ଆସାମରେ ସକାଳୁ ସକାଳୁ ଭୂକମ୍ପ: ମୋରିଗାଓଁରେ ୫.୧ ତୀବ୍ରତାର ଝଟକା

କନକ ବ୍ୟୁରୋ:  ଆଜି ସକାଳେ ଆସାମର ମୋରିଗାଓଁ ଜିଲ୍ଲାରେ  ଭୂମିକମ୍ପ ଅନୁଭୂତ ହୋଇଛି । ଜାତୀୟ ଭୂକମ୍ପ ବିଜ୍ଞାନ କେନ୍ଦ୍ର ଅନୁଯାୟୀ, ଭୋର ପ୍ରାୟ ୪ଟା ସମୟରେ ଏହି ଭୂମିକମ୍ପ ଅନୁଭୂତ ହୋଇଥିଲା । କୌଣସି ମୃତାହତ କିମ୍ବା କ୍ଷୟକ୍ଷତିର ରିପୋର୍ଟ ମିଳିନାହିଁ ।  ରିକ୍ଟର ସ୍କେଲରେ ଏହାର ତୀବ୍ରତା ୫.୧ ରେକର୍ଡ କରାଯାଇଛି। ସକାଳ ପ୍ରାୟ ସମୟରେ ହଠାତ୍ ଥରିଉଠିଥିଲା ପୂରା ଅଞ୍ଚଳ, ଯାହାଫଳରେ ଲୋକଙ୍କ ମଧ୍ୟରେ ଭୟ ଓ ଆତଙ୍କ ଖେଳିଯାଇଥିଲା ।

ଅଧିକ ପଢନ୍ତୁ:  ତାଇୱାନରେ ଭୟଙ୍କର ଭୂକମ୍ପ, ସାମ୍ନାକୁ ଆସିଲା ଘର ଗୁଡିକ ଦୋହଲୁଥିବାର ଚିତ୍ର

ସକାଳର ଶାନ୍ତ ପରିବେଶ ମଧ୍ୟରେ ଯେତେବେଳେ ଲୋକମାନେ ନିଜର ଦୈନନ୍ଦିନ କାର୍ଯ୍ୟ ଆରମ୍ଭ କରୁଥିଲେ କିମ୍ବା କିଛି ଲୋକ ଶୋଇଥିଲେ, ସେହି ସମୟରେ ହଠାତ୍ ଭୂମି କମ୍ପିବାକୁ ଲାଗିଥିଲା । ମୋରିଗାଓଁ ବ୍ୟତୀତ ଏହାର ଆଖପାଖ ଜିଲ୍ଲା ଯଥା ନାଗାଓଁ, ଗୁଆହାଟୀ ଏବଂ ବ୍ରହ୍ମପୁତ୍ର ଉପତ୍ୟକାର ଅନେକ ସ୍ଥାନରେ ଏହି ଝଟକା ଅନୁଭୂତ ହୋଇଛି । ଲୋକମାନେ ଭୟରେ ନିଜ ନିଜ ଘରୁ ବାହାରକୁ ଖୋଲା ସ୍ଥାନକୁ ଦୌଡ଼ି ଆସିଥିଲେ। ବହୁତଳ ପ୍ରାସାଦ ଏବଂ ଆପାର୍ଟମେଣ୍ଟରେ ରହୁଥିବା ଲୋକଙ୍କ ମଧ୍ୟରେ ଅଧିକ ଭୟ ଦେଖିବାକୁ ମିଳିଥିଲା ।
 
 ସୁରକ୍ଷା ପାଇଁ ସତର୍କତା:
ଭୂକମ୍ପ ଏକ ପ୍ରାକୃତିକ ବିପର୍ଯ୍ୟୟ, ଯାହାର ପୂର୍ବାନୁମାନ କରିବା ଅସମ୍ଭବ। ତେଣୁ ସତର୍କ ରହିବା ହିଁ ଏକମାତ୍ର ଉପାୟ। ବିଶେଷଜ୍ଞଙ୍କ ଅନୁଯାୟୀ:
୧. ଭୂକମ୍ପ ସମୟରେ ଲୋକମାନେ ତୁରନ୍ତ ଖୋଲା ପଡ଼ିଆକୁ ଚାଲିଯିବା ଉଚିତ।
୨. ଯଦି ଘରୁ ବାହାରିବା ସମ୍ଭବ ନୁହେଁ, ତେବେ କୌଣସି ମଜଭୁତ ଟେବୁଲ୍ କିମ୍ବା ଆସବାବପତ୍ର ତଳେ ଆଶ୍ରୟ ନେବା ଉଚିତ।
୩. ଲିଫ୍ଟ ବ୍ୟବହାର ନକରି ସିଡ଼ି ବ୍ୟବହାର କରିବା ଉଚିତ।
୪. କାନ୍ଥରେ ଟଙ୍ଗାଯାଇଥିବା ଆଇନା କିମ୍ବା ଭାରୀ ଜିନିଷଠାରୁ ଦୂରେଇ ରହିବା ଉଚିତ ।

  ଗତ ବର୍ଷ ୨୦୨୫  ସେପ୍ଟେମ୍ବର ୧୪ରେ  ଆସାମରେ ଭୂକମ୍ପ ଝଟକା ମଧ୍ୟ  ଅନୁଭୂତ ହୋଇଥିଲା । ପାଖାପାଖି ୫.୮ ତୀବ୍ରତାର ଭୂକମ୍ପ ଅନୁଭୂତ ହୋଇଥିବାର  ସୂଚନା  ଥିଲା  । ଏହି ଭୂମିକମ୍ପର ପ୍ରଭାବ ଉତ୍ତର-ପୂର୍ବର କିଛି ରାଜ୍ୟ ଓ ପଶ୍ଚିମବଙ୍ଗରେ ବି ଅନୁଭୂତ ହୋଇଥିଲା ।  ଅପରାହ୍ଣ ୪ଟା ୪୧ ମିନିଟ ସମୟରେ ଏହି ଭୂମିକମ୍ପ ଆସିଥିଲା । ଏହି ଭୂମିକମ୍ପର କେନ୍ଦ୍ରସ୍ଥଳ ଆସାମର ଅନ୍ୟ ଏକ ଜିଲ୍ଲା ଉଦଲଗୁରିରେ ଭୂପୃଷ୍ଠରୁ ପାଞ୍ଚ କିଲୋମିଟର ଗଭୀରତାରେ ରେକର୍ଡ କରାଯାଇଥିଲା ।