ହୋମ ନିଆଁରେ ଜଳିଗଲା ଜୀବନର ସବୁ ଦୁଃଖ : ଚାନ୍ଦିନୀର ହାତ ପାହାନ୍ତରେ ସ୍ୱର୍ଗର ଚାନ୍ଦ, ଅଗ୍ନିକୁ ସାକ୍ଷୀ ରଖି ଅନାଥ ଝିଅର ହାତ ଧରିଲେ ବରଗଡ଼ର ଯୁବ ବ୍ୟବସାୟୀ
କନକ ବ୍ୟୁରୋ : ମନ୍ଦିର ପ୍ରାଙ୍ଗଣରେ ବେଦୀ ବନ୍ଧା ହୋଇଛି । ଆଉ ନୋଳ ମୁକୁଟ ପିନ୍ଧି ବେଦୀରେ ବସିଛି ଚାନ୍ଦିନୀ । ହାତରେ ଶଙ୍ଖା, ପାଦରେ ଅଳତା, ମଥାରେ ସିନ୍ଦୁର ନାଇ ମନର ମଣିଷକୁ ଅତି ସରାଗରେ ଅନେଇ ରହିଛି । ସ୍ୱପ୍ନରେ ବି ବିବାହ କଥା ଭାବିପାରୁନଥିବା ଅନାଥ ଝିଅଟି ଆଜି ଖୋଜିଲା ମଣିଷକୁ ପାଇଛି । ଏତେ ବଡ଼ ଦୁନିଆରେ ଏକା ଥିବା ଚାନ୍ଦିନୀ ପାଇଛି ଭରିଲା ପୁରିଲା ପରିବାର । ଅଗ୍ନିକୁ ସାକ୍ଷୀ ରଖି ବିବାହ ବନ୍ଧନରେ ଆବନ୍ଧ ହୋଇଛନ୍ତି ବରକନ୍ୟା । ପିଲାବେଳୁ ଅନାଥାଶ୍ରମରେ ବଢ଼ିଥିବା ଚାନ୍ଦିନୀର ହାତ ଧରିଛନ୍ତି ବରଗଡ଼ର ଯୁବ ବ୍ୟବସାୟୀ କ୍ଷୀରୋଦ ଅଗ୍ରୱାଲ । ଅତି ଜାକଜମକରେ ବିବାହ କାର୍ଯ୍ୟ ସମ୍ପନ୍ନ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଅନାଥ ଝିଅ ଚାନ୍ଦିନୀର ହାତ ଧରିଥିବା ଯୁବ ବ୍ୟବସାୟୀ ସମାଜସେବା କରୁକରୁ କେତେବେଳେ ଯେ ଚାନ୍ଦିନୀକୁ ମନ ଦେଇବସିଥିଲେ ଜାଣିପାରିନଥିଲେ । ବିବାହ ବାର୍ଷିକୀ, ଜନ୍ମୋତ୍ସବ, ଏକୋଇଶିଆ ଆଦି ପର୍ବରେ ନିୟମିତ ଅନାଥାଶ୍ରମ ଆସୁଥିଲେ କ୍ଷୀରୋଦ । ଆଉ ନିତିଦିନ ଦେଖାଚାହାଁ ଭିତରେ ଆଶ୍ରମରେ ମନରେ ମନ ମିଶିଲା । ଚାନ୍ଦିନୀ ଓ କ୍ଷୀରୋଦ ଉଭୟ ଉଭୟଙ୍କୁ ଭଲ ପାଇ ବସିଥିଲେ । ଆଉ ତା’ପରେ ପରିବାର ସମ୍ମତି କ୍ରମରେ ବିବାହ ।
ଚାନ୍ଦିନୀକୁ ସତେ ଯେମିତି ହାତପାହାନ୍ତାରେ ସ୍ୱର୍ଗର ଚାନ୍ଦ ମିଳିଯାଇଛି । ହାତକୁ ଦିହାତ ହୋଇଛି ଚାନ୍ଦିନୀ । ଭଙ୍ଗାଦଦରା ଘରେ ଭାଗ୍ୟକୁ ନିନ୍ଦୁଥିବା ଅନାଥ ଝିଅ ଚାନ୍ଦିନୀ ଆଜି ବଡ଼ଘର ବୋହୂ ସାଜିଛି । ହାତରେ ମେହେନ୍ଦି ସାଙ୍ଗକୁ ପିନ୍ଧିଥିବା ଲାଲ ଫରଫର ଶାଢ଼ୀରେ ଆଜି ବେଶୀ ସୁନ୍ଦର ଦିଶୁଛି ଚାନ୍ଦିନୀ । ଯୁବ ବ୍ୟବସାୟୀ କ୍ଷୀରୋଦ ଅଗ୍ରୱାଲଙ୍କ ସମସ୍ତ ହିନ୍ଦୁ ରୀତିନୀତି ଅନୁୁସାରେ ଚାନ୍ଦିନୀର ହାତ ଧରିଛନ୍ତି । ବରଗଡ଼ର ସିମେଣ୍ଟନଗର ସ୍ଥିତ ରାଣୀସତୀ ମନ୍ଦିରରେ ବର ପକ୍ଷଙ୍କ ପରିବାର ଓ ଅନାଥ ଆଶ୍ରମରେ କାର୍ଯ୍ୟକର୍ତ୍ତାଙ୍କ ଗହଣରେ ବିବାହ ସମ୍ପର୍ଣ୍ଣ ହୋଇଛି । ଏହି ନିଆରା ବିବାହ ଭୋଜିରେ ଡାକ୍ତର, ସାମ୍ବାଦିକ, ଓକିଲ, ସମାଜସେବୀଙ୍କ ଠାରୁ ଆରମ୍ଭ କରି ରାଜନେତା ଓ ଅନେକ ମାନଗଣ୍ୟ ବ୍ୟକ୍ତି ଯୋଗଦେଇ ନବଦମ୍ପତିଙ୍କୁ ଆଶିର୍ବାଦ ଦେଇଛନ୍ତି ।
ହେଲେ ବିଦାୟ ବେଳାକୁ କୋହ ସମ୍ଭାଳି ପାରୁନି ଚାନ୍ଦିନୀ । ୨୧ ବର୍ଷ କାଳ ମନର ଡୋରରେ ବନ୍ଧା ସମ୍ପର୍କକୁ ଛାଡ଼ି ଗଲାବେଳକୁ ଆଖିର ଲୁହ ବୋଲ ମାନୁନି । କାନ୍ଦ ବୋବାଳିରେ ଫାଟିପଡ଼ୁଛି ଆଶ୍ରମ ପରିସର । ଚାନ୍ଦିନୀ ଦିଦିକୁ ଛାଡ଼ି ରହିବା କଥା ଚିନ୍ତା କରି କାନ୍ଦୁଛନ୍ତି କୁନି କୁନି ପିଲା । ବାଲ୍ୟକାଳର ଅଭୁଲା ସ୍ମୃତିକୁ ସାଉଣ୍ଟି ବିଦାୟ ନେଇଛି ଚାନ୍ଦିନୀ । ସେ ଯାହା ବି ହେଉ ଚାନ୍ଦିନୀ ଜୀନବରୁ ଦୁଃଖର ବାଦଲ ସବୁ ଅପରସରି ଯାଇଛି । ଅନାଥ ଝିଅ ଏବେ ସୁଖର ସଂସାର ଗଢ଼ିବ । ତେବେ ବିନା ଯୌତୁକରେ ଅନାଥ ଝିଅକୁ ବିବାହ କରିଥିବାରୁ ଯୁବ ବ୍ୟବସାୟୀ କ୍ଷୀରୋଦଙ୍କୁ ସବୁ ମହଲରେ ପ୍ରଶଂସା କରାଯାଉଛି । ସମାଜ ପାଇଁ ସେ ଉଦାହରଣ ସୃଷ୍ଟି କରିଛନ୍ତି ।