ଜାପାନକୁ ମିଳିଲା ପ୍ରଥମ ମହିଳା ପ୍ରଧାନମନ୍ତ୍ରୀ, ମୋଦୀ ଜଣାଇଲେ ଶୁଭେଚ୍ଛା

କନକ ବ୍ୟୁରୋ : ଜାପାନକୁ ମିଳିଲା ପ୍ରଥମ ମହିଳା ପ୍ରଧାନମନ୍ତ୍ରୀ । ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ହୋଇଛନ୍ତି ସାନାଏ ତାକାଇଚି । ସେ ପ୍ରଧାନମନ୍ତ୍ରୀ ହେବା ପରେ ତାଙ୍କ ନିକଟକୁ ଛୁଟିଛି ଶୁଭେଚ୍ଛାର ଶୁଅ । ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ସାନାଏ ତାକାଇଚିଙ୍କୁ ଅଭିନନ୍ଦନ ଜଣାଇଛନ୍ତି ପ୍ରଧାନମନ୍ତ୍ରୀ ମୋଦୀ ।  ସେ କହିଛନ୍ତି ଯେ ସେ ଦୁଇ ଦେଶ ମଧ୍ୟରେ ରଣନୈତିକ ସହଭାଗୀତାକୁ ସୁଦୃଢ଼ କରିବା ଏବଂ ଏକାଠି କାମ କରିବାକୁ ଅପେକ୍ଷା କରିଛନ୍ତି । ତାକାଇଚି ଶିଗେରୁ ଇଶିବାଙ୍କ ଉତ୍ତରାଧିକାରୀ ହେବେ।

ସୋସିଆଲ ମିଡିଆ ପ୍ଲାଟଫର୍ମ 'X'ରେ ଏକ ପୋଷ୍ଟରେ ପ୍ରଧାନମନ୍ତ୍ରୀ ମୋଦୀ ଲେଖିଛନ୍ତି, "ସାନାଏ ତାକାଇଚି, ଜାପାନର ପ୍ରଧାନମନ୍ତ୍ରୀ ନିର୍ବାଚିତ ହୋଇଥିବାରୁ ତାଙ୍କୁ ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ । ଭାରତ-ଜାପାନ ସ୍ୱତନ୍ତ୍ର ରଣନୈତିକ ଏବଂ ବିଶ୍ୱ ସହଭାଗୀତାକୁ ଆହୁରି ମଜବୁତ କରିବା ପାଇଁ ମୁଁ ଆପଣଙ୍କ ସହିତ ଘନିଷ୍ଠ ଭାବରେ କାମ କରିବାକୁ ଅପେକ୍ଷା କରିଛି । ଆହୁରି ଶାନ୍ତି, ସ୍ଥିରତା ଏବଂ ସମୃଦ୍ଧି ପାଇଁ ଆମ ଦେଶ ମଧ୍ୟରେ ସମ୍ପର୍କକୁ ଗଭୀର କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।"

କେବଳ ପ୍ରଧାନମନ୍ତ୍ରୀ ମୋଦି ନୁହଁନ୍ତି, ଜାପାନର ନୂତନ ପ୍ରଧାନମନ୍ତ୍ରୀଙ୍କୁ ସାରା ବିଶ୍ୱ ଶୁଭେଚ୍ଛା ଜଣାଉଛି । UAE ରାଷ୍ଟ୍ରପତି ମହମ୍ମଦ ବିନ୍ ଜାଏଦ ଅଲ୍ ନାହ୍ୟାନ୍ ମଧ୍ୟ ତାକାଇଚିଙ୍କୁ ଅଭିନନ୍ଦନ ଜଣାଇଛନ୍ତି । X ରେ ପୋଷ୍ଟ କରି ସେ କହିଛନ୍ତି, "ଦେଶକୁ ଆହୁରି ପ୍ରଗତି ଏବଂ ବିକାଶ ଆଡ଼କୁ ନେଇଯିବାରେ ମୁଁ ତାଙ୍କର ସଫଳତା କାମନା କରୁଛି।"

ସେ ଆହୁରି ଲେଖିଛନ୍ତି, "ଜାପାନର ପ୍ରଧାନମନ୍ତ୍ରୀ ହେବା ପାଇଁ ମୁଁ ସାନାଏ ତାକାଇଚିଙ୍କୁ ଅଭିନନ୍ଦନ ଜଣାଉଛି । ଆମର ବ୍ୟାପକ ରଣନୈତିକ ସହଭାଗୀତାର ଭିତ୍ତିଭୂମି ଉପରେ ନିର୍ମାଣ କରି, ମୁଁ ୟୁଏଇ-ଜାପାନ ସମ୍ପର୍କକୁ ଆହୁରି ଗଭୀର କରିବା ଏବଂ ଆମ ଦେଶ ଓ ଲୋକଙ୍କ ବିକାଶ, ସମୃଦ୍ଧିକୁ ପ୍ରୋତ୍ସାହିତ କରିବା ପାଇଁ ଏକାଠି କାମ କରିବାକୁ ଅପେକ୍ଷା କରିଛି ।"

ମଙ୍ଗଳବାର ଦିନ, ସାନାଏ ତାକାଇଚି ଜାପାନର ସଂସଦର ଉଭୟ ଗୃହରେ, ଯାହାକୁ ଡାଏଟ୍ ଭାବରେ ଜଣାଶୁଣା, ସେଥିରେ ସେ ବହୁମତ ହାସଲ କରିଛନ୍ତି । LDP ଜାପାନ ଇନୋଭେସନ୍ ପାର୍ଟି ସହିତ ଏକ ମେଣ୍ଟ ଗଠନ କରିଥିଲା ଏବଂ ଏକ ମେଣ୍ଟ ସରକାର ଗଠନ ପାଇଁ ଏକ ଚୁକ୍ତିନାମା ସ୍ୱାକ୍ଷର କରିଥିବା ଜଣାପଡ଼ିଛି ।

ରିପୋର୍ଟ ଅନୁଯାୟୀ, ତାକାଇଚି ୨୩୭ ଭୋଟ ପାଇ ବିଜୟ ହୋଇଥିବା ବେଳେ ଜାପାନର କନଷ୍ଟିଚ୍ୟୁଏଣ୍ଟ ଡେମୋକ୍ରାଟିକ୍ ପାର୍ଟିର ନେତା ୟୋଶିହିକୋ ନୋଡାଙ୍କୁ ୧୪୯ ଭୋଟ ମିଳିଛି ।

ଜାପାନର ନୂତନ ପ୍ରଧାନମନ୍ତ୍ରୀ ହେବା ପରେ ତାଙ୍କ ଭାଷଣରେ ତାକାଇଚି କହିଛନ୍ତି ଯଦି ସମସ୍ତେ ଏକାଠି କାମ କରନ୍ତି, ତେବେ ଜାପାନକୁ ପୁନଃନିର୍ମାଣ କରାଯାଇପାରିବ । ସମସ୍ତଙ୍କୁ କଠିନ ପରିଶ୍ରମ କରିବାକୁ ନିବେଦନ କରି ସେ କହିଛନ୍ତି, "ମୁଁ ବ୍ୟକ୍ତିଗତ ଭାବରେ 'କାର୍ଯ୍ୟ-ଜୀବନ ସନ୍ତୁଳନ' ଉପରେ ଧ୍ୟାନ ଦେବି ନାହିଁ । ମୁଁ କେବଳ କାମ କରିବି, କାମ କରିବି, କାମ କରିବି ।" ସମସ୍ତେ ମୋ ସାଥ୍ ଦେବାକୁ ଅନୁରୋଧ ।