀତିଶ ଆମ ସହ ମିଶି ନିର୍ବାଚନ ଲଢିବେ ତେଣୁ ଦିଲ୍ଲୀ ସିଏମଙ୍କ ଶପଥ ଗ୍ରହଣ ଉତ୍ସବକୁ ସେ କାହିଁକି ଯିବେ । ହେଲେ ନୀତିଶଙ୍କ ମନରେ କି ରଣନୀତି ଚାଲିଥିଲା ତାହାର ଟେର ପାଇନଥିଲେ ବିରୋଧୀ । ମୋଦୀ ପିଏମ କିଷାନର ୧୯ ତମ କିସ୍ତି ଦେବା ପାଇଁ ବିହାରକୁ ବାଛିଥିଲେ । ପରେ ପରେ ନଡ୍ଡା ବି ବିହାର ଗସ୍ତରେ ଯାଇଥିଲେ । ଏ ସବୁ ଦେଖିବା ପରେ ଗୋଟିଏ କଥା ସ୍ପଷ୍ଟ ନୀତିଶ ଏନଡିଏ ହାତ ଛାଡ଼ିବାର ନାହିଁ । ନୀତିଶଙ୍କ କ୍ୟାବିନେଟ୍‌ ମନ୍ତ୍ରୀଙ୍କ ସଂଖ୍ୟା ୨୯ରେ ଥିଲା । ୭ ମନ୍ତ୍ରୀ ପଦ ଖାଲି ଥିଲା । ଏବେ ବିଜେପିର ୭ ବିଧାୟକ ମନ୍ତ୍ରିମଣ୍ଡଳରେ ସାମିଲ ହେବା ପରେ କ୍ୟାବିନେଟ୍‌ ପୂର୍ଣ୍ଣାଙ୍ଗ ରୂପ ପାଇଛି ।